LIMWE lyomomahala moka aantu ya yi ya ka kale konima yEyelu olya li lyi ithanwa Ur. Olya ningi oshilando sha simana shi na omagumbo omawanawa musho. Ihe aantu mono oya li haa galikana iikalunga. Shika osho wo ya li ya ningi muBabel. Aantu yomuUr naBabel kaya li nando ngaashi Noa nomwanamati Sem, mboka ya li ya tsikile nokulongela Jehova.

Lwahugunina, oomvula 350 konima yeyelu, Noa omudhiginini okwa si. Osha li owala konima yoomvula mbali sho omulumentu ngoka u wete mefano ndika a valwa. Ye okwa li omuntu i ili lela kuKalunga. Edhina lye olya li Abraham. Ye okwa kala nuukwanegumbo we moshilando shaUr.

Esiku limwe Jehova okwa lombwele Abraham: ‘Thiga po Ur naakweni, na inda koshilongo shoka tandi ke ku ulukila.’ Mbela Abraham okwa vulika ngaa kuKalunga nokuthiga po omauwanawa agehe gomuUr? Eeno, ye osho a ningi. Nosha li molwashoka Abraham aluhe okwa li a vulika kuKalunga ye okwa tseyika ngashingeyi oye kuume kaKalunga.

Yamwe yomaakwanegumbo lyaAbraham oya yi pamwe naye sho a thigi po Ur, muyo omwa li he Tarah nomutekulu Lot. Nopwaa na omalimbililo, nomukiintu gwaAbraham Sara okwa yi wo pamwe nayo. Mepitathimbo yo ayehe oye ya pehala lyi ithanwa Haran, moka Tarah a sile. Oya li kokule naUr.

Konima yethimbo Abraham nuukwanegumbo we oya thigi po Haran noya yi koshilongo shi ithanwa Kanaan. Hoka Jehova okwa ti: ‘Shika osho oshilongo tandi ke shi pa aanona yoye.’ Abraham okwa kala muKanaan nokwa kala metsali.

Kalunga okwa tameke okukwatha Abraham opo a ninge uusita uunene woonzi niinamwenyo yilwe naapika omathele. Ihe ye naSara kaya li ye na aanona yawo yene.

Sho Abraham a li e na oomvula 99, Jehova okwa ti: ‘Otandi ku uvanekele kutya ngoye oto ka ninga he yaantu yiigwana oyindji.’ Ihe ongiini shika tashi vulu okuningwa, molwashoka Abraham naSara oya li pethimbo ndyono ya kulupa noonkondo okumona aanona?