Ontopolwa 127

A fumvikwa mEtitano—mOsoondaha ombila oyi li owala

NGASHINGEYI olyo Etitano komatango, nEsabati 15 Nisan otali ka tameka sho etango tali ningine. Omudhimba gwaJesus ogwe endjelela koshiti, ihe aayugi yaali pooha dhe oye na omwenyo natango. Etitano omutenya ohali ithanwa Esiku lyElongekidho oshoka ndika olyo ethimbo uuna aantu taya longekidha iikulya nokutsakanitha iilonga kehe yilwe mbyoka itaayi vulu okutegelela sigo okonima yEsabati.

Esabati ndyoka tali ka tameka nziya kali shi owala Esabati lyopandjigilile (esiku etiheyali koshiwike) ihe olyo wo Esabati “enene.” Olyi ithanwa ngaaka molwaashoka 15 Nisan, ndyoka olyo esiku lyotango lyomomasiku gaheyali gOshituthi shIikwiila yaa na Efulika (nohali kala aluhe Esabati, kashi na mbudhi kutya oli li ko mesiku lini lyoshiwike), ohali ningwa mesiku olyo tuu ndyoka lyEsabati lyopandjigilile.

PaMpango yaKalunga, omidhimba kadhi na okulala uusiku auhe komuti dhe endjelela. Onkee ano Aajuda taya pula Pilatus ngele mboka taya dhipagwa itaya vulu okuteywa omagulu opo ya se mbala. Ano aakwiita otaya teyagula omagulu gaayugi yaali. Ihe molwashoka osha yela kutya Jesus okwa sa nale, omagulu ge itaga teyagulwa. Shika otashi gwanitha enyolo: “Ina nyanyagulwa nando esipa lye limwe.”

Ihe opo ku shilipalekwe kutya Jesus okwa sa shili gumwe gwomaakwiita ote mu tsu negonga molupati. Egonga otali ulula pomutima gwe, nanziya otamu zi ombinzi nosho wo omeya. Omuyapostoli Johannes ngoka e shi mono nomeho ge, ota hokolola kutya shika otashi gwanitha enyolo lilwe tali ti: “Otaa ka tala kunguka ye mu ulula.”

Josef a za koshilando shaArimatia, oshilyo sha simana shOsanhedrin, naye wo opo e li pedhipago. Okwa tindi okukutha ombinga mehogololo lyaahe li pauyuuki, ndyoka tali popile etokolo lyompangu yopombanda shi na ko nasha naJesus. Muushili wo wene, Josef oye omulongwa gwaJesus, nonando okwa kala a tila oku shi holola. Ihe ngashingeyi oku na uulaadhi nota yi kuPilatus oku ke mu pula omudhimba gwaJesus. Pilatus oti ithanitha omukuluntu gwaakwiita nokonima sho omukuluntu e shi koleke kutya Jesus okwa sa, Pilatus okwa gandja elombwelo omudhimba gu gandjwe.

Josef ota kutha omudhimba e te gu dhingile momalapi ga yela goliina omawanawa moku gu longekidhila efumviko. Ota kwathelwa kuNikodemus, oshilyo shilwe shOsanhedrin. Nikodemus naye wo ina hempulula eitaalo lye muJesus molwaashoka okwa li a tila okukanitha ondondo ye. Ihe ngashingeyi ote eta omugwayo gwomirha naaloe yondilo gwookilograma 33 lwaampono. Omudhimba gwaJesus otagu dhiingilwa momalapi moka mu na iizimba mbika, ngaashi naanaa shi li omukalondjigilile gwAajuda okulongekidhila omidhimba efumviko.

Opo nduno omudhimba otagu langekwa mombila ompe yaJosef ndjoka ya hokwa memanya meyana lyopopepi. Lwahugunina, emanya enene otali galangatithilwa posheelo shombila. Elongekidho lyomudhimba otali ningwa neendelelo enene opo efumviko li adhike lya pwa kEsabati. Onkee ano Maria Magdalena naMaria yina yaJakob omushona mboka tashi vulika ya kwathele melongekidho, taye endelele ya ye kegumbo oku ka longekidha natango iizimba yilwe nosho wo omigwayo dha nika nawa. Oye na edhiladhilo oku ka ninga nawa natango omudhimba gwaJesus konima yEsabati, opo gu kale gu li nawa ethimbo ele.

Esiku lya landula, olyo Olyomakaya (Esabati), aasaseri aakuluntu nAafarisayi otaya yi kuPilatus e taya ti: “Omuwa, otwa dhimbulukwa, omukotokeli ngwiyaka manga kwa li e na omwenyo, okwa tile: Nge pwa piti omasiku gatatu otandi yumuka. Lombwela ano, ombila yi langelwe shili sigo esiku etitatu, aalongwa ye yaa ye noyaaye mu yake mo noyaa lombwele aantu: Okwa yumuka kuusi; omapukitho gahugunina nosho taga ningi omawinayi ge vule gotango.”

“Aalangeli oyo mboka,” Pilatus ta yamukula. “Indeni ihe, ne mu langele nawa ngaashi mu shi shi.” Onkee ano otaya yi notaya langele ombila mokweedhilitha po emanya e taye li hotele po noshihotekitho e taa langeke po aakwiita Aaroma ye li aalangeli.

Ongula onene yOsoondaha Maria Magdalena naMaria yina yaJakob, pamwe naSalome, Johanna naakiintu yalwe, otaye eta iizimba kombila okugwayeka omudhimba gwaJesus. Mondjila otaya lombwelathana: “Olye te tu kandulile po emanya mosheelo shombila?” Ihe sho taya thiki mpoka, otaya mono kutya opwa ningwa ekakamo lyevi nomuyengeli gwaJehova okwa kandula po emanya. Aalangeli kaye po nombila oyi li owala! Mateus 27:57–28:2; Markus 15:42–16:4; Lukas 23:50–24:3, 10; Johannes 19:14, Johannes 19:31-20:1; 12:42; Levitikus 23:5-7; Deuteronomium 21:22, 23; Epsalmi 34:21; Sakaria 12:10.

▪ Omolwashike Etitano hali ithanwa Esiku lyElongekidho, nEsabati “enene” olyo shike?

▪ Omanyolo geni taga gwanithwa shi na ko nasha nomudhimba gwaJesus?

▪ Josef naNikodemus oye na mo ombinga yashike mefumviko lyaJesus noye na ekwatathano lini naJesus?

▪ Aasaseri otayi indile Pilatus a ninge shike note ya yamukula ngiini?

▪ Oshike tashi ningwa po ongula onene yOsoondaha?