TALA koongala noomandeli dha tiligana kondhimbo ndjika nenge koshiti shika. Oyo ondhimbo yaAaron. Oongala ndhino niiyimati oya mene owala muusiku wumwe kondhimbo yaAaron! Natu tale kutya omolwashike.

Pethimbo opo tuu mpoka Aaisrael oya kala ya tembauka nale uule wokathimbo mombuga. Aantu yamwe otaa dhiladhila kutya Moses ke na okukala omuwiliki, nenge kutya Aaron ke na okukala omusaaseri omukuluntu. Korah oye gumwe gwomwaamboka taa dhiladhila ngawo, nosho wo Datan, Abiram naapangeli 250 yoshigwana. Yo ayehe oye ya kuMoses noya ti: ‘Omolwashike wi itula po ngoye mwene oku tu pangela?’

Moses ota ti kuKorah naalanduli ye: ‘Ongula yanofu kutheni iitsininitho yeni nomu tule mo omatsinino muyo. Ileni nduno ketsalihangano lyaJehova. Tse otatu ka tala kutya Jehova ota hogolola lye.’

Esiku lya landula Korah naalanduli ye 250 otaye ya ketsalihangano. Yalwe oyendji otaye ya pamwe nayo okwaambidhidha aalumentu mbaka. Jehova okwa geya noonkondo. ‘Zeni mo moontanda dhaalumentu mbaka aawinayi,’ Moses ta ti. ‘Kamu na okuguma sha shawo.’ Aantu otaa pulakene, notaa zi mo moontanda dhaKorah, Datan naAbiram.

Opo nduno Moses ota ti: ‘Kwaashino ne otamu ka tseya kutya olye a hogololwa kuJehova. Evi otali ka makuka nokunina po aalumentu mbaka aawinayi.’

Mbala sho Moses ta hulitha okupopya, evi otali makuka. Ontanda yaKorah nomaliko ge naDatan naAbiram naayehe puyo oya gwile mo, nevi olye ya edhilile mo. Opo nduno aantu otayu uvu eigidho lyaamboka taa gwile moshilambo, taa igidha: ‘Matukeni! Evi mbela natse wo otali tu nina po!’

Korah naalanduli ye 250 oya thikama natango popepi netsalihangano. Ano Jehova ota tumu omulilo naayehe otaa lunguna po. Opo nduno Jehova ota lombwele omwanamati gwaAaron Eleasar a kuthe iitsininitho yaalumentu mboka ya sa noku yi ninga esiikilitho lya pepuka lyoaltari. Esiikilitho lyoaltari ndino oli na okukala elondodho lyAaisrael kutya hagumwe e na okulongela Jehova oye omusaaseri kakele kaAaron noyanamati.

Ihe Jehova okwa hala a holole sha yela kutya oyo Aaron noyanamati mboka a hogolola ya kale aasaaseri. Ano ye ota ti kuMoses: ‘Aapangeli yezimo kehe lyaIsrael naye ete ondhimbo. Kezimo lyaLevi ou na okweeta ondhimbo yaAaron. Tula ano oondhimbo adhihe ndhino metsalihangano komeho goshiketha shehangano. Ondhimbo yomulumentu ngoka ngame tandi mu hogolola oye omusaaseri otayi ka mena oongala.’

Sho Moses a yi a ka tale ongula ya landula, tala! oongala ndhika noomandeli dha tiligana odha mena kondhimbo yaAaron! Ou wete nee ngashingeyi kutya omolwashike Jehova a menitha oongala kondhimbo yaAaron?