OWA tseya kutya omukiintu ngoka omwaanawa te ya kuDavid oye lye? Edhina lye oAbigail. Ye omunandunge, nota keelele opo David kaa ninge iinima iiwinayi. Ihe natu tale tango shoka sha ningilwa David pokati mpono.

Konima sho David a yi Saul ontuku, ye ota holama molumbogo. Aamwayina noshihupe shuukwanezimo we otaye ya wo ya kale moka. Otapu ya konyala aalumentu 400 ayehe kumwe, David nota ningi omuwiliki gwawo. David ota yi nduno komukwaniilwa gwaMoab nota ti: ‘Alikana tate nameme naya kale pungoye sigo ngame tandi mono shoka tandi ningilwa.’ Konima David naalumentu ye otaya tameke okuholama miikulundundu.

Konima yaashika David ota tsakaneke Abigail. Omulumentu gwe Nabal omunahambo omuyamba. Ye oku na oonzi 3 000 niikombo 1 000. Nabal oye omukwanyanya. Ihe omukiintu gwe Abigail omwaanawa noonkondo. Ye oku shi wo okulonga shoka shu uka. Nokuli oshikando shimwe ye ota hupitha uukwanegumbo we. Natu tale kutya ongiini.

David naalumentu ye oya ningile nawa Nabal. Yo oye mu kwathele okugamena oonzi dhe. Esiku limwe David ota tumu yamwe yomaalumentu ye okupula esilohenda kuNabal. Aalumentu yaDavid otaye ya kuNabal omanga ye naakwathi ye taa kulula ko omafufu goonzi. Olyo esiku lyoshituthi, Nabal noku na iinima oyindji iitoye yokuliwa. Ano aalumentu yaDavid otaa ti: ‘Tse otwe ku ningile nawa. Tse inatu yaka po oonzi dhoye, ihe otwe ku kwathele oku dhi tonatela. Alikana tu pa ngashingeyi iikulya.’

‘Ngame itandi gandja iikulya yandje kaalumentu ngaashi ne,’ Nabal ta ti. Ye ota longitha elaka ewinayi notu ula David iinima iiwinayi. Sho aalumentu taa galukile kuDavid notaye mu hokololele kombinga yaashono, David ota geyelele. ‘Ihomatekeni omagongamwele geni!’ ye ta lombwele aalumentu ye. Notaa yi ya ka dhipage Nabal naalumentu ye.

Gumwe gwomaalumentu yaNabal ngoka u uvu iitya yuuwinayi mbyoka Nabal a popi, ota hokololele Abigail shoka sha ningwa po. Abigail ota longekidha mbala iikulya. Ote yi londeke kokasino nota yi. Sho ye ta tsakaneke David, ye ota londoloka ko kokasino ke, ota tsu oongolo nota ti: ‘Alikana tatekulu, ino piyaganekwa komulumentu gwandje Nabal. Ye egoya noha ningi iinima yuugoya. Omagano ogo ngaka. Alikana ga taamba, nou tu dhimine po kwaashono sha ningwa po.’

‘Ngoye omukiintu omunandunge,’ David ta yamukula. ‘Ngoye owa keelele ndje ndaa dhipage Nabal ndi mu shunithile uuwinayi we. Inda ngashingeyi kegumbo nombili.’ Konima, sho Nabal a si, Abigail ota ningi gumwe gwomaakiintu yaDavid.