NGOYE owu uva nale mbela okasino taka popi? ‘Aawe,’ ngoye osho to ti. ‘Iinamwenyo ihayi vulu okupopya.’ Ihe Ombimbeli otayi hokolola okasino hoka ka popi. Natu tale kutya shika ongiini sha ningwa.

Konyala Aaisrael oyi ilongekidha okuya moshilongo shaKanaan. Balak, omukwaniilwa gwaMoab, okwa tila Aaisrael. Ano ye ota tumu omulumentu omunandunge gwedhina Bileam a ka thinge Aaisrael. Balak otu uvaneke a pe Bileam iimaliwa oyindji, ano Bileam ota londo okasino ke nota yi kuBalak.

Jehova ina hala kutya Bileam a thinge oshigwana She. Ano ota tumu omuyengeli e na egongamwele ele a thikame mondjila a keelele Bileam. Bileam ita vulu okumona omuyengeli, ihe okasino ke otaka vulu. Ano okasino otaka kambadhala nopwaa na oluthuwo ka ze po pomuyengeli, nolwahugunina otaka lala mondjila. Bileam okwa geya noonkondo, nota dhenge okasino ke noshiti.

Opo tuu mpono Jehova otu uvitha Bileam nkene okasino ke taka popi naye. ‘Onde ku ningi shike sho to dhenge ndje?’ okasino taka pula.

‘Ngoye oto ningi ndje egoya,’ Bileam ta ti. ‘Andola ngame onda li ndi na egongamwele, ando onde ku dhipaga!’

‘Onde ku ninga ngaa nale ngawo?’ okasino taka pula.

‘Aawe,’ Bileam ta ti.

Opo nduno Jehova ota monitha Bileam omuyengeli e na egongamwele a thikama mondjila. Omuyengeli ota ti: ‘Omolwashike wa dhengele okasino koye? Ngame onde ya ndi ku keelele, oshoka ngoye ku na oku ka thinga Israel. Andola okasino koye ka ka pungulukile, andola ngame onde ku dhipaga, ihe andola ngame inandi ehameka okasino koye.’

Bileam ota ti: ‘Ngame onda yono. Kanda li nda tseya kutya ongoye wa thikama mondjila.’ Omuyengeli te etha Bileam a ye, Bileam nota yi kuBalak. Ye ota kambadhala natango okuthinga Israel, ihe pehala lyaashono Jehova ote mu lalekitha Israel nuuyamba lwiikando itatu.