OTASHI monika ndishi sha fa eyoka lyolela lyi idhingila koshiti? Halyo. Eyoka olya ningwa moshikushu. Jehova okwa lombwele Moses e li tule koshiti opo oshigwana shi vule okutala ko noshi vule okukala nomwenyo. Ihe omayoka galwe pevi oge na omwenyo. Go oga komona aantu noge ya ehameke. Owa tseya mbela kutya omolwashike?

Omolwashoka Aaisrael oya popi nayi Kalunga naMoses. Yo otaa nyenyeta: ‘Omolwashike we tu kuthile kuEgipiti tu ye tu sile mombuga? Muka kaamu na iikulya nenge omeya. Notwa vulwa noonkondo okulya omanna ngaka.’

Ihe omanna ogo iikulya iiwanawa. Jehova okwe ge ya pe okupitila moshi-kumithalonga. Nokwe ya pe wo omeya mokupitila moshikumithalonga. Ihe aantu inaa pandula omukalo ngoka Kalunga te ya sile nagwo oshimpwiyu. Omolwashono Jehova ta tumu omayoka ngaka guuzigo okugeyela Aaisrael. Omayoka otage ya komona noyendji yomuyo otaa si.

Lwahugunina aantu otaye ya ku-Moses notaa ti: ‘Otwa yono molwashoka otwa popi nayi Jehova nangoye. Galikana ngashingeyi kuJehova opo a kuthe po omayoka ngaka.’

Ano Moses ota galikanene oshigwana. Jehova nota lombwele Moses a ninge eyoka lyoshikushu ndika. Ota ti kutya oli na okutulwa koshiti, nakehe ngoka ta komonwa oku na okutala kulyo. Moses ota ningi naanaa ngaashi Kalunga ta ti. Naantu mboka taa komonwa otaa tala keyoka lyoshikushu notaa aluka ishewe.

Tse otatu vulu okwiilonga oshilongwa mwaashika. Momukalo gwontumba tseni atuheni ongaashi Aaisrael mbeyaka mboka ya komonwa keyoka lyoshikushu. Tse atuhe ohatu si. Tala momu-dhingoloko noto ka mona kutya aantu otaa kulupa notaya alukwa notaya si. Osho molwashoka omulumentu nomukiintu yotango, Adam naEva, oya thigi po Jehova, natseni atuheni aanona yawo. Ihe Jehova okwa ningi sha opo tseni tu vule okukala nomwenyo sigo aluhe.

Jehova okwa tumu Omwana, Jesus Kristus, kombanda yevi. Jesus okwe endjelelekwa koshiti molwashoka aantu oyendji oya dhiladhila kutya ye omwiinayi. Ihe Jehova okwa gandja Jesus e tu hupithe. Ngele tse tatu tala kuye nongele tse tatu mu landula, tse otatu vulu okumona omwenyo gwaaluhe. Ihe tse otatu ki ilonga nale oshindji kombinga yaashino.