Masiku Jehova ite ki idhidhimikila we uuyuni mbuka. Omalongelokalunga giifundja otaga ka hanagulwa po, iigwana yi imanga kumwe otayi ka ponokela oshigwana shaKalunga, opo ihe Jehova ota ka hanagula po aakolokoshi puArmagedon. Aakriste oya halelela oku ka mona iiningwanima mbyoka ya simana noyinyanyudha tayi ningwa.

Odhoshili kutya katu shi uuyelele awuhe mboka wa kwatelwa mo kombinga yuudhigu uunene. Pashiholelwa, katu shi naanaa kutya otawu ka tameke uunake. Katu shi kutya omapangelo gopapolitika otaga ka longitha omatompelo geni, ga ponokele omalongelokalunga. Katu shi wo kutya iigwana otayi ka ponokela oshigwana shaKalunga uule wethimbo li thike peni noshike tashi ka kwatelwa mo. Natango, katu shi kutya Jehova ota ka longitha shike a hanagule po aakolokoshi puArmagedon.

Nonando ongawo, Omanyolo oge tu pa uuyelele awuhe mboka twa pumbwa, opo tu taalele onakuyiwa tu na omukumo neinekelo. Pashiholelwa, otu shi kutya otu li pehulilo ‘lyomasiku gahugunina.’ (2Tim 3:1) Otu shi kutya eponokelo lyomalongelokalunga otali ka “fupipikwa,” opo elongelokalunga lyashili kaali ka hanagulwe po. (Mat 24:22) Otu shi kutya Jehova ota ka hupitha oshigwana she. (2Pet 2:9) Otu shi wo kutya ngoka ta ka longithwa kuJehova a hanagule po aakolokoshi noku gamene ongundu onene piita yaArmagedon, omuyuuki nomunankondo. — Eh 19:11, 15, 16.

Iiningwanima yomonakuyiwa otayi ka ningitha aantu ‘ya se kuumbanda.’ Nonando ongawo, ngele otwa kala tatu lesha nokutedhatedha kunkene Jehova a kala nokuhupitha oshigwana she monakuziwa nosho wo kwaashoka e tu hololela kombinga yonakuyiwa, otatu ka ‘yelutha omitse dhetu tu ukilila,’ tu na einekelo kutya ehupitho lyetu oli li popepi. — Luk 21:26, 28.