TALA komiti ndhoka ominene, oongala oombwanawa noondundu oondeendeka. Mpaka opuuwanawa ndishi? Tala nkene okapundja taka li moshikaha shomumati. Nou tale koonkoshi nuukambe wa thikama hwiya konima yadho. Ngoye ito ka hala ando mbela okukala megumbo li li mehala lya fa ndika?

Kalunga okwa hala ngoye u kale nomwenyo sigo aluhe moparadisa kombanda yevi. Nokwa hala ngoye waa hepekwe komikithi nokuuwehame mbyoka aantu ye na nena. Kwaamboka taa ka kala moparadisa ompe, Ombimbeli otayi uvaneke: ‘Kalunga ota ka kala pamwe nayo. Itamu ka kala we eso nenge okulila nenge uuwehame. Iinima iikulu oya hulu po.’

Jesus ota ka sa oshimpwiyu opo elunduluko ndika ekumithi li ningwe. Owa tseya kutya uunake? Eeno, okonima ngele ye o opaleke evi kuuwinayi auhe naantu aawinayi. Dhimbulukwa kutya Jesus okwa aludhile aantu komikithi dhi ili nodhi ili sho ye a li kombanda yevi, nonokuli ye okwa yumudhile aasi. Jesus okwe shi ningi okuulika shoka ye ta ka ninga kombanda yevi alihe uuna ye a ningi Omukwaniilwa gwUukwaniilwa waKalunga.

Dhiladhila owala nkene tashi ka kala oshikumithi moparadisa ompe kombanda yevi! Jesus ota ka pangela okuza megulu pamwe naamboka ye ta hogolola. Aapangeli mbaka otaa ka tonatela ayehe kombanda yevi notaa ka sa oshimpwiyu opo yo ya kale nelago. Natu tale shoka tse tu na okuninga opo tu kale nuushili kutya Kalunga ote ke tu pa omwenyo gwaaluhe moparadisa ye ompe.