PONDJE yoshikunino shaEden, Adam naEva oya li ye na omaupyakadhi ogendji. Yo oya li ye na okulonga nuudhigu omolwiikulya yawo. Pehala lyomiti dhiiyimati iiwanawa, oya mono omakwega noondjoho odhindji dha mena momudhingoloko gwawo. Osho shoka sha ningwa po sho Adam naEva inaaya vulika kuKalunga noya hulitha po okukala ookuume Ke.

Ihe sha kwata miiti shi vule shika, Adam naEva oya tameke okusa. Dhimbulukwa, Kalunga okwe ya londodha kutya otaa ka sa shimpa ya li oshiyimati shomuti gwontumba. Ano esiku tuu ndyoka ya li kugwo, oya tameke okusa. Oya li ya nika uugoya ngiini okwaapulakena kuKalunga!

Aanona ayehe yaAdam naEva oya valwa konima sho Kalunga a tidha mo aakuluntu yawo moshikunino shaEden. Otashi ti kutya aanona oya li wo taa ka kulupa nokusa.

Andola Adam naEva oyo owala ya vulikile kuJehova, andola onkalamwenyo yawo noyaanona yawo oya ka kala nelago. Yo ayehe oya li taa vulu okukala sigo aluhe melago kombanda yevi. Hagumwe a li e na okukulupa, okweehama nokusa.

Kalunga okwa hala aantu ya kale nomwenyo sigo aluhe melago, Oye notu uvaneke kutya esiku limwe yo osho taa ka kala. Evi alihe halyo alike tali ka kala ewanawa, ihe aantu ayehe otaa ka kala ye na uukolele. Na kehe gumwe kombanda yevi ota ka kala kuumethana omwaanawa nakehe gumwe i ili nosho wo naKalunga.

Ihe Eva ina kala we kuume kaKalunga. Ano sho ye a vala aanona ye, kasha li nando oshipu kuye. Osha li uuwehame. Okwaavulika kuJehova okwe mu etele lela uuthigwa owindji, hasho mbela?

Adam naEva oya li ye na aamati naakadhona oyendji. Sho okamati kawo kotango ka valwa, oye ka luku Kain. Okamati kawo okatiyali oye ka luku Abel. Oshike she ya ningilwa? Owe shi tseya?