Iilonga yokuuvitha oye endelela, oshoka uudhigu uunene owu li popepi. (Omayel 24:11, 12, 20) Otatu vulu okulongitha uukalata wokufala aantu kepandja lyetu lyokointaneta, opo tu ya kwathele ya ye ko noya leshe Oohapu dhaKalunga. Kokakalata oku na okoode ndjoka hayi fala omuntu kokavidio: Omolwashike wa pumbwa okukonakona Ombiimbeli? naampoka ta vulu okumona uuyelele owundji nenge okupula ekonakonombiimbeli. Aantu yamwe kaye hole okutaamba iileshomwa yetu, ihe ohaya kala ye na ehalo lyokuya kepandja lyetu lyokointaneta. Onkee ano, ino kakadhala oku ya pa okakalata hoka. Nonando ongaaka, okakalata ino ka gandja kaantu mboka kaaye na ohokwe.

Sho wi ipyakidhila niilonga yoye yesiku kehe, oto vulu okupendula ohokwe momuntu, moku mu lombwela to ti: “Ondi na oshinima nda hala oku ku pa. Okakalata haka otake ku fala kepandja lyetu lyokointaneta, ndyoka li na uuyelele woshali nosho wo uuvidio tawu popi iinima ya yoolokathana.” (Joh 4:7) Molwaashono uukalata mboka uushona, oto vulu okukala nawo ethimbo kehe, opo wu wu gandje kuyalwe pompito kehe to mono.