TALA! Osikepa oyi li muudhigu! Otayi tekauka! Ou wete aantu mboka taa nukile momeya? Yamwe oye li nale komunkulo. OPaulus mbela ngwiiyaka? Natu tale kutya oshike she mu ningilwa.

Dhimbulukwa kutya Paulus okwa li uule woomvula mbali onkwatwa muKesarea. Opo nduno ye noonkwatwa dhilwe otaa londekwa mosikepa notaa yi kuRoma. Sho yo taa sayila taa piti popepi nontuntu yaKreta, oshikungulu oshidhigu unene otashi ya adha. Ombepo otayi pepe noonkondo naalumentu itaa vulu okuhinga osikepa. Noitaa vulu okumona etango omutenya, nuusiku yo itaa vulu okumona oonyothi. Lwahugunina, konima yomasiku ogendji, aantu mboka ye li mosikepa oya kanitha etegameno alihe lyokuhupithwa.

Opo nduno Paulus ota thikama nota ti: ‘Nando gumwe gwomune ta ka sa; osikepa oyo owala tayi ka kana. Oshoka uusiku wa piti omuyengeli gwaKalunga okwi ile kungame nokwa ti: “Paulus, ino kala wa tila! Ngoye ou na okuthikama koshipala shomupangeli gwaRoma Omukeesali. Kalunga nota ka hupitha ayehe ye li mosikepa.” ’

Konyala mokati kuusiku esiku eti-14 lyoshikungulu aanasikepa otaa mono kutya omeya gefuta otaga shuna pevi! Mokutila kutya sikulimwe yo molwomilema otaye ki ipuma momamanya, yo otaa kulukitha mo omakwatitho. Ongula ya landula yo oye wete oshikololo. Yo otaa tokola okuya nosikepa yu ukilila sigo okomunkulo.

Sho yo ye ya popepi nomunkulo, osikepa otayi tsu moshituntu shehekevi notayi dhama. Opo nduno oma-kuthikuthi otagi idhenge muyo nosikepa otayi tameke okutekauka. Omukuluntu gwetanga lyaakwiita ota popi ta ti: ‘Amuhe mboka tamu vulu okuyoga, one mu nukila tango mefuta ne mu yoge mu uka komunkulo. Oshihupe omu na okunukila mo konima yawo nomu ikwatelele kiipambu yosikepa mwa dhiginina.’ Nosho shoka yo taa ningi. Komukalo ngoka aantu ayehe 276 mboka ya li mosikepa otaa thiki komunkulo ya gamenwa, ngaashi naanaa omuyengeli u uvaneka.

Ontuntu ohayi ithanwa Malta. Aantu oyo aanambili noonkondo, notaa sile oshimpwiyu mboka ya li mosikepa. Sho ombepo ya kala nawa, Paulus ota tulwa mosikepa yilwe nota falwa kuRoma.