OOMVULA odhindji odha piti po. Oyanamati yaNoa oya li ye na aanona oyendji. Naanona yawo oya koko nayo wo oya li ye na aanona. Mbala okwa li ku na aantu oyendji kombanda yevi.

Gumwe gwomaantu mbaka okwa li omutekulululwa gwaNoa gwedhina Nimrod. Ye okwa li omulumentu omwiinayi ngoka a yewe nokwa dhipaga iinamwenyo nosho wo aantu. Nimrod okwi iningi wo ye mwene omukwaniilwa okupangela aantu yalwe. Kalunga ka li e hole Nimrod.

Aantu ayehe pethimbo ndyono oya li haa popi elaka limwe. Nimrod okwa li a hala e ya gongele ayehe pamwe opo a vule oku ya pangela. Ano owa tseya ngaa shoka a ningi po? Ye okwa lombwele aantu ya tunge oshilando noshungo onene musho. Ou ya wete mefano nkene taa ningi oondhopi.

Jehova Kalunga ka li nando a hokwa etungo ndika. Kalunga okwa li a hala aantu ye endaende noya kale kevi alihe. Ihe aantu oya ti: ‘Ileni! Tu tungeni oshilando noshungo onde ngaaka ndjoka ondungu yayo tayi ka tsa megulu. Nopo nduno tatu ka kala aanamadhina!’ Aantu oya li ya hala ya konge esimano lyawo yene, halyaKalunga.

Ano Kalunga okwe ethitha po aantu iilonga yokutunga oshungo. Owa tseya mbela nkene e shi ningi? Omokuningitha mbalambala aantu ya popye omalaka ga yoolokathana, pehala owala lyalimwe. Aatungi kaya li we yu uvitathane omukwawo nomukwawo. Shika osho molwashono oshilando shawo shi ithanwa Babel, nenge Babilon, tashi ti “Evundakano.”

Ngashingeyi aantu oya tameke okutembuka muBabel. Uungundu waantu mboka haa popi elaka limwe oya yi ya ka kale pamwe moshitopolwa shimwe shevi.