Ontopolwa 94

Egalikano neifupipiko oya pumbiwa

NALE sho Jesus a li muJudea, okwa hokololele eudhi kombinga yankene sha simana okudhiginina megalikano. Ngashingeyi, molweendo lwe lwahugunina okuya kuJerusalem, ota tsu ishewe omuthindo nkene sha simana okwaaheetha okugalikana. Otashi vulika Jesus e li natango muSamaria nenge muGalilea sho ta hokololele ishewe aalongwa ye eudhi ndika:

“Koshilando shontumba kwa li ku na omutokoli gwoohapu ina tila Kalunga, ye ina sa ohoni aantu. Moshilando shono nomwa li mu na omuselekadhi e ya olwindji kuye nokwa ti: Uthila ndje oohapu dhomuthiminiki gwandje. Ihe oye kwa ningi omasiku ogendji ina hala, konima i itile ihe: Nando ihe tila Kalunga noihe si ohoni aantu, onda hala, ndi mu uthile, oshoka omuselekadhi ngu ta zizilike ndje, opo kaa yage ndje nokuli montaneho.”

Jesus ota longitha shoka tashi tsu kumwe nehokololo lye nota ti: “Pulakeneni omutokoli ngu omupandala sho ta ti! Ano Kalunga itu uthile ando aahogololwa ye haye mu ithana pombanda omutenya nuusiku, ye a se uunye ando oku ya kwatha?”

Jesus ina hala okutya Jehova Kalunga okwa fa omupanguli ngoka kee shi omuyuuki. Ihe ngele omupanguli ngoka kee shi omuyuuki oha pulakene nokuli komaindilo ngoka tage endululwa, osha yela kutya Kalunga ngoka omuyuuki a pwa nomwaanawa thiluthilu, ota ka yamukula ngele oshigwana she otashi dhiginine okugalikana.

Onkee ano Jesus ota tsikile ta ti: “Otandi mú lombwele: [Kalunga] ote ya uthile mbalambala.”

Olwindji aafupifupi naathigona ohaya tindilwa uuyuuki, omanga aanankondo naayamba haya kwathelwa olundji. Ihe Kalunga ita ka sa owala oshimpwiyu opo aakolokoshi ya geelwe pauyuuki ihe ota ka shilipaleka wo opo aapiya ye ya ningilwe pauyuuki moku ya pa omwenyo gwaaluhe. Ihe aantu yangapi mbela yi itaala lelela kutya Kalunga ote ke etitha mbala uuyuuki?

Jesus ota popi unene tuu kombinga yeitaalo moonkondo dhegalikano sho ta pula ta ti: “Ihe Omuna gwOmuntu sho te ya, ota adha ko tuu eitaalo kombanda yevi?” Nonando epulo inali yamukulwa, otashi vulika tashi ti kutya eitaalo lya tya ngaaka itali ka monika apuhe uuna Kristus te ya moonkondo dhUukwaniilwa.

Mokati kaamboka taya pulakene kuJesus, omu na mboka ye uvite lelalela kutya yo aayuuki meitaalo lyawo. Oyi inekela yo yene kutya yo aayuuki, noya dhina yalwe. Yamwe yomaalongwa yaJesus otashi vulika ya kwatelwa mongundu ndjika. Ano otu ukitha eudhi ndika tali landula kaantu ya tya ngaaka:

“Aalumentu yaali ya yi motempeli okugalikana, gumwe omufarisayi nomukwawo omuteloni. Omufarisayi okwa thikama omuthika i ikalela nokwa galikana ngeyi: Kalunga, otandi ku hambelele, oshoka ngame inaandi fa aantu yalwe, aakolokoshi naayugi naahondeli nenge ongomuteloni ngo. Iikulya ohandi yi idhilike lwaali oshiwike kehe nohandi gandja iitimulongo miilikolwa yandje ayihe.”

Aafarisayi oya tseyika molwomaiyuliko gawo gomontaneho guuyuuki okwiimonikitha kuyalwe. Omasiku ngoka haya longitha aluhe molwokwiidhilika iikulya hoka yi itulila po yo yene ogo Omaandaha nEtine, nohaya futu nawa iitimulongo nokuli yiigwanga yomepya iishona. Nale oomwedhi dhontumba, pethimbo lyOshituthi shOmatsali okudhina aantu yowala kwawo okwa li taku monika sha yela sho ya ti: “Ihe oshigwana shono inaashi tseya ompango, [sha hala okutya efatululo ndyoka lya gandjwa kAafarisayi] osha thingwa.”

Jesus ota tsikile neudhi lye ta hokolola kombinga yomuntu a tya ngaaka ngoka ta “thingwa” ta ti: “Ihe omuteloni okwa thikama kokule, ye ina hala okuligamena kegulu, okwi idhenge pontulo ye nokwa ti: Kalunga, sa ndje ohenda, ongame omunandjo.” Molwashoka omuteloni okwa zimina omayono ge neifupipiko, Jesus ota ti: “Otandi mú lombwele: nguka a shuna kegumbo omuyuuki e vule gwiyaka, oshoka oongoka ti inenepeke, ota shonopekwa, naangoka ti ishonopeke, ota nenepekwa.”

Onkee ano Jesus ota tsu ishewe omuthindo kutya eifupipiko olya pumbiwa. Molwashoka aalongwa yaJesus oya kokela muulipamwe moka Aafarisayi ya kala ye na enwethomo lyokwiishi uuyuuki lya tya ngaaka naamoka ondondo nomuthika oyo hayi tsuwa aluhe omuthindo, itashi kumitha nokuli sho ya nwethwa mo kusho. Ano iiyilongomwa yeifupipiko mbyoka Jesus e ya longo kayi shi tuu iiwanawa! Lukas 18:1-14; Johannes 7:49.

▪ Omolwashike omupanguli ngoka kee shi omuyuuki a zimine eindilo lyomuselekadhi, noshiilongomwa shini sha longwa keudhi lyaJesus?

▪ Eitaalo lya tya ngiini Jesus ta tala uuna te ya?

▪ Okoolye Jesus u ukitha eudhi lye li na ko nasha nOmufarisayi nomuteloni?

▪ Iikala yini yAafarisayi yi na okuyandwa?