Ontopolwa 22

Aalongwa yane tayi ithanwa

KONIMA yonkambadhala yokudhipaga ya ningilwa omwenyo gwaJesus moshilando shaandjawo Nasaret, ota tembukile koshilando Kapernaum popepi nEfuta lyaGalilea. Shika otashi gwanitha ehunganeko lilwe lyaJesaja. Olyo limwe ndyoka lya hunganeke kutya aantu yomuGalilea mboka ya kala pefuta otaya ka mona uuyelele uunene.

Manga Jesus ta tsikile niilonga ye yokugandja uuyelele yeuvitho lyUukwaniilwa mpaka, ota mono yane yomaalongwa ye. Mbaka oya yile nale pamwe naJesus ihe oya shuna kongeshefa yawo yokuyula oohi sho ya galuka pamwe naye kuJudea. Otashi vulika ngashingeyi Jesus te ya kongo, oshoka olyo ethimbo lyokukala e na aakwatheli yokwakola, yaaluhe mboka ta vulu okudheula okutsikila nuukalele ngele kee po.

Onkee ano manga Jesus ta kunkula nomunkulofuta e ta mono Simon Petrus nooyakwawo taya yogo iiyulitho yawo, ta yi kuyo. Ota londo mowato yaPetrus e te mu pula e yi humithe kashona momeya yi ze po puukukutu. Sho ya humu ko okakako, Jesus ota kuutumba mowato e ta tameke okulonga oongundu dhaantu komunkulofuta.

Konima yaashono, Jesus ota lombwele Petrus ta ti: “Dhugila puule mpee, ne mu ka lukile iiyulitho yeni.”

“Omuhongi,” Petrus ta yamukula, “uusiku auhe twa longo, tse inaatu yula mo sha, ihe iiyulitho otandi yi umbilile mo oohapu dhoye.”

Sho yu umbile mo iiyulitho, oya kwata oohi odhindjidhindji iiyulitho e tayi tomoka. Aalumentu oya lapa neendelelo ooyakwawo ye li mowato yopopepi nayo ye ye oku ya kwatha. Mbala oowato adhihe mbali odhu udha oohi odhindji noonkondo nodha ale dhi ningine. Sho Petrus te shi mono, ota tsu oongolo koshipala shaJesus e ta ti: “Omuwa, za po pungame, oshoka ngame omuntu omulunde.”

“Ino tila,” Jesus ta yamukula. “Okongashingeyi to ningi omuyuli gwaantu.”

Jesus oti ithana wo omumwayina gwaPetrus Andreas. “Landulii ndje,” te ya ladhipike, “ongame notandi mu ningi aayuli yaantu.” Aayuli ooyakwawo Jakob naJohannes, aana yaSebedeus, otaya hiywa wo, nayo wo otaya yi kaapu na okukwatakwata. Ano mbaka yane otaya thigi po ongeshefa yawo yokuyula oohi e taya ningi aalanduli yaJesus yotango yokwakola yaaluhe. Lukas 5:1-11; Mateus 4:13-22; Markus 1:16-20; Jesaja 8:23-9:1.

▪ Omolwashike Jesus ti ithana aalongwa ye ye mu landule, noyo oolye?

▪ Oshikumithalonga shini tashi tilitha Petrus?

▪ Iilonga yokuyula oohi yini Jesus ta hiyile aalongwa ye ye yi longe?