Ontopolwa 39

Aanuuntsa naaishonopeki

KONIMA yokutumbula uukwatya uuwanawa waJohannes Omuninginithi, Jesus otu ukitha eitulomo kaantu mboka ye na uuntsa, aatengatengi mboka ye mu kundukidha. “Oluvalo nduka,” ye ta ti, “olwa fa uunona wa kuutumba poondambo tau igidhile uukwawo e tau ti: Otse otwe mú hakelele, ne inamu tutula uudhano, notwi imbi omaimbilo guupongo, ihe one inamu lila.”

Jesus okwa hala mbela okutya shike? Ota yelitha ta ti: “Johannes okwe ya, oye ita li noita nu, noyo ya ti: Oye e niwe kompwidhuli. Omuna gwOmuntu okwe ya, ta li e ta nu, oyo notaa ti: Tala omufukedhi nonkolwi, kuume kaateeloni nokaalunde!”

Oshi li itaashi wapa okumbilipalela aantu. Kapu na shoka hashi ya nyanyudha. Johannes okwa kala nonkalamwenyo yanathangwa yokwiidhimbika mwene ngaashi Omunasiri, ta tsu kumwe nokupopya kwomuyengeli kutya ‘ye ita ka nwa nando omaviinu niikolitha.’ Ihe aantu otaya ti kutya oku niwe kompwidhuli. Mepingathano naashono, Jesus oku na onkalamwenyo ya fa yaantu yalwe, ihi idhilike sha, nota lundilwa kutya iha gwanenwa shi na ko nasha nokulya nokunwa.

Kashi shi tuu oshidhigu okumbilipaleka aantu! Yo oya fa ookuume yokudhana, mboka yamwe yomuyo taya tindi okututula uudhano sho aanona yalwe taye ya igidhile nenge okulila sho ookuume kawo tayi imbi omaimbilo guupongo. Nonando ongaaka, Jesus ota ti: “Uunongo wa hololwa owo [wu] uka okiilonga yawo.” Eeno, omauliko, sha hala okutya iilonga—otayi yelitha kutya omalundilo okulundila Johannes nosho wo Jesus kage shi goshili.

Jesus ota tsikile ta nyenyetele iilando itatu Korasin, Betsaida naKapernaum, moka a longelele oyindji yomiilonga ye yoonkondo. Andola iilonga mbyoka okwe yi longelele miilando yaFoinikia, Tiro naSidon, Jesus ta ti, ando iilando mbyoka oyi itedhulula mokuzala omahahi gomafufu nomokukuutumba momutoko. Jesus ota pangula Kapernaum, shoka sha yela kutya osho sha li ontandagumbo ye pethimbo lyuukalele we, nota yelitha ta ti: “Evi lyaSodom otali ningi ihwepo li ku vule esiku ndyoka lyepangulo.”

Jesus ota tsikile ta hambelele He gwomegulu montaneho. Ote shi ningi molwashoka Kalunga oha holeke aanongo naanandunge ooshili dhopambepo dhi na ondilo ihe iinima mbika iikumithi ohe yi hololele aaishonopeki, mboka ya fa aanona pathaneko.

Hugunina, Jesus ota hiya aantu nehiyo ewanawa: “Ileni kungame amuhe hamu longo nomwa lolokithwa, ongame notandi mú pe evululuko. Itsikeni ondjoko yandje, ne mu ilonge ndje, oshoka ongame omunambili nomomutima ondi ishonopeka; notamu imonene oomwenyo dheni evululuko. Oshoka ondjoko yandje ombwanawa, nomutenge gwandje omupu.”

Ongiini mbela Jesus ta gandja evululuko? Ote shi ningi mokweeta emanguluko okuza mokupikwa komithigululwakalo dhaawiliki yelongelokalunga ndhoka ya tsika aantu, pashiholelwa, mwa kwatelwa omakotampango taga ngambeke okudhana Esabati. Otu ulike wo omukalo gwokupepelelwa kwaamboka yu uvite taya thininikwa kuudhigu wokupangelwa kaapangeli yopapolotika nokwaamboka ye uvite uudhigu woondjo dhawo molwokuhepekwa komaiyuvo gawo. Otu ulikile wo aahepekwa ya tya ngaaka nkene oondjo dhawo tadhi vulu okudhimwa po nonkene yo taya vulu okunyanyukilwa ekwatathano naKalunga li na ondilo.

Ondjoko ombwanawa ndjoka Jesus ta gandja, oyo yimwe yomokwiiyapulila Kalunga thiluthilu, okukala tatu vulu okulongela Tate yetu gwomegulu omunalukeno nomunahenda. Nomutenge omupu ngoka Jesus ta gandja kwaamboka taye ya kuye ogwo okuvulika kiitegelelwa yaKalunga yokumona omwenyo, mbyoka oyo iipango Ye ya nyolwa mOmbimbeli. Nokashi shi nando oshidhigu okuvulika kiipango mbika. Mateus 11:16-30; Lukas 1:15; 7:31-35; 1 Johannes 5:3.

▪ Ongiini aantu mboka ye li aanuuntsa naatengatengi yepipi lyaJesus ya li ya fa aanona?

▪ Omolwashike Jesus i inyengithwa a hambelele He gwomegulu?

▪ Okomikalo dhini aantu ya tsikwa omitenge, nepepelelo lini Jesus ta gandja?