Openi pwa za egulu nevi? Ongiini etango, omwedhi noonyothi, nosho wo iinima oyindji kevi, ya thikama po? Ombimbeli otayi gandja eyamukulo lyashili sho tayi ti kutya oya shitwa kuKalunga. Ano embo lyetu otali tameke nomahokololo gOmbimbeli kombinga ­yeshito.

Otatu hokololelwa kutya iishitwa yotango yaKalunga oya li aantu yopambepo mboka ye mu fa ye mwene. Yo oya li aayengeli. Ihe evi olya shitilwa aantu ngaashi tse. Ano Kalunga okwa shiti omuntu omulumentu nomukiintu Adam naEva nokwe ya tula moshikunino oshiwanawa. Ihe oya li inaaya vulika kuKalunga noya kanitha uuthemba okukala nomwenyo.

Okuza eshito lyaAdam sigo Eyelu enene, opwa piti oomvula 1 656 adhihe kumwe. Pethimbo ndika opwa kala aantu oyendji aawinayi. Megulu omwa li aantu yopambepo ihaaya monika, oyo Satana naayengeli ye aawinayi. Kevi okwa li Kain naantu yalwe oyendji aawinayi, mwa kwatelwa aalumentu yontumba aanankondo inaaya monika nale. Ihe okwa li wo aantu aawanawa kevi—Abel, Henok naNoa. MOshitopolwa SHOTANGO otatu ka lesha kombinga yaantu ayehe mbano niiningomwa mbino.