Ontopolwa 51

Edhipago poshituthi shevalo

KONIMA yokugandja omalombwelo kaayapostoli ye, Jesus ote ya tumu moshitopolwa ooyaali nooyaali. Tashi vulika aamwayinathana Petrus naAndreas taya yi pamwe, nosho wo Jakob onaJohannes, Filippus onaBartolomeus, Tomas onaMateus, Jakob onaTaddeus naSimon opamwe naJudas Iskariot. Omapando gahamano gaauvithi yevaangeli otagu uvitha onkundana ombwanawa yUukwaniilwa notaga longo iikumithalonga yomaaludho shaa mpono taga yi.

Pethimbo ndyoka Johannes Omuninginithi oku li natango mondholongo. Ye oku li mo ngashingeyi konyala oomvula mbali. Ngiika oto dhimbulukwa kutya Johannes okwa popile montaneho kutya osha li sha puka sho Herodes Antipas a kutha po Herodias, omukiintu gwamumwayina Filippus, a ninge po gwe. Molwashoka Herodes Antipas okwa tile kutya ye ota landula Ompango yaMoses, Johannes okwa li e li mondjila sho a tula uukumwe mbuka wokuteya ondjokana pomutenya. Ano Herodes okwa tula Johannes mondholongo, tashi vulika u ulumikwa kuHerodias.

Herodes Antipas oku shi kutya Johannes omulumentu omuyuuki nokwa hokwa nokuli okupulakena kuye. Onkee ano, kee shi wo shoka e na oku mu ningila. Mepingathano naashino, Herodias ota tondo Johannes nota kala nokukonga ompito oku mu dhipagitha. Hugunina, ompito ndjoka a kala a tegelela oya holoka.

Okathimbo okafupi komeho yOpaasa yomo 32 E.N., Herodes ota longekidha oshituthi oshinene shevalo lye. Omalenga agehe omanene gaHerodes noondjayi dhiita, nosho wo aakuluntu yomuGalilea, opo ye li poshituthi. Ongulohi kwa toka Salome, okamwanakadhona kaHerodias e ka mona pomulumentu gwe gwonale Filippus, otaka tumwa ka ka tutulile aayenda uudhano. Aalumentu mboka ye li po oya hokwa noonkondo okututula uudhano kwako.

Herodes okwa hokwa noonkondo Salome. “Indila ndje shaa shoka wa hala, notandi shi ku pe,” ye ta ti. Ote ka ganene nokuli ta ti: “Shaa shoka to shi indile ndje, otandi shi ku pe, nonando ndi ku tendele oshilongo shandje pokati.”

Salome manga inaa yamukula, ota piti mo a ka pule omayele kuyina. “Otandi indile shike?” ye ta pula.

Hugunina ompito ye oya holoka! “Omutse gwaJohannes [Omuninginithi, NW],” Herodias ta yamukula pwaa na okukakadhala.

Salome ota shuna mbalambala kuHerodes note mu indile: “Ongame nda hala, u pe ndje ngashingeyi omutse gwaJohannes [Omuninginithi, NW] omoshiyaha.”

Herodes okwa nika oluhodhi noonkondo. Ihe molwashoka aayenda ye egano lye oye li uvu, otashi ke mu sitha ohoni ngele ite gu gandja, nokuli nonando shika otashi ti kutya omulumentu ngoka kee na ondjo oku na okudhipagwa. Omudhipagi ota tumwa e ye mbalambala kondholongo e ta gwanitha oshilonga she shoka oshitilithi. Mbalambala ota galuka e na omutse gwaJohannes moshiyaha, note gu pe Salome. Oye note gu fala kuyina. Sho aalongwa yaJohannes yu uvu shoka sha ningwa po, oye ya ya kuthe po omudhimba gwe noye gu fumvike, nopo nduno otaye ke shi hokololela Jesus.

Konima yethimbo, sho Herodes tu uvu kutya Jesus ota aludha aantu nota tidha mo oompwidhuli, okwa li a tila, e shi Jesus oye naanaa Johannes ngoka a yumuka kuusi. Konima yaashono, okwa li a hala noonkondo okumona Jesus, hakuuva euvitho lye, ihe okutala ngele osho naanaa shi li ngawo nenge hasho. Mateus 10:1-5; 11:1; 14:1-12; Markus 6:14-29; Lukas 9:7-9.

▪ Omolwashike Johannes e li mondholongo, nomolwashike Herodes inaa hala oku mu dhipagitha?

▪ Hugunina ongiini Herodias a vulu okudhipagitha Johannes?

▪ Omolwashike Herodes a hala okumona Jesus konima yeso lyaJohannes?