MOSES okwa hala a ye pamwe nAaisrael muKanaan. Ano ota pula: ‘Jehova, taagulukithe ndje Omulonga gwaJordan nondi mone oshilongo oshiwanawa.’ Ihe Jehova ota ti: ‘Sha gwana! Ino popya we kwaashino!’ Owa tseya kutya omolwashike Jehova e shi tile?

Osho molwashono sha ningwa po sho Moses a dhenge emanya. Dhimbulukwa kutya ye naAaron inaya simaneka Jehova. Yo inaya lombwela oshigwana kutya oye Jehova ngoka a li a zitha omeya memanya. Omolwashoka Jehova a ti kutya ye ite ke ya pitika ya ye muKanaan.

Ano oomwedhi dhimwe konima yeso lyaAaron Jehova ota ti kuMoses: ‘Kutha Josua, mu thikamitha ihe komeho gomusaaseri Eleasar nogoshigwana. Naahono komeho gawo ngoye ou na okulombwela ayehe kutya Josua oye omuwiliki omupe.’ Moses ota ningi naanaa ngaashi Jehova ta ti, ngaashi to vulu okumona mefano.

Opo nduno Jehova ota ti kuJosua: ‘Kala u na oonkondo, ino kala wa tila. Ngoye oto ka fala Aaisrael moshilongo shaKanaan shoka ngame nde shi ya uvanekele, ongame notandi ka kala pamwe nangoye.’

Konima Jehova ota lombwele Moses a londe pombanda sigo okondungu yOndundu yaNebo moshilongo shaMoab. Hoka Moses ota vulu okutala kombanda yOmulonga gwaJordan nokumona oshilongo shaKanaan oshiwanawa. Jehova ota ti: ‘Shika osho oshilongo shoka ngame ndu uvaneka oku shi pa aanona yaAbraham, Isaak naJakob. Otandi shi ku ulukile, ihe itandi pitika u ye mo musho.’

Moses oko a sile kombanda yOndundu yaNebo. Okwa li e na oomvula 120. Okwa li natango e na oonkondo nota vulu natango okumona ko nawa. Aantu oyu uvite oluhodhi noonkondo notaa lili molwashoka Moses a si. Ihe oya nyanyukwa sho Josua oye omuwiliki gwawo omupe.