David okwa li a sindi Goliat, molwaashoka okwa li i inekela muJehova. (1Sam 17:45) Jehova okwa hala okunkondopaleka aapiya ye ayehe. (2Ondjal 16:9) Ongiini tatu vulu okwiinekela ekwatho ndyoka Jehova te tu pe, pehala lyokwiinekela moondunge dhetu yene? Tala komikalo ndatu tadhi landula, moka to vulu oku shi ninga:

• Kala ho galikana pandjigilile. Ino kala owala ho galikana wu dhiminwe po konima sho wa ninga epuko lyontumba, ihe kala wo ho pula Jehova e ku pe oonkondo wu kondjithe omashongo ngoka wu li mugo. (Mat 6:12, 13) Kakele kokugalikana Jehova a yambeke omatokolo ngoka wa ninga nale, mu galikana wo e ku wilike noku ku pe uunongo, manga inoo ninga omatokolo. — Jak 1:5

• Kala wu na ondjigilile yokulesha Ombiimbeli noku yi konakona. Kala ho lesha Ombiimbeli esiku kehe. (Eps 1:2) Kala ho tedhatedha kiiholelwa yomOmbiimbeli nokutula miilonga shoka to ilongo. (Jak 1:23-25) Kala ho ilongekidhile iilonga yokuuvitha, pehala lyokwiinekela mwaashoka wa ninga monakuziwa. Mona mo uuwanawa momakugongala gopaKriste, mokukala ho gi ilongekidhile kuyele

• Kala ho longele kumwe nehangano lyaJehova. Kala ho endele pamwe nomalombwelo ngoka ge li pethimbo taga zi kehangano, noku ga landula nziya ngaashi tashi vulika. (Num 9:17) Kala ho pulakene kaakuluntugongalo, uuna taya gandja omalombwelo nosho wo omayele. — Heb 13:17

TALA OKAVIDIO KATU NA ETOMPELO LYOKUKALA TWA TILA OMAHEPEKO, E TO YAMUKULA OMAPULO NGAKA:

• Aamwatate naamwameme oya li ye na uumbanda washike?

• Oshike she ya kwathele ya sinde uumbanda mboka?