OYE omuyapostoli Petrus ngoka a thikama mpaka, nayamwe yomookuume ke oya thikama konima ye. Ihe omolwashike omulumentu ta tsile Petrus oongolo? Mbela ye oku na oku shi ninga? Owa tseya kutya oye lye?

Omulumentu oye Kornelius. Oye Omuroma omukuluntu gwetanga lyaakwiita. Kornelius ina tseya Petrus, ihe ye okwa lombwelwa e mu hiye kegumbo lye. Natu tale nkene shika sha ningwa.

Aalanduli yaJesus yotango oya li Aajuda, ihe Kornelius ke shi Omujuda. Ihe ye oku hole Kalunga, oha galikana kuye noha ningile aantu iinima oyindji iiwanawa. Omutenya gumwe omuyengeli ote mu holokele nota ti: ‘Kalunga oku ku hole, note ku uva omagalikano goye. Tuma aalumentu yamwe komulumentu gwontumba gwedhina Petrus. Ye okwa kala muJoppe megumbo lyaSimon, ngoka a kala mooha dhefuta.’

Ano Kornelius ota tumu mbala aalumentu ya ka konge Petrus. Esiku lya landula, sho aalumentu taye ya popepi naJoppe, Petrus oku li kombanda yongulu yegumbo lyaSimon. Hoka Kalunga ota dhiladhilitha Petrus opo a mone onguwo onene tayi kuluka megulu. Monguwo omu na iinamwenyo yomaludhi gi ili nogi ili. Pampango yaKalunga iinamwenyo mbika oya li inaayi yogoka nokuliwa, ihe nando ongeyi ewi otali ti: ‘Thikama, Petrus. Dhipaga ngoye u lye.’

‘Aawe!’ Petrus ta yamukula. ‘Ngame inandi lya nando nale sha inaashi yogoka.’ Ihe ewi otali ti kuPetrus: ‘Etha po okwiithana shoka Kalunga ta ti ngashingeyi osha yogoka, inaashi yogoka.’ Otashi ningwa iikando itatu. Manga Petrus a kuminwa shoka tashi ti, aalumentu mboka Kornelius a tumu otaye ya pegumbo notaa pula Petrus.

Petrus ota londoloka nota ti: ‘Ongame omulumentu ngoka tamu kongo. Omolwashike mwe ya po?’ Sho aalumentu taa yelitha kutya omuyengeli oye a lombwele Kornelius a hiye Petrus kegumbo lye, Petrus ota zimine a ye pamwe nayo. Esiku lya landula Petrus nookuume ke otaa yi ya ka talele po Kornelius muKesarea.

Kornelius okwa gongela aakwawo nookuume ke yopothingo. Sho Petrus te ya, Kornelius ota yi e ke mu tsakaneke. Ye oti ihata pevi nota tsu oongolo koompadhi dhaPetrus, ngaashi u wete mpaka. Ihe Petrus ota ti: ‘Thikama po; nangame wo omuntu owala.’ Eeno, Ombimbeli otayi shi ulike kutya osha puka okutsila omuntu oongolo noku mu galikana. Tse otu na owala okugalikana Jehova.

Ngashingeyi Petrus otu uvithile mboka ya gongala. ‘Ngame ondi wete kutya Kalunga oha taamba ko aantu ayehe mboka ya hala oku mu longela,’ Petrus ta ti. Manga ta popi, Kalunga ota tumu ombepo ye ondjapuki, naantu otaa tameke okupopya momalaka gi ili nogi ili. Otashi kumitha aalongwa Aajuda mboka ye ya naPetrus, oshoka yo oya dhiladhila kutya Kalunga oha sile owala ohenda Aajuda. Ano otashi ya longo kutya Kalunga iha tala ko aantu yomuhoko gumwe oyo aawanawa nenge ya simana ye vule aantu yomuhoko gulwe. Osho sha oshiwanawa shoka tse atuheni tatu vulu okudhimbulukwa, hasho mbela?