Ontopolwa 92

Aanashilundu omulongo taya aludhwa molweendo lwaJesus lwahugunina lwokuya kuJerusalem

JESUS ota ponyitha oonkambadhala dhOsanhedrin dhoku mu dhipaga mokuthiga po Jerusalem nota yi koshilando shaEfraim, tashi vulika pu na owala ookilometa 24 lwaampono kuuzilolundume waJerusalem. Ota kala hoka naalongwa ye, e li kokule naatondi ye.

Ihe ethimbo lyOpaasa yomo 33 E.N. otali hedha popepi, na Jesus masiku ota yi ishewe mondjila. Ota piti muSamaria nota yi sigo okuGalilea. Shika osho oshikando she shahugunina ta talele po oshitopolwa shika manga inaa sa. Manga ye naalongwa ye ye li muGalilea, otashi vulika tayi itula mongundu yayalwe mboka ye li mondjila taya yi kuJerusalem oku ka dhana Opaasa. Otaye ende nondjila ndjoka ya pita moshitopolwa shaPerea, kuuzilo womulonga gwaJordan.

Petameko lyolweendo, manga Jesus ta yi momukunda gwomuSamaria nenge gwomuGalilea, ota tsakanekwa kaalumentu omulongo ye na oshilundu. Omukithi nguka omutilithi ohagu letheke po iilyo yolutu lwomuntu kashona nakashona—ominwe dhe dhokoonyala, ominwe dhe dhokoompadhi, omakutsi ge, omayulu ge nomilungu dhe. Okugamena yalwe kaaya kwatwe kugwo, Ompango yaKalunga otayi ti kombinga yomunashilundu: “Oku na . . . [okushiga] oshama ye nokwiigidha: onakunika oshidhila! Omasiku agehe manga ku na uulepera, oye onakunika oshidhila . . . , oye e na okwiikalela.”

Aanashilundu omulongo otaya dhiginine omangambeko gOmpango ngoka ge na ko nasha naanashilundu notaya kala kokule naJesus. Ihe otayi igidha mokule taya ti: “Jesus, Omuhongi, tu silohenda!”

Jesus oku ya wete ye li kokule note ya lombwele ta ti: “Indeni, mu ka monike komusaseri.” Jesus ote shi popi molwashoka Ompango yaKalunga otayi gandja uuthemba kaasaseri ya lombwele aanashilundu mboka ya aluka kuuvu wawo kutya oye li nawa thiluthilu. Komukalo nguka, aantu ya tya ngaaka otaya mono epitikilo okukala ishewe pamwe naantu mboka ye na uukolele.

Aanashilundu omulongo oyi inekela oonkondo dhaJesus dhopashikumithalonga. Onkee ano otaya yi taye endelele ya ka popye naasaseri, nokuli nando yo inaya aludhwa natango. Manga ye li mondjila, eitaalo lyawo muJesus otali futwa. Otaya tameke okumona nokuuva kutya oya aluka!

Omugoyi yomaanashilundu mboka ya yelithwa otaya tsikile nondjila yawo, ihe omunashilundu gumwe, Omusamaria, ota shuna a ka konge Jesus. Omolwashike mbela? Omolwashoka okwa pandula unene shoka a ningilwa. Ota hambelele Kalunga newi lyopombanda, naashono ta mono Jesus, ota tsu oongolo koompadhi dhe note mu pandula.

Meyamukulo Jesus ota ti: “Hamulongo mboka ya aludhwa? Mbeyaka omugoyi oye li peni? Inaaku monika we nando gumwe a galuka a hambelele Kalunga, omukwiilongo nguka oye tuu awike?”

Opo nduno ota lombwele omulumentu Omusamaria ta ti: “Thikama, ngu u ye, eitaalo lyoye lye ku hupitha.”

Uuna tatu lesha nkene Jesus a aludha aanashilundu omulongo, otu na okupulakena koshiilongomwa shoka sha kwatela mo epulo lye: “Mbeyaka omugoyi oye li peni?” Okwaahenolupandu hoka kwa hololwa kwaamboka omugoyi, okwo epuko lya kwata miiti. Mbela tse otatu ku ulika ngaa olupandu lwiinima mbyoka hatu pewa kuKalunga ngaashi Omusamaria, sha kwatela mo euvaneko lyoshili lyomwenyo gwaaluhe muuyuni uupe waKalunga wuuyuuki? Johannes 11:54, 55; Lukas 17:11-19; Levitikus 13:16, 17, 45, 46; Ehololo 21:3, 4.

▪ Jesus ota ponyitha ngiini oonkambadhala dhoku mu dhipaga?

▪ Openi ishewe Jesus ta yi, nota ka thika peni?

▪ Omolwashike aanashilundu ya thikama kokule, nomolwashike Jesus te ya lombwele ya ye kaasaseri?

▪ Oshiilongomwa shini tu na okwiilonga moshimoniwa shika?