Ontopolwa 113

Eifupipiko pOpaasa yahugunina

PETRUS naJohannes oya thika nale muJerusalem okuninga omalongekidho gOpaasa ngaashi ya lombwelwa kuJesus. Osha yela kutya Jesus pamwe naayapostoli yalwe omulongo otaya thiki komatango lela. Etango otali ningine mongengegulu sho Jesus nongundu ye taya londoloka kondundu yOomono. Shika osho oshikando shahugunina sigo okonima yeyumuko lye, Jesus ta tala oshilando omutenya e li kondundu ndjika.

Nziya Jesus nongundu ye otaya thiki moshilando notaya yi kegumbo hoka taya ka dhanena Opaasa. Otaya londo kiilyatelelo yu uka kondjugo yopombanda onene, hoka taya adha omalongekidho agehe ga ningwa nale omolwokudhana kwawo paumwene Opaasa. Jesus okwa kala a tegelela ompito ndjika, oshoka ota ti: “Onda yuulukwa nokuyuulukwa komwenyo okulya onzi ndjika yOpaasa pamwe nane, manga inaandi hepekwa.”

Pamuthigululwakalo, mboka taya dhana Opaasa ohaya nu iitenga yomaviinu ine. Konima sho Jesus ta kutha oshitenga shoka sha yela kutya osho oshitenga oshititatu, ota hambelele nota ti: “Shi kwateni, shi paathaneni. Oshoka oshili tandi mú lombwele: okonena itandi nu we miiyimati mbi yomuviinu, [uukwaniilwa waKalunga manga inau, KB] ya.”

Pompito yimwe pethimbo lyomatelekela, Jesus ota thikama, ta hula mo onguwo ye yokombanda, ta kutha oshihanduke e ta tula omeya moshiyaha. Pandjigilile, omuhiyi gwaayenda oye e na okusa oshimpwiyu oompadhi dhaayenda dhi yogwe. Ihe molwashoka pompito ndjino kapu na omuhiyi gwaayenda, Jesus shika ote shi ningi ye mwene. Kehe gumwe gwomaayapostoli okwa li ta vulu okulongitha ompito oku shi ninga, ihe kapu na ngoka te shi ningi molwashoka osha yela kutya mokati kawo omu na natango ondumbo. Ngashingeyi oya sa ohoni sho Jesus ta tameke okuyoga oompadhi dhawo.

Sho Jesus te ya puye, Petrus ote mu pataneke ta ti: “Ku na mpoka to yogo oompadhi dhandje.”

“Ngele itandi ku yogo, ku na sha nangame,” Jesus ta ti.

“Omuwa,” Petrus ta yamukula, “haampadhi dhandje adhike, niikaha wo nomutse.”

“Ngoka a yogwa,” Jesus ta yamukula, “ina pumbwa shilwe, okuyogwa kwoompadhi adhike nokwa yogekeka ihe; one nomwa yogoka, ihe hane amuhe.” Shika ote shi popi molwashoka oku shi kutya Judas Iskariot okwa ninga po elongekidho oku mu gwaaleka.

Sho Jesus a yogo oompadhi dhaamboka 12 ayehe, mwa kwatelwa oompadhi dhomugwaaleki gwe, Judas, ota zala onguwo ye yokombanda e ta kuutumba ishewe poshililo. Opo nduno ota pula ta ti: “Omu uvite ko tuu shoka nde shi mú ningile? Ohamu ithana ndje omuhongi nOmuwa nohamu popi dhu uka, oshoka ongame tuu nguka. Ano ongame Omuwa nomuhongi gweni, ngele nde mú yogo oompadhi dheni, nane wo mu na okuyogathana oompadhi; oshoka ongame nde mú pe oshiholelwa, mu ninge wo [ngangame] nde mú ningile. Oshili, oshili tandi mú lombwele: omulelwa ke vule omuwa gwe, nomutumwa ke vule omutumi gwe. Shika ngele mu shi shi, one aanelago, nge tamu shi ningi.”

Oshiilongomwa shokulonga neifupipiko kashi shi tuu oshiwanawa! Aayapostoli kaye na okukala ya hala okukala pehala lyotango, taya dhiladhila kutya yo oya simana noonkondo onkene yalwe oye na oku ya longela aluhe. Oye na okulandula oshiholelwa shoka Jesus a tula po. Shika kashi shi shimwe shomomulandulwakalo gwokuyoga oompadhi. Aawe, ihe osho oshiholelwa shokulonga nehalo ewanawa waa na okayoya, kutya nduno iilonga yanathangwa nenge iilