Ontopolwa 14

Aalongwa yaJesus yotango

KONIMA yomasiku 40 mombuga, Jesus ota shuna kuJohannes, ngoka e mu ninginithile. Manga te ya popepi naye, osha yela kutya Johannes ote mu ulike e ti igidha ta lombwele mboka ya thikama mpoka ta ti: “Tala, Onzigona yaKalunga, tayi kutha po oondjo dhuuyuni. Oye tuu nguka nde mu popi nda tile: Omulumentu te ya konima yandje, oonguka kwa li ndje komeho, oshoka oye kwa li ko, manga ongame nda li ndaa ko.” Nonando Johannes omukuluntu kuntsezi ye Jesus, Johannes oku shi kutya Jesus oko a kala nale e li omuntu gwopambepo megulu manga ye kaa li ko.

Ihe iiwike yontumba ya piti, sho Jesus i ile okuninginithwa, osha yela kutya Johannes ka li a tseya naanaa kutya Jesus ota ka kala Messias. “Ongame noinaandi mu tseya,” Johannes ta zimine. “Ihe opo a tseyithilwe Israel, onkee nde ya [okuninginitha, NW] nomeya.”

Johannes ota tsikile okuyelithila aapulakeni ye shoka sha ningwa po sho a ninginitha Jesus: “Onda mono ko Ombepo a kuluka megulu ongonguti, oye nokwa kala kombanda ye. Ongame nonda li kandi mu shi, ihe oonguka a tumu ndje [okuninginitha, NW] nomeya, oye a lombwele ndje: Oonguka to mu mono, Ombepo te mu lambele nota kala po, oye tuu ngoka ta [ninginitha, NW] nOmbepo Ondjapuki. Ongame onde shi mono nonda hokolola, oye Omuna gwaKalunga.”

Esiku lya landula ko Johannes ota thikama paalongwa ye yaali. Sho Jesus te ya popepi, Johannes ota ti ishewe: “Tala Onzigona yaKalunga!” Opo tuu mpono, aalongwa mbaka yaali yaJohannes Omuninginithi otaya landula Jesus. Gumwe gwomuyo oAndreas, nagulwe osha yela kutya oye naanaa omuntu ngoka a nyola iinima mbika, ngoka i ithanwa wo Johannes. Johannes nguka, pamauliko, naye wo ontsezi yaJesus, sha yela kutya ye omwanamati gwomumwayina gwaMaria, Salome.

Sho Jesus a punguluka e ta mono Andreas naJohannes ye mu landula, ote ya pula ta ti: “Otamu kongo shike?”

“Rabbi,” taya pula, “owa kala peni?”

“Ileni, ne mu tale,” Jesus ta yamukula.

Opone yomutenya lwaampono, na Andreas naJohannes otayu uhala po naJesus oshihupe shesiku ndyoka. Konima yaashono Andreas okwa tuntukwa noonkondo e te endelele a ka tale omumwayina, ngoka hi ithanwa Petrus. “Otse twa mono Messias,” te mu lombwele. Nota fala Petrus kuJesus. Otashi vulika pethimbo opo tuu mpoka Johannes a ka tala omumwayina Jakob e te mu eta kuJesus; ihe shikumitha, Johannes okwa nuka po uuyelele mbuka wopaumwene mEvaangeli lye.

Esiku lya landula, Jesus ota tsakaneke Filippus, ngoka a za kuBetsaida, koshilando oko tuu hoka kwa zile Andreas naPetrus. Ote mu ithana: “Landula ndje.”

Opo nduno Filippus ota mono Natanael, ngoka i ithanwa wo Bartolomeus, e ta ti: “Otse twa mono ngoka a shangwa kuMoses mompango nokaaprofeti, Jesus, omuna gwaJosef gwomuNasaret.” Natanael okwa limbililwa. “MuNasaret otamu zi tuu uuwanawa nando [owasha]?” osho ta pula.

“Ila, u tale,” Filippus te mu ithana. Manga taye ende yu uka kuJesus, Jesus ota popi Natanael ta ti: “Tala, Omwiisrael gwashili, ke na nando iifundja!”

“Ongoye u shi ndje peni?” Natanael ta pula.

“Manga Filippus inee ku ithana, sho wa li momukwiyu, onde ku mono,” Jesus ta yamukula.

Natanael okwa kumwa. “Rabbi [shoka tashi ti Omuhongi], ongoye Omuna gwaKalunga, ongoye Omukwaniilwa gwaIsrael,” ye ta ti.

“Sho nde ku lombwele: onde ku mono ko momukwiyu, onkee wi itaale”? Jesus ta pula. “Oto ka mona ko iinima iinene yi vule mbika.” Opo nduno otu uvaneke: “Oshili, oshili tandi mú lombwele: otamu ka mona ko egulu lye eguluka, naayengeli yaKalunga taa londo notaa kulukile kOmuna gwOmuntu.”

Nziyanziya konima yaashino, Jesus pamwe naalongwa ye aape otaya zi po pesilu lyaJordan notaya yi kuGalilea. Johannes 1:29-51.

▪ Aalongwa yaJesus yotango oyo oolye?

▪ Petrus, notashi vulika wo naJakob, otaya tseyithwa ngiini Jesus?

▪ Oshike tashi itaalitha Natanael kutya Jesus Omuna gwaKalunga?