Ontopolwa 97

Aalongi meyana lyomiviinu

“AATANGO oyendji otaa ningi aahugunini,” Jesus opo owala e shi popi, “naahugunini oyendji otaa ningi aatango.” Ngashingeyi ote shi yelitha mokuhokolola ehokololo. Ota tameke ta ti: “[Uukwaniilwa wegulu wa] fa omusamane [mwene gwegumbo], a meneka, a ka kongele eyana lye lyomiviinu aalongi.”—Yelekanitha NW.

Jesus ota tsikile ta ti: “Sho [mwene gwegumbo u] uvanene naalongi ondenari yimwe esiku limwe, okwe ya tumu keyana lye lyomiviinu. Oye nokwa piti mo potundi ontitatu, okwa adha ko ooyakwawo ya thikama owala pomalandelo: Nokwa ti kuyo: Nane wo indeni keyana lyomiviinu, notandi mú pe shono she mú yeleka. Oyo noya yi ko. Oye nokwa piti mo ishewe potundi ontihamano nontimugoyi nokwa ningi ngashika a ningile. Nosho a piti mo potundi ontimulongo noyotango, okwa adhele ko ooyakwawo ya thikama e ta ti kuyo: Oshike mwa thikama mpaka owala omutenya aguhe? Oyo ya ti kuye: Oshoka kaku na ngoka e tu hiya. Oye nokwa ti kuyo: Nane wo indeni keyana lyandje lyomiviinu.”

Mwene gwegumbo, nenge mwene gweyana lyomiviinu, oJehova Kalunga, neyana olyo oshigwana shaIsrael. Aalongi meyana lyomiviinu oyo aantu mboka ya taambwa mehangano lyOmpango; oyo naanaa Aajuda mboka ya li po pethimbo lyaayapostoli. Opwa ningwa owala euvathano naalongi mboka ya longo esiku alihe oyo ya pewe ondjambi. Ondjambi oyo ondenari yimwe mesiku. Molwashoka “otundi ontitatu,” oyo 9:00 gwongula, mboka yi ithanwa potundi onti-3, onti-6, onti-9 nonti-11 palandulathano, oya longo owala oowili 9, 6, 3 no 1.

Aalongi mboka ya longo oowili 12, nenge esiku alihe, otaya thaneke aawiliki yAajuda mboka ya tsikile nokwiipyakidhila miilonga yopalongelokalunga. Yo inaya fa aalongwa yaJesus mboka ya longo konyala uule wonkalamwenyo yawo ayihe iilonga yokuyula oohi nenge momaithano giilonga yilwe yuuyuni. Osha li moshikufuthinge shomuuyuni wokuumbangalantu shomo 29 E.N. sho “mwene gwegumbo” a tumu Jesus Kristus okugongela aantu mbaka ya kale aalongwa ye. Ano oya ningi ‘yahugunina,’ nenge aalongi yeyana lyomiviinu yopotundi onti-11.

Lwahugunina, esiku lyiilonga lyopathaneko otali hulu neso lyaJesus, nethimbo lyokufuta aalongi olya thiki. Omukalo inaagu monika nando onale gwokufuta tango mboka yahugunina ogwa landulwa, ngaashi tashi yelithwa: “Ongulohi sho ye ya, mwene gweyana lyomiviinu okwa lombwele elenga lye: Ithana aalongi, ngu u ya fute ondjambi yawo, tameka okumbaka ya hugunine sigo kumboka yotango. Ano oomboka kwi ye ya potundi ontimulongo nayimwe, sho ye ya, oya pewa kehe ngoka ondenari yimwe. Ano oombeyaka yotango sho ye ya, oyo ya li ye shi taa pewa oyindji yi vule mbeyaka; ihe [nayo] wo oya pewa ondenari yimwe. Sho ye yi pewa, oya tamaneke omusamane e taa ti: Oombano aahugunini oyo ya longo otundi yimwe ayike, ongoye nowe ya yeleke natse, otse mbaka twa humbata uudhigu womutenya nepupyu. Oye okwa yamukula gumwe gwaambaka nokwa ti: Kuume kandje, inaandi ku yuga; otse nangoye inaatu uvanena nani ondenari yimwe? Kutha po ndjino yoye ngu u ye. Ihe ongame nda hala okupa nguka omuhugunini yi thike pundjika yoye. Ondi indikwa nani okuutha iinima yandje ngaashi ngaye mwene nda hala? Nenge eho lyoye oli na efupa, [oshoka] ngame omwaanawa?” Lwahugunina Jesus okwe endulula edhiladhilo ndyoka a ningile nale ta ti: “Ano osho aahugunini otaa ningi yotango, naatango [oyahugunina].”

Okupewa ondenari inaku ningwa peso lyaJesus, ihe opOpentekoste yomo 33 E.N. sho Kristus, “elenga,” a tilile ombepo ondjapuki kombanda yaalongwa ye. Aalongwa mbaka yaJesus oya fa “aahugunini” nenge aalongi mboka ya tameke potundi onti-11. Ondenari itayi thaneke omagano gombepo ondjapuki yo yene. Ondenari oyo sha shoka aalongwa taya vulu okulongitha huka kombanda yevi. Oyo sha shoka tashi ti onkalamwenyo yawo, omwenyo gwawo gwaaluhe. Oyo uuthembahenda okukala Omwiisrael gwopambepo, a gwayekwa okuuvitha Uukwaniilwa waKalunga.

Nziya aalongi mboka ya hiwa tango, otaya mono kutya aalongwa yaJesus oya futwa noye ya wete taya longitha ondenari yopathaneko. Ihe oya hala oshindji kaashi shi owala ombepo ondjapuki mwa kwatelwa omauthemba gUukwaniilwa. Okunyenyeta nokutinda kwawo otaku ulikwa kokuhepeka kwawo aalongwa yaKristus, aalongi yomeyana lyomiviinu “aahugunini.”

Mbela egwanitho ndyoka lyomethelemumvo lyotango olyo awike egwanitho lyeudhi lyaJesus? Aawe, aawiliki yopambepo yUukwakriste yomethelemumvo ndika eti-20, paondondo dhawo nosho wo painakugwanithwa yawo, otaya ka kala “yotango” mboka taya hiywa molwokulonga meyana lyomiviinu lyaKalunga lyopathaneko. Oya tala ko aauvithi yi igandja mboka ye na ekwatathano noWatch Tower Bible and Tract Society, ye li “aahugunini” shi na ko nasha nokukala ye na oshilonga shontumba miilonga yaKalunga. Ihe muushili wo wene, aantu mbaka ya dhinwa kaawiliki yopambepo, oyo mboka ya mono ondenari—etumbalo lyokulonga ye li aakalelipo aagwayekwa yUukwaniilwa waKalunga womegulu. Mateus 19:30–20:16.

▪ Oshike tashi thanekwa keyana lyomiviinu? Oolye taya thanekwa kumwene gweyana lyomiviinu nokaalongi mboka ya longo oowili 12 nosho wo mboka ya longo owili 1?

▪ Uunake esiku lyokulonga lyopathaneko lya hulu po, nuunake okufuta kwa ningwa?

▪ Oshike tashi thanekwa kokufutwa ondenari?