KONIMA yoomvula dhimwe manga Esra inaa ya kuJerusalem, Mordokai naEster oya li Aaisrael ya simanenena muukwaniilwa waPersia. Ester oye omukwaniilwakiintu, nantsezi ye Mordokai okwa simana kwaayehe kakele komukwaniilwa. Natu tale nkene sha ningwa.

Aakuluntu yaEster oya si manga ye a li omushona noonkondo, ano Mordokai oye e mu tekula. Ahasveros, omukwaniilwa gwaPersia, oku na uuwa moshilando shaSusa, Mordokai noye gumwe gwomaapiya ye. Esiku limwe Vasti, omukiintu gwomukaniilwa, ina vulika komukwaniilwa, oye nota hogolola ano omukiintu gumwe omupe okukala oye omukwaniilwakiintu gwe. Owa tseya kutya ye ota hogolola lye? Eeno, omugundjuka omwaanawa Ester.

Ou wete omulumentu nguno omunuuntsa ngoka aantu taye mu isizimikile? Oye Haman. Oye omulumentu a simana noonkondo muPersia. Haman okwa hala Mordokai, ngoka ngoye to vulu okumona a kuutumba mpeyaka, naye wo e mu isizimikile. Ihe Mordokai ota tindi. Ye ota dhiladhila kutya osha puka okwiisizimikila omulumentu omwiinayi ngawo. Otashi geyitha Haman noonkondo. Ano ye ota ningi tashi landula.

Haman ota hokololele omukwaniilwa iifundja kombinga yAaisrael. ‘Yo oyo aantu aawinayi mboka itaa vulika koompango dhoye,’ ye ta ti. ‘Yo oye na okudhipagwa.’ Ahasveros ke shi shi kutya omukiintu gwe Ester Omwiisrael. Ano ye ota pulakene kuHaman nota totitha po ompango kutya Aaisrael ayehe esiku lyontumba oye na okudhipagwa.

Sho Mordokai tu uvu kombinga yompango ndjika, ye ota nika uuthigwa noonkondo. Ye ota tumine etumwalaka kuEster: ‘Ngoye ou na okuhokololela omukwaniilwa nou mu galikane e tu hupithe.’ MuPersia otashi tsu ondumbo nompango okutalela po omukwaniilwa ngele ngoye ino hiywa. Ihe Ester ota yi inaa hiywa. Omukwaniilwa ota gandja onkwaniilwandhimbo ye yoshingoli kuye, shoka tashi ti kutya ye ke na okudhipagwa. Ester ota hiya omukwaniilwa naHaman koshitelekela oshinene. Hoka omukwaniilwa ota pula Ester esilohenda lini po ta vulu oku mu ningila. Ester ota ti kuye kutya ye ote ke shi mu lombwela ngele ye naHaman esiku tali landula taye ya ishewe koshitelekela.

Poshitelekela shoka Ester ota lombwele omukwaniilwa: ‘Ngame noshigwana shandje otatu ka dhipagwa.’ Omukwaniilwa ota geye. ‘Olye ta wapa okuninga oshinima sha tya ngawo?’ ye ta pula.

‘Omulumentu omutondi oye Haman nguno omwiinayi!’ Ester ta ti. Ngashingeyi omukwaniilwa okwa geya shili. Ye ota ti kutya Haman oku na okudhipagwa. Opo nduno omukwaniilwa ota tula Mordokai pondondo ya simana kakele ke mwene. Mordokai ota si nduno oshimpwiyu opo pu ningwe ompango ompe ndjoka tayi pitika Aaisrael ya kondjele oomwenyo dhawo mesiku ndyoka yo ye na okudhipagwa. Molwashoka Mordokai ngashingeyi omulumentu a simana ngawo, aantu oyendji otaa kwathele Aaisrael, notaa hupithwa kaatondi yawo.