OU WETE shoka tashi ningwa mpaka? Ayehe oyo aakwiita yaIsrael. Aalumentu mboka taa kotamene oyi ipyakidhila nokunwa. Ngoka a thikama puyo oye Omutokolihapu Gideon. Ye ota tala nkene yo taa nu omeya.

Tala komikalo dhi ili nodhi ili ndhoka aalumentu taa nu omeya. Yamwe otaye eta iipala yawo naanaa sigo opomeya. Ihe gumwe ote eta omeya komulungu gwe noshikaha she opo a vule okutala shoka tashi ningwa momudhingoloko gwe. Osha simana, oshoka Jehova okwa lombwele Gideon a hogolole owala aalumentu mboka ya tonata manga yo taa nu. Kalunga okwa ti kutya oshihupe oshi na okushunithwa kegumbo. Natu tale kutya omolwashike.

Aaisrael oye li ishewe muudhigu uunene. Osho molwashoka yo oya li inaaya vulika kuJehova. Aantu yokuMidian oye ya sindi noye ya ningi nayi. Ano Aaisrael otayi ithana ekwatho kuJehova, Jehova nota pulakene eigidho lyawo.

Jehova ota lombwele Gideon a gongele etanga, ano Gideon ota gongele aakwiita 32 000. Ihe etanga lyaatondi yaIsrael olya thikama maalumentu 135 000. Nonatango Jehova ota ti kuGideon: ‘Ngoye ou na aalumentu oyendji.’ Omolwashike Jehova e shi tile?

Osho molwashoka Aaisrael otashi vulika taa dhiladhila kutya esimano otali ningi lyawo ngele yo oya sindana. Ngiika yo otaa ka dhiladhila kutya yo kaya li ya pumbwa ekwatho lyaJehova okusindana. Omolwashoka Jehova ta ti kuGideon: ‘Lombwela ayehe mboka ya tila ya shune kegumbo.’ Sho ngaa Gideon te shi ningi, 22 000 yomaakwiita ye otaa shuna kegumbo. Ano opwa hupu owala aalumentu 10 000 okukondjitha aakwiita mboka 135 000.

Ihe pulakena! Jehova ota ti: ‘Ngoye ou na natango aalumentu oyendji.’ Ano ye ota lombwele Gideon a nwithe aalumentu pomulonga nguka, naayehe mboka taye eta iipala yawo sigo opomeya okunwa otaa shunithwa kegumbo. ‘Ngame esindano otandi ke li ku pa u na aalumentu 300 mboka ya li ya tonata omanga yo ya li taa nu,’ Jehova tu uvaneke.

Ethimbo lyolugodhi olya thikana. Gideon ota topola aalumentu ye 300 moongundu ndatu. Ye ota pe kehe omulumentu enkuma nosho wo oshiyuma mu na onyeka. Lwopokati kuusiku yo otaa kundukidha ontanda yomutondi. Opo nduno otaa hiki oshita omankuma gawo notaa tatula iiyuma yawo notayu uyagana: ‘Egongamwele olyaJehova nolyaGideon!’ Sho aakwiita aatondi taa penduka, oya piyagana noya tila. Yo ayehe otaa tameke okuya ontuku, nAaisrael otaa sindi iita.