Ontopolwa 55

Aalongwa oyendji taye etha po okulandula Jesus

JESUS ota longo mosinagoga muKapernaum kombinga yoshilonga she e li oshikwiila shoshili tashi zi megulu. Osha yela kutya oshipopiwa she osho etamununomo lyoonkundathana ndhoka dha tameke sho aantu ye mu mono mokugaluka kwawo kombinga yokuuzilontu wEfuta lyaGalilea, hoka ya li iikwiila noohi ndhoka e ya pe pashikumithalonga.

Jesus ota tsikile noonkundathana dhe, ta ti: “Noshikwiila shoka tandi shi gandja, osho onyama yandje, tandi yi [gandjele] omwenyo guuyuni.” Oomvula owala mbali dha piti po, piitemamvula yokolundume lwevi yomo 30 E.N., Jesus okwa lombwelele Nikodemus kutya Kalunga okwa kala e hole uuyuni sho a gandja Omwana e li Omuhupithi. Onkee ano Jesus otu ulike ngashingeyi kutya kehe gumwe gwomaantu yomuuyuni ngoka ta li onyama ye pathaneko, mokukala neitaalo tali longo meyambo ndyoka ye masiku ta ka ninga, ota vulu okumona omwenyo gwaaluhe.

Ihe aantu otaya pundukithwa koohapu dhaJesus. “Nguka ta wapa ngiini oku tu pa onyama ye okulya?” osho taya pula. Jesus okwa hala aapulakeni ye yu uve ko kutya onyama ye otayi ka liwa pamukalo gwopathaneko. Onkee ano opo e shi tse omuthindo, ota tumbula sha shoka nokuli oshinyanyalithi noonkondo ngele tashi taambwa ko shi li ngaashi shi li.

“Ngele itamu li onyama yOmuna gwOmuntu, ne itamu nu ombinzi ye,” Jesus ta yelitha, “one kamu na [omwenyo] mune yene. Ongoka ta li onyama yandje nota nu ombinzi yandje, oye e na omwenyo gwaaluhe, notandi mu yumudha esiku lyahugunina. Oshoka onyama yandje oyo iikulya yashili nombinzi yandje okunuwa kwashili. Oongoka ta li onyama yandje nota nu ombinzi yandje, oye ta kala mungame nangame muye.”

Dhoshili, elongo lyaJesus olya li tali ka halukitha noonkondo andola okwa popile shi na ko nasha nokulya onyama yomuntu. Ihe muushili wo wene, Jesus ina tya kutya onyama yo yeneyene oyo yi liwe nenge ombinzi yo yeneyene oyo yi nuwe. Ye ota tsu owala omuthindo kutya ayehe mboka taya mono omwenyo gwaaluhe oye na okukala neitaalo tali longo meyambo ndyoka ta ka ninga sho ta yamba po olutu lwe lwopantu lwa gwanenena nota tilehi omwenyombinzi gwe. Ihe oyendji yomaalongwa ye itaya kambadhala nokuli okuuva ko elongo lye nonkee ano taye li pataneke taya ti: “Oohapu ndhoka oonkukutu, olye ta vulu oku mu pulakena?”

Jesus mokutseya kutya oyendji yomaalongwa ye otaye shi ngungutula, ota ti: “Shino oshe mú ningitha omwenyo omwiinayi? Ongiini andola, ngele tamu mono Omuna gwOmuntu ta londo ta yi nkoka kwa li shito? . . . Oohapu ndhoka nde dhi mú lombwela, odho ombepo nodho omwenyo. Ihe mokati keni omu na yamwe inaa itaala.”

Jesus ota tsikile ta ti: “Onkee nde mú lombwela, kaku na ngoka ta vulu okuya kungame, okuninga e ku pewa kuTate.” Opo nduno oyendji yomaalongwa ye otaye mu thigi po, notaye etha po oku mu landula. Onkee ano Jesus ota pungulukile kaayapostoli ye 12 note ya pula ta ti: “Nane wo mwa hala andola mu ye?”

Petrus ota yamukula ta ti: “Omuwa, otu ye kulye andola? Ongoye u na oohapu dhomwenyo gwaaluhe; otse otwi itaala notwa tseya ihe, ongoye Omuyapuki gwaKalunga.” Euliko lyuudhiginini kali shi tuu ewanawa, nonando Petrus naayapostoli ooyakwawo otashi vulika kaaya li ye uvite ko naanaa elongo lyaJesus kombinga yoshinima shika!

Nonando Jesus okwa hokwa eyamukulo lyaPetrus, ye ota ti: “[Inandi] mú hogolola, one omulongo nayaali? Ihe gumwe gwomune omutondadhi.” Ota popi Judas Iskariot. Tashi vulika Jesus pethimbo opo tuu mpono e wete kutya Judas ota ‘tameke’ (KB) okuholola eihumbato lya puka.

Jesus opo owala a li a yematitha aantu mokukondjitha oonkambadhala dhawo oku mu ninga omukwaniilwa, notashi vulika taya tompathana taya ti: ‘Ota vulu ngiini okukala Messias ngele ina hala okutaamba ko ondondo ndjoka Messias e na uuthemba okukala e na?’ Shika otashi ka kala wo oshinima oshipe momadhiladhilo gaantu. Johannes 6:51-71; 3:16.

▪ Omolwoolye Jesus ta gandja onyama ye, nongiini mbaka taya ‘li onyama ye’?

▪ Oohapu dhaJesus dhini ishewe tadhi halutha aantu, ihe oshike ta tsu omuthindo?

▪ Sho oyendji taye etha po okulandula Jesus, Petrus oti inyenge ngiini?