TALA owala nkene mpaka tapu longwa. Aaisrael oyi ipyakidhila okutunga omankolokuma gaJerusalem. Sho Omukwaniilwa Nebukadnesar a hanagula po Jerusalem oomvula 152 dha piti po, ye okwa teyagula po omankolokuma nokwa fike po omiyelo dhoshilando. Aaisrael inaa tungulula omankolokuma mbala sho yo ya galuka okuza muBabilon.

Ngoye oto dhiladhila kutya aantu oya li ye shi uvitile ngiini okukala oomvula adhihe ndhino yaa na omankolokuma ga kundukidha oshilando shawo? Yo kaya li ye uvite ya gamenwa. Aatondi yawo oya li taa vulu oku ya ponokela nuupu. Ihe lwahugunina omulumentu nguka Nehemia ota kwatha oshigwana ngashingeyi okutungulula omankolokuma. Owa tseya kutya Nehemia oye lye?

Nehemia oye Omwiisrael ngoka ta zi koshilando shaSusa hoka kwa kala Mordokai naEster. Nehemia okwa longo muuwa womukwaniilwa, ano ye okwa li ngiika kuume omwaanawa gwaMordokai nOmukwaniilwakiintu Ester. Ihe Ombimbeli itayi ti kutya Nehemia okwa longelele omulumentu gwaEster, Omukwaniilwa Ahasveros. Ye okwa longelele Omukwaniilwa Artahsasta, omukwaniilwa ngoka a landula ko.

Dhimbulukwa kutya Artahsasta oye omukwaniilwa omwaanawa ngoka a gandja iimaliwa ayihe mbiyaka kuEsra oku yi fala kuJerusalem yi ka opalekithe otempeli yaJehova. Ihe Esra ye ina tungulula omankolokuma omatekipo goshilando. Natu tale nkene she ende opo Nehemia a longe iilonga mbika.

Oomvula 13 odha piti po okuza sho Artahsasta a gandja iimaliwa kuEsra okwoopaleka otempeli. Ngashingeyi Nehemia oye omupindi omukuluntu gwOmukwaniilwa Artahsasta. Otashi ti kutya ye oha pindi omaviinu gomukwaniilwa noha si oshimpwiyu kutya gumwe kaa kambadhale a tulile mo omukwaniilwa uuzigo. Oyo iilonga ya simana noonkondo.

Esiku limwe omumwayina gwaNehemia, Hanani, naalumentu yalwe yokoshilongo shaIsrael otaye ya okutalela po Nehemia. Yo otaye mu hokololele kombinga yomaupyakadhi gAaisrael, nonkene omankolokuma gaJerusalem ga tekauka natango. Otashi yematitha Nehemia noonkondo, nota galikana kuJehova molwasho.

Esiku limwe omukwaniilwa ota ndhindhilike kutya Nehemia okwa yemata, nota pula: ‘Omolwashike to monika wa yemata ngawo?’ Nehemia ota ti kuye kutya osho molwashoka Jerusalem shi li monkalo ombwinayi ngawo nomankolokuma ga tekauka. ‘Owa hala ndi ku ningile shike?’ omukwaniilwa ta pula.

‘Pitika ndje ndi ye kuJerusalem,’ Nehemia ta ti, ‘opo ngame ndi vule okutungulula omankolokuma.’ Omukwaniilwa Artahsasta omwaanawa noonkondo. Ye ota ti kutya Nehemia ota vulu okuya, note mu kwathele okumona iipilangi yokutungitha. Konima yokuthika kwaNehemia muJerusalem, ye ota hokololele oshigwana kombinga yomadhiladhilo ge. Yo oya panda ondunge ndjika, notaa ti: ‘Natu tamekeni okutunga.’

Sho aatondi yAaisrael taa mono enkolokuma tali yi pombanda, yo otaa ti: ‘Tse otatu ke ya dhipaga nokukankameka iilonga yawo yetungo.’ Ihe Nehemia otu uvu kombinga yasho, nota pe aalongi omagongamwele nomagonga. Nota ti: ‘Inamu tila aatondi yetu. Kondjeleni aamwanyoko, aana yeni, aakiintu yeni nomagumbo geni.’

Aantu omapenda noonkondo. Yo oya longekidha aluhe iikondjitho yawo omutenya nuusiku notaa tsikile nokutunga. Ano omankolokuma oga pu owala meni lyomasiku 52. Ngashingeyi aantu otaa vulu okuuva ya gamenwa meni lyoshilando. Nehemia naEsra otaa longo oshigwana oompango dhaKalunga, naantu oyu uvite elago.

Ihe iinima kayi li natango ngaashi sha li manga Aaisrael ya li inaaya falwa kuBabilon oyo oonkwatwa. Omukwaniilwa gwaPersia oye ta pangele oshigwana noshi na oku mu longela. Ihe Jehova oku uvaneke kutya ye ota ka tuma omukwaniilwa omupe, nonokutya omukwaniilwa nguka ote ke etela oshigwana ombili. Omukwaniilwa nguno oye lye? Ongiini ye te ke eta ombili kombanda yevi? Manga aantu inaaya tseya oshindji kombinga yaashika, otapu piti konyala oomvula 450. Opo nduno okahanona ka simana kwaa na we oka valwa. Ihe olyo ehokololo lilwe.