NGOYE oto vulu mbela okumona onyothi ndjoka tayi adhima hwiya taku ulikwa kugumwe gwomaalumentu mbaka? Onyothi oya holoka po sho yo ya thigi po Jerusalem. Aalumentu mbaka otaa zi kUuzilo, nohaa konakona oonyothi. Yo oyi itaala kutya onyothi ndjika ompe otayi ya fala komuntu a simana.

Sho aalumentu ye ya puJerusalem, yo oya pula: ‘Okanona hoka taka ka ninga omukwaniilwa gwAajuda oke li peni?’ “Aajuda” olyo edhina limwe lyAaisrael. ‘Tse otwa li mUuzilo sho twa mono onyothi yokanona oshikando shotango,’ aalumentu osho ya ti, ‘notwe ya tu ka galikane.’

Sho Herodes, ngoka omukwaniilwa muJerusalem, tu uvu kombinga yaashino, ye okwa li u uvite nayi noonkondo. Ye ka li a hala omukwaniilwa gulwe a kuthe po ehala lye. Ano Herodes okwi ithana aasaaseri aakuluntu nokwa pula: ‘Omukwaniilwa omuuvanekwa ota ka valelwa peni?’ Yo oya yamukula: ‘Ombimbeli otayi ti omuBetlehem.’

Ano Herodes okwi ithana aalumentu yokUuzilo nokwa ti: ‘Ka kongeni okanona okashona. Uuna mwe ka mono, tseyithilii ndje. Ngame onda hala wo oku ke ka galikana.’ Ihe paushili wo wene Herodes okwa hala okanona e ka mone opo e ka dhipage!

Opo nduno onyothi otayi inyenge komeho yaalumentu yu uka kuBetlehem, notayi ka thikama kombanda yehala mpoka okanona ke li. Sho aalumentu taa yi megumbo, otaa mono Maria naJesus omushona. Yo otaa kutha mo omagano notaye ga pe Jesus. Ihe konima Jehova ota londodha aalumentu mondjodhi kaaya shune we kuHerodes. Ano yo otaa shuna kevi lyaandjawo nondjila yilwe.

Sho Herodes tu uvu kutya aalumentu yokUuzilo oya shuna ishewe kegumbo, ye ota geye noonkondo. Ano ye ota gandja elombwelo kutya aamati ayehe kuBetlehem mboka ye li kohi yuukokele woomvula mbali ye na okudhipagwa. Ihe Jehova ota londodha Josef kuyele mondjodhi, Josef nota tembukile muEgipiti nuukwanegumbo we. Konima sho Josef tu uvu kutya Herodes okwa sa, ye ota kutha Maria naJesus ya shune kegumbo kuNasaret. Oko nkoka Jesus a putukile.

Oto dhiladhila mbela kutya olye ngoka a adhimitha onyothi ndjiyaka ompe? Dhimbulukwa, aalumentu oya yi tango kuJerusalem sho yo ya mono onyothi. Satana Ondiaboli okwa li a hala a dhipage Omwana gwaKalunga, nokwa tseya kutya Omukwaniilwa Herodes gwaJerusalem ota ka kambadhala oku mu dhipaga. Ano Satana oye ngoka a li a adhimitha onyothi ndjiyaka.