Ontopolwa 33

Egwanitho lyehunganeko lyaJesaja

SHO Jesus ta mono kutya Aafarisayi nongundu yaalanduli yaHerodes otaya pangele ompangela ye mu dhipage, ye naalongwa ye otaya shuna kEfuta lyaGalilea. Mpaka omangathithi omanene gaantu otaga mbomboloka taga zi shaampono muPalestina, nonokuli nohandiyaka yoongamba dhasho, taga mbombolokele kuye. Ota aludha oyendji, noshizemo osho kutya ayehe mbono ye na omikithi dha kwata miiti otaya thininike yu uka komeho opo ye mu gume.

Molwashoka omangathithi gaantu omanene unene, Jesus ota lombwele aalongwa ye opo owato yi mu kale popepi. Opo omangathithi gaantu kaaga vule okuthininika gu uka muye, owato otayi dhugwa yi ze po pomunkulo gwefuta. Ota vulu oku ya longa e li mowato nenge a ye koshitopolwa shilwe pooha nomunkulo gwefuta a ka kwathele aantu yaahoka.

Omulongwa Mateus ota popi kutya iilonga yaJesus otayi gwanitha ndhoka “dha [popiwa] komuprofeti Jesaja.” Opo nduno Mateus ota totha mehunganeko ndyoka Jesus ta gwanitha:

“Tala, [omupiya, OB-1986] gwandje nde mu hogolola, omuholike gwandje, oonguka omwenyo gwandje gwe mu hokwa; ongame otandi mu tula Ombepo yandje, oye notu uvithile aapagani uuyuuki. Oye iha tamanana, ye iha igidha, nongashika ewi lye itali uvika momapandaanda. Oshihenguti sha tanduka ite shi nyanyagula, nokangodhi konyeka yomagadhi ka tsina ite ka dhimi po, sigo uuyuuki te u thikitha mesindano. Naapagani otaa ki inekela edhina lye.”

Dhoshili, Jesus oye omupiya omuholike ngoka a hokiwa kuKalunga. Na Jesus otu uvitha shoka osho uuyuuki washili, sha shoka sha holekwa komithigululwakalo dhomalongelokalunga giifundja. Molwokulongitha kwawo kaaku li pauyuuki ompango yaKalunga, Aafarisayi ihaya kwathele nokuli omuvu mEsabati! Mokutseyitha uuyuuki waKalunga, Jesus ota mangulula aantu komutenge gwomithigululwakalo dhaahe li pauyuuki, nomolwoshinima shika, aawiliki yelongelokalunga taya kambadhala oku mu dhipaga.

Kutya ye ‘ita ka tamanana noite ki igidha, newi lye itali ku uvika momapandaanda’ otashi ti shike? Sho Jesus ta aludha aantu, ‘ote yi indike noonkondo yaahe mu holole.’ Ina hala a tseyithwe momapandaanda nenge a hokololwe pakana nokana momahokololo ga goyokithwa.

Jesus oha faalele wo etumwalaka lye lyehekeleko aantu mboka pathaneko ya fa oshihenguti sha tanduka, sha tivuka nosha lyatelwa pevi. Yo oya fa okangodhi konyeka yomagadhi ka tsina, hoka ohandje yonkalamwenyo yako yi li pokudhima. Jesus ita nyanyagula oshihenguti sha tanduka noita dhimi okangodhi taka tsina olwithi. Ihe ota yambula po nuunkulungu aatalanteni nohenda nosho wo nohole. Jesus oye shili ngoka iigwana tayi vulu okwiinekela muye. Mateus 12:15-21; Markus 3:7-12; Jesaja 42:1-4.

▪ Jesus ota tseyitha ngiini uuyuuki, itaa tamanana nenge iti igidha momapandaanda?

▪ Oolye ya fa oshihenguti sha tanduka nokangodhi konyeka, noshike Jesus te ya ningile?