Ontopolwa 98

Aalongwa otaya patathana sho eso lyaJesus tali hedha popepi

JESUS naalongwa ye oye li popepi nomulonga gwaJordan, ngoka ye na okutaaguluka okuza moshitopolwa shaPerea okuya kuJudea. Yalwe oyendji otaye endele kumwe nayo okuya kOpaasa yomo 33 E.N., ndjoka tayi ka dhanwa konyala konima yoshiwike.

Jesus ote ende e li komeho gaalongwa ye, noya kuminwa okutokola toko kwe kwuulaadhi. Dhimbulukwa kutya iiwike yontumba ya piti sho Lasarus a si naashono Jesus a li pokuza mo muPerea a ye kuJudea, Tomas okwa ladhipikile yalwe ta ti: “Natse wo tu yeni ko, tu ka sileni pamwe naye.” Dhimbulukwa wo kutya konima sho Jesus a yumudha Lasarus, oSanhedrin, oya ningile oompangela oku Mu dhipaga. Itashi kumitha sho aalongwa ya kwatwa kuumbanda sho taya yi ishewe muJudea.

Moku ya longekidhila shono shi li komeho, Jesus ota kutha po mboka 12 ye ki ikalele note ya lombwele ta ti: “Tala, otatu yeni pombanda kuJerusalem, nOmuna gwOmuntu ota gandjwa miikaha yaasaseri aakuluntu naanongoraamata, oyo notaye mu pe oondjo dhokusa notaye mu gandja kaapagani; oyo otaye mu sheke notaye mu hiyile omayeye, otaye mu dhenge notaye mu dhipaga; ihe nge pwa piti po omasiku gatatu, oye ta yumuka.”

Shika osho oshikando oshititatu muule woomwedhi dhahugunina dhontumba Jesus ta hokololele aalongwa ye eso neyumuko lye. Nonando yo otaya pulakene kuye, oohapu dhe kaye dhi uvite ko. Otashi vulika omolwashoka yi itaala kutya uukwaniilwa waIsrael otau ka ningululwa kombanda yevi noya tegelela okunyanyukilwa eadhimo nesimano lyawo pamwe naKristus muukwaniilwa wokombanda yevi.

Mokati kaamboka taya yi kOpaasa, omu na Salome, yina yaayapostoli Jakob naJohannes. Jesus aalumentu mbaka ote ya luku “aana yendundumo lyomvula,” sha yela kutya omolwiikala yawo yuugeyentu. Mbaka yaali oya kala uule wethimbo ye na elalakano lya hwama okukala ya simana mUukwaniilwa waKristus, noya hokololele yina omahalo gawo. Ngashingeyi yina ota yi kuJesus molwawo, ota tsu oongolo koshipala she e te mu pula ekwatho.

“Owa hala shike?” Jesus ta pula.

Ota yamukula ta ti: “Lombwela, aamwandje mbaka yaali taa ka kala [omutumba], ogumwe kolulyo lwoye nomukwawo okolumoho lwoye [omuukwaniilwa woye, KB].”

Jesus ota tseya shoka tashi pulitha epulo ndyoka nota lombwele Jakob naJohannes ta ti: “One kamu shi shi shono mwe shi hala. Otamu vulu tuu okunwa oshitenga shono tandi ke shi nwa?”

“Otatu shi vulu,” osho taya yamukula. Nonando Jesus opo e ya lombwele kutya ota ka taalelwa kehepeko linyanyalitha nolwahugunina ota ka dhipagwa, osha yela kutya kayu uvite ko kutya shika osho a hala okutya mokupopya “oshitenga” shoka ta ka nwa.

Nonando ongaaka, Jesus ote ya lombwele ta ti: “Oshitenga shandje tamu ke shi nwa, ihe okukala [omutumba] kolulyo lwandje nokolumoho lwandje, hangame tandi shi utha, aawe, otaku pewa mboka ye ku longelwa kuTate.”

Konima yethimbo, aayapostoli yalwe omulongo otayu uvu shoka Jakob naJohannes yi indile, notaya geye. Otashi vulika Jakob naJohannes ya li ye na mo ombinga onene mompata yonale ndjoka ya li mokati kaayapostoli kombinga yaangoka omukuluntu e vule ooyakwawo. Okwiindila kwawo kwongashingeyi otaku ulike kutya yo inaya tula miilonga epukululo ndyoka Jesus a gandja koshinima shika. Mupyamunene, ehalo lyawo okukala ya simana olya hwama natango.

Opo a kandule po ompata ndjika ompe ndjoka tayi uvitha aantu nayi, Jesus ota gongele mboka 12 opo ya pulakene. Ote ya pukulula nohole ta ti: “One mu shi shi, aakwaniilwa ohaa lele iigwana, naanankondo ohaye yi pangele noonkondo. Ihe omokati keni mwaa kale ngaaka, aawe, oongoka gwomune a hala, a ninge omunene, oye na ninge [omupiya, KB] gweni, naangoka gwomokati keni a hala, a ninge gwokomeho, oye na kale omupika gweni.”

Jesus ota tula po oshiholelwa shoka ye na okulandula, sho ta yelitha ta ti: “Ongaashi Omuna gwOmuntu ine ya okulongelwa, aawe, okulongela nokugandja omwenyo gwe, gu ninge iikulila yoyendji.” Jesus ina kala nokulongela owala yalwe, ihe ota ka sila nokuli aantu ayehe! Aalongwa oye na okukala ye na iikala ya fa yaKristus oyo tuu mbyoka yokukala ya hala okulongela pehala lyokulongelwa nokukala yi ishonopeka pehala lyokukala ya hala ondondo ya simana. Mateus 20:17-28; Markus 3:17; 9:33-37; 10:32-45; Lukas 18:31-34; Johannes 11:16.

▪ Omolwashike aalongwa taya kwatwa kuumbanda pethimbo mpono?

▪ Jesus ota longekidhile ngiini aalongwa ye shono shi li komeho?

▪ Eindilo lini tali indilwa Jesus, notali gumu ngiini aayapostoli yalwe?

▪ Jesus ota kandula po ngiini uupyakadhi mboka u li mokati kaayapostoli ye?