Ontopolwa 86

Ehokololo lyomumati a kanene

JESUS opo owala a adhika a hokololele Aafarisayi omaudhi ge na ko nasha nokumona onzi noshimaliwa mbyoka ya li ya kana, ihe ngashingeyi ota tsikile neudhi lilwe. Ndika otali popi kombinga yahe omunahole nosho wo okukala kwe naamati ye yaali, mboka kehe gumwe e na omapuko ga kwata miiti.

Tango, opu na omumati omushona ngoka ta dhana onkandangala onene meudhi ndika. Ota pula uuthiga we, mboka he te wu mu pe nopwaahe na okukakadhala. Opo nduno ota thigi po egumbo nota tameke onkalamwenyo yaa na uuyogoki wopamikalo. Ihe pulakena sho Jesus ta hokolola ehokololo, nou tale ngele oto vulu okumona kutya aahokololwa mbaka otaya thaneke lye.

Jesus ota tameke ta ti: “Okwa li ku na omuntu e na oyana aamati yaali. Ondenge yomukwawo nokwa ti kuhe: Tate, pe ndje ombinga ndjoka yeliko ndi na oku yi pewa. [He] okwe ya topolele emona lye.” Mbela omumati nguka omushona ota ningi shike naashoka a pewa?

“Inapa pita ihe omasiku ogendji,” Jesus ta yelitha, “omwana ngu omushona okwa gongele iinima ye ayihe nokwa yi koshilongo shokokule nokwa hanagula nkoka eliko lye nokukala muuholume.” Muushili wo wene, ota longitha iimaliwa ye mokukala pamwe noohonda. Konima yaashono, otapu ya omathimbo omadhigu, ngaashi Jesus ta tsikile nokuhokolola ta ti:

“Ihe sho a mana po ayiheyihe, oshilongo shiyaka osha adhika kuulumbu, oye nokwa tameke okuhepa. Okwa yi ko nokwi itula pomuyamba gwoshilongo shiyaka, oye nokwe mu tumu kohambo ye okulitha iingulu. Nokwa hala okukutitha ela lye omakunde ngeyaka haga liwa kiingulu, ihe inee ga pewa nando komuntu.”

Kashi dhinitha tuu sho e na okulitha iingulu, molwashoka iinamwenyo mbika oya li inaayi yogoka paMpango! Ihe shoka she ehameka omumati noonkondo, osha li ondjala onene ndjoka ye mu halitha nokuli iikulya mbyoka hayi pewa iingulu. Jesus okwa ti kutya molwokumona iihuna kwe kunyanyalitha, ‘okwi itedhulula.’

Jesus ota tsikile nehokololo lye nota yelitha ta ti: “Oye [i ipopile] a ti: [Aapiya] yatate oyendji oye na iikulya ya ha, ihe ongame tandi sile po mpaka kondjala. Otandi thikama notandi yi kutate e tandi mu lombwele: Tate, onda yono nomegulu nokungoye, ngaye inaandi gwana we okwiithanwa omumwoye, taamba ndje ongomukalele gumwe gwoye. Oye okwa thikama nokwa yi kuhe.”

Mpaka opu na sha shoka tatu vulu oku shi dhiladhila: Ando he okwe mu tidhile noku mu uyaganena nondjahi sho a thigi po egumbo, otashi vulika ando omumati inaa tseya naanaa shoka e na okuninga. Otashi vulika ando a tokola okushuna koshilongo shaandjawo nokukambadhala okukonga iilonga palwe pwi ili opo a kale inaa pumbwa we okuholoka koshipala shahe. Ihe edhiladhilo lya tya ngaaka inali ya mo muye. Okwa li a hala okukala e li pegumbo!

Osha yela kutya he meudhi lyaJesus ota thaneke Tate yetu gwomegulu omunahole nomunahenda, Jehova Kalunga. Nangoye ngiika ou shi wete wo kutya omumati a kanene ota thaneke mboka ya tseyika kutya aalunde. Aafarisayi, mboka taya popi naJesus, oya pele nale Jesus uusama molwashoka a li ta li pamwe naalunde mbaka. Ihe omumati omukuluntu ota thaneke lye?

Sho omumati a kanene ta monika

Sho omumati a kanene gwomeudhi lyaJesus ta galukile kegumbo lyahe, ota taambwa ko mbela ngiini? Pulakena nkene Jesus te shi hokolola:

“Ihe manga a li kokule, he okwe mu mono nokwe mu si ohenda, a matuka, e ke mu tsakaneke, okwe mu idhingile mothingo nokwe mu thipi komilungu.” He ke shi tuu omunahenda noku na omwenyo omwaanawa, nota thaneke nawa Tate yetu gwomegulu, Jehova!

Osha yela kutya he onkalamwenyo yuuholume yomwana okwe yi uva nale. Ihe ote mu hambelele noinaa tegelela ando e mu fatululile okanima kehe. Jesus oku na wo ombepo yuunambili ya tya ngaaka, oshoka oku hole okupopya naalunde naateloni mboka taya thanekwa komumati a kanene meudhi ndika.

Dhoshili, he omunandunge meudhi lyaJesus okwa yelelwa kutya omumati gwe okwi iyela ombedhi sho e wete oshipala she sha nika oluhodhi, nosha teka omukumo sho ta galuka. Ihe sho he ta yi kuye nohole otashi shi ningi oshipu komumati a hempulule oondjo dhe, ngaashi Jesus ta hokolola: ‘Ihe omwana okwe mu lombwele: Tate, onda yono nomegulu nokungoye, ngame noinaandi gwana we okwiithanwa omumwoye. Taamba ndje ongomukalele gumwe gwoye.’

