Embo Ombiimbeli otayi tu longo nosho wo Omalongo gOmbiimbeli oga faathana. Agehe otaga longo oshili momukalo gwa faathana, ihe embo Ombiimbeli otayi tu longo epu nokuuviwa ko. Olya nyanyangidhwa li kwathele mboka haya nyengwa okuuva ko shoka shi li membo Omalongo gOmbiimbeli. Embo Ombiimbeli otayi tu longo kali na oshigwedhelwako, ihe oli na omayelitho kehulilo, ngoka ga fatulula iitya nosho wo omautumbulilo gamwe ngoka ge li mo. Oontopolwa dhalyo kadhi na omapulo gopetameko nenge oshimpungu sheendululo, ihe odhi na owala engongo lyoshili yOmbiimbeli ndjoka ya popiwa montopolwa kehe. Embo Ombiimbeli otayi tu longo otatu vulu oku li gandja ethimbo kehe, nonando halyo tali gandjwa momwedhi ngoka, ngaashi owala hatu ningi nembo Omalongo gOmbiimbeli. Ongiini tatu vulu okulongitha engongo nomayelitho ngoka ge li membo Ombiimbeli otayi tu longo, sho tatu ningi ekonakonombiimbeli?

ENGONGO LYONTOPOLWA: Omukalo ngoka hatu longitha olundji, okulesha tango okatendo membo Omalongo gOmbiimbeli nokonima tatu pula epulo, ohagu longo nawa kaantu oyendji. Kakele owala shila ngele omukonakoni ke shi nawa elaka nenge okulesha. Uuna shi li ngawo, oto vulu okulongitha uuyelele mboka wu li mengongo lyontopolwa yembo Ombiimbeli otayi tu longo owo mu konakone. Opo ihe mu ladhipika a kambadhale okulesha ontopolwa kuye mwene. Oshitsa kehe otamu vulu oku shi kundathana muule wominute 15 lwaampono. Engongo lyontopolwa inali kwatela mo uuyelele wontopolwa ayihe. Onkee ano, i ilongekidha nawa, nokukaleka momadhiladhilo oompumbwe dhomukonakoni gwoye. Ngele omwa kundathana uuyelele mboka wu li montopolwa yo yene, oto vulu okulongitha engongo wu ninge eendululo.

OMAYELITHO: Iitya nomautumbulilo ngoka ga yelithwa oyi li melandulathano ngaashi tayi adhika moontopolwa. Oto vulu okuhogolola ngele otamu ka kundathana omayelitho membo Ombiimbeli otayi tu longo pethimbo sho tamu konakona.