KAKE shi mbela okamati okawanawa? Edhina lyako oSamuel. Omulumentu ngoka a tenteka oshikaha she kombanda yomutse gwaSamuel omusaaseri omukuluntu gwaIsrael Eli. Oyo he yaSamuel Elkana nayina Hanna mboka taye eta Samuel kuEli.

Samuel oku na owala oomvula ne nenge ntano. Ihe ye ota ka kala pamwe naEli naasaaseri yalwe mpaka petsalihangano lyaJehova. Omolwashike Elkana naHanna taye eta gumwe ngoka omushona ngawo okulonga metsalihangano lyaJehova? Natu tale.

Oomvula owala dhontumba dha piti po komeho yaashika sho Hanna a li a yemata. Osho molwashoka ye ka li ta vulu okumona okanona, nokwa halele noonkondo okumona okanona. Sho esiku limwe Hanna a talele po etsalihangano lyaJehova, ano ye okwa galikana: ‘Akutu Jehova, ino dhimbwa ndje! Ngele to pe ndje omumati, otandi uvaneke kutya otandi ke mu ku pa opo a vule oku ku longela uule wonkalamwenyo ye ayihe.’

Jehova oku uvu egalikano lyaHanna, nokonima yokathimbo Samuel okwa valwa. Hanna okwa li e hole okamati ke, nokwa tameke oku ka longa kombinga yaJehova omanga ka li okashona natango. Ye okwa ti komulumentu gwe: ‘Shampa Samuel a koko sha gwana itaa yamu we, otandi ke mu fala ketsalihangano a ka longele Jehova hoka.’

Osho shoka tu wete Hanna naElkana taa ningi mefano. Nomolwashoka Samuel okwa longwa nawa kaakuluntu ye, ye okwa nyanyukwa sho ta vulu okulongela Jehova mpaka metsali Lye. Hanna naElkana ohaye ya omvula kehe okugalikana mpaka petsali lyi ikalekelwa nokutalela po okamati kawo. Nomvula kehe Hanna ohe etelele onguwo ompe kaayi na omaako ndjoka ye a ningila Samuel.

Manga oomvula tadhi piti po, Samuel ota tsikile okulonga metsalihangano lyaJehova, na Jehova nosho wo oshigwana oye mu hole. Ihe oyanamati yomusaaseri omukuluntu Eli, Hofni naPinehas aawinayi. Yo otaa longo iinima yi ili noyi ili iiwinayi, notaa ningitha yalwe ya kale itaaya vulika wo kuJehova. Eli oku na oku ya kutha mo muusaaseri, ihe ye ite shi ningi.

Omugundjuka Samuel iha pitika oshinima kehe oshiwinayi shoka tashi ningwa petsalihangano shi mu keelele okulongela Jehova. Ihe molwashoka opu na aantu aashona ngaaka mboka ye hole Jehova lelalela, opwa piti ethimbo ele Jehova inaa popya nomuntu nando ogumwe. Sho Samuel a koko kashona, tashi landula otashi ningwa po:

Manga Samuel a lala metsalihangano, ewi otali mu pendutha. Ye ota yamukula: ‘Ongame nguka.’ Opo nduno ota thikama nota matukile kuEli nota ti: ‘Owi ithana ndje, ongame nguka.’

Ihe Eli ota yamukula: ‘Ngame inandi ku ithana; shuna mombete.’ Ano Samuel ota shuna mombete.

Oshikando oshitiyali gumwe oti ithana: ‘Samuel!’ Ano Samuel ota thikama nota matukile ishewe kuEli. ‘Owi ithana ndje, ongame nguka,’ ye ta ti. Ihe Eli ota yamukula: ‘Ngame inandi ku ithana, omumati gwandje. Inda owala u ka lale ishewe.’ Ano Samuel ota shuna mombete.

‘Samuel!’ ewi tali ithana oshikando oshititatu. Ano Samuel ota matukile kuEli. ‘Ongame nguka, oshoka ondi na uushili kutya oshikando shika owi ithana ndje,’ ye ta ti. Ngashingeyi Eli oku shi shi kutya oJehova ngoka ti ithana. Omolwashono ta ti kuSamuel: ‘Inda u ka lale ishewe, nuuna te ku ithana ishewe, ngoye ou na okutya: “Popya Jehova, oshoka omupiya gwoye otandi pulakene.”’

Shika osho Samuel ta ti uuna Jehova ti ithana ishewe. Jehova ota hokololele nduno Samuel kutya ye ota ka geela Eli noyanamati. Konima Hofni naPinehas otaa si pethimbo lyolugodhi lwawo nAafilisti, nuuna Eli tu uvu shoka sha ningwa po, ota gu ongali, othingo ye otayi teka nota si wo. Ano oohapu dhaJehova otadhi shilipalekwa.

Samuel okwa koko nota ningi omutokolihapu gwahugunina gwaIsrael. Sho a kulupa, aantu otaye mu pula: ‘Hogolola omukwaniilwa oku tu pangela.’ Samuel ina hala oku shi ninga, oshoka Jehova oye lela omukwaniilwa gwawo. Ihe Jehova ote mu lombwele a pulakene koshigwana.