Kunena iiponga yopaunshitwe oya ninga oyindji. Uuna pwa holoka oshiponga shopaunshitwe, oonkambadhala dhokugandja ekwatho odhi na okukala dha unganekwa nawa. Onkee ano, Olutuwiliki olwa ningi omalongekidho moshitayimbelewa kehe mu kale Oshikondo shokugandja iikwatha.

Uuna pwa holoka oshiponga, aamwatate yomoshikondo shoka ohaya kwatathana nziya naakuluntugongalo yomoshitopolwa shoka sha gumwa koshiponga shopaunshitwe, opo ya tseye kutya ekwatho lini aauvithi ya pumbwa. Ngele oshitopolwa osha dhengwa unene koshiponga shopaunshitwe, naamwatate yomoshitopolwa itaya vulu okuninga po sha, oshitayimbelewa ohashi unganeke aamwatate ya pyokoka ya kwatele komeho iilonga yokugandja iikwatha. Aamwatate mboka otashi vulika ya pule aaiyambi nenge omayambidhidho giinima yokondandalunde nenge nokuli ya lande nokugandja iikwatha mbyoka ya pumbiwa.

Okuunganeka iinima momukalo nguka, oku na uuwanawa owundji. Shoka ohashi tu kwathele kaatu longe iilonga lwaali, tu yande evundakano nokaatu hepithe iimaliwa niilongitho, iinima mbyoka hayi holoka po, uuna aamwatate ya katuka oonkatu kuyo yene.

Aamwatate mboka ya langekwa po koshitayimbelewa, otaya vulu okutokola kutya iimaliwa ingapi tayi ka pumbiwa nosho wo aaiyambi. Ohaya kwatathana wo naanambelewa yomoshitopolwa, shoka hashi ningitha iilonga mbika yi pwe nziya. Onkee aamwatate kamu na okukambadhala okukonga iimaliwa niikwatha yilwe nenge muye kehala hoka kwa holoka oshiponga, omanga inaamu tseyithilwa.

Natu kale aluhe tu na ehalo lyokukwathela, uuna pwa holoka oshiponga shopaunshitwe. (Heb 13:16) Oshike tatu ka ninga po, ngele otu hole aamwatate? Shoka sha simanenena, otatu vulu okugalikanena mboka ya gumwa koshiponga shopaunshitwe naamboka taya longekidha iikwatha. Otatu vulu wo okugandja omayambidhidho mokaketha kiilonga yomuuyuni awuhe. Kohi yewiliko lyOlutuwiliki, iitayimbelewa ohayi kala yi shi kutya iimaliwa oyi na okulongithwa ngiini. Ihe ngele otu na ehalo lyokukwathela, otu na oku shi ulika mokuudhitha ofooloma Local Design/Construction Volunteer Application (DC-50).

TALA OKAVIDIO OSHIKUNGULU SHOKA SHA LONGA UUSHADHA MOBRASILIA, E TO YAMUKULA EPULO NDIKA:

Sho Oonzapo dhaJehova dha kwathele moBrasilia konima sho sha dhengwa koshikungulu mo 2020, oshe ku gumu ngiini?