Edhimbuluko otali tu pe ompito ombwanawa yokuulika kutya omalaleko nuuyamba geni onakuyiwa yi tu nine, ngaashi, eyumuko, shoka sha ningwa tashi wapa omolwekulilo. Jehova ka li nando a shita aantu nelalakano ya kale haya si. Nomolwashoka okusa oluhodhi omolweso lyagumwe ngoka tu hole, osho oshinima shimwe shoka hashi tu ehameke noonkondo pamadhiladhilo. (1Kor 15:26) Jesus okwa li uvite uudhigu sho a mono aalanduli ye taya lili omolweso lyaLasarus. (Joh 11:33-35) Molwashoka Jesus omuntu a gwanenena a fa naanaa He, otatu vulu okukala nuushili kutya naJehova oha kala wo u uvite uudhigu okumona aantu ya nika oluhodhi omolwomaso gaaholike yawo. (Joh 14:7) Jehova okwa tegelela nondjuulukwe oku ka yumudha aapiya pethimbo lyontumba, natse otu na okukala twe li tegelela. — Job 14:14, 15.

Jehova, oKalunga kelandulathano, onkee oshi li pandunge okwiitaala kutya eyumuko otali ka ningwa melandulathano. (1Kor 14:33, 40) Pehala lyomafumviko, otashi vulika tashi ka kala ethimbo lyokuhambelela mboka taya yumuka. Mbela oho dhiladhila ngaa keyumuko, unene tuu pethimbo wa nika oluhodhi? (2Kor 4:17, 18) Mbela oho pandula ngaa Jehova omolwekulilo nosho wo sho a holola mOohapu dhe kutya aasi otaya ka yumuka? — Kol 3:15.

• Ookuume koye yeni nosho wo aakwanezimo lyoye wa yuulukwa oku ka mona monakuyiwa?

• Aantu yeni ya popiwa mOmbiimbeli wa halelela oku ka mona nokupopya nayo?