Ihe oohapu ndhika odha adhika owala opo tadhi zi mokana komumati ye he ota lombwele aapiya ye ta ti: “Ka eteni mbalambala onguwo ndjiyaka ombwanawa, mu yi mu zaleke, nokalinga ka zalekeni momunwe gwe noongaku koompadhi dhe; ne mu ka tale ko ompunya ndjiyaka yo ondodhwa, yi tseleni, tu lyeni, tse tu nyanyukweni, oshoka omumwandje nguka okwa li a sa nokwa yumuka, okwa li a kana nokwa monika.” Opo nduno otaya tameke “okunyanyukwa.”

Pethimbo opo tuu mpono, “omwana ngwiyaka omukuluntu okwa adhikile mepya.” Tala ngele oto vulu okumona kutya ye ota thaneke lye mokupulakena koshihupe shehokololo ndika. Jesus ota popi omumati omukuluntu e ta ti: “Ano sho e ya a thiki popepi negumbo, oku uvu mo olwiimbo nuudhano. Nokwi ithana [omupiya] gumwe nokwe mu pula sho shi li mo. Nguka okwa ti kuye: Omumwanyoko e ya, ho nokwe mu tselele ompunya ndjiyaka yo ondodhwa, sho e mu mono e na omwenyo. Oye nokwa gee, ye ina hala okuya mo megumbo, he e ya pondje ihe nokwe mu popitha nombili. Ihe oye a ti kuhe: Tala, omimvo odhindjidhindji nde ku longele nondaa na mpo nda yono oshipango shoye, ngoye inoo pa ndje nando okakombwena, ndi nyanyukwe nookuume kandje. Ihe omumwoye ngono a hanagula po emona lyoye moohonda, sho e ya, ngoye we mu tselele ompunya ndjiyaka yo ondodhwa.”

Oolye ngaashi omumati ngoka omukuluntu ya gandja uusama shi na ko nasha nesilohenda nosho wo eitulomo ndyoka lya pewa aalunde? Kaya li mbela aanongompango nAafarisayi? Molwashoka okugandja uusama kwawo sho Jesus ta hambelele aalunde oko kwe etitha eudhi ndika, osha yela kutya oyo taa thanekwa komumati omukuluntu.

Jesus ota hulitha ehokololo lye nokuhokolola he ngoka ta galikana omwanamati ngoka omukuluntu ta ti: “Omumwandje, ngoye wa kala aluhe pungame, naayihe yandje oyoye wo. Ihe ngashingeyi otu na okunyanyukwa, oshoka omumwanyoko ngu okwa li a sa nokwa yumuka, kwa li a kana nokwa monika.”

Ano Jesus ita popi shoka omumati omukuluntu lwahugunina ta ningi. Dhoshili, konahiya, konima yeso neyumuko lyaJesus, ‘ongundu onene yomaasaseri oya vulika keitaalo,’ tashi vulika mwa kwatelwa yamwe yomwaamboka ya li iilyo yongundu ‘yomumati omukuluntu’ mboka Jesus ta popi nayo mpaka.

Ihe oolye mbela methimbo ndika lyongashingeyi taa thanekwa kaamati mbaka yaali? Dhoshili, oyo mboka ya mona ontseyo ya gwana kombinga yomalalakano gaJehova opo ya kale nekankameno lyokuninga ekwatathano naye. Omumati omukuluntu ota thaneke iilyo yimwe ‘yomoshigunda oshishona,’ nenge ‘yegongalo lyaatango ya shangelwa megulu.’ Mbaka oya li ye na iikala ya faathana naambyoka yomumati omukuluntu. Kaya li ye na ehalo okuhambelela ongundu yokevi, “oonzi dhilwe,” ndjoka pakupopya kwawo ya li tayi pewa eitulomo olindji noonkondo.

Mepingathano naashono, omumati a kanene ota thaneke mboka yomoshigwana shaKalunga mboka taya yi ya ka nyanyukilwe omainyanyudho ngoka taga gandjwa kuuyuni. Ihe konima yethimbo otaya galuka yi iyela ombedhi notaya ningi ishewe aapiya yaKalunga yi ipyakidhila. Dhoshili, Tate ke shi tuu omunahole nomunalukeno kwaamboka ye wete kutya oya pumbwa edhiminopo notaya galukile kuye! Lukas 15:11-32; Levitikus 11:7, 8; Iilonga 6:7; Lukas 12:32; Aaheberi 12:23; Johannes 10:16.

▪ Eudhi nenge ehokololo ndika Jesus ote li hokololele oolye, nomolwashike?

▪ Olye ta dhana onkandangala onene mehokololo ndika, nota ningilwa shike?

▪ Oolye yopethimbo lyaJesus taa thanekwa kuhe nokomumati nguka omushona?

▪ Ongiini Jesus ta holele oshiholelwa shahe omunamutimahenda gwomeudhi lye?

▪ Omumati omukuluntu ota tala ko ngiini omukalo ngoka omumwayina ta hambelelwa nagwo, nongiini Aafarisayi taya katuka ngaashi omumati omukuluntu?

▪ Ongiini eudhi lyaJesus lye eleka pethimbo lyetu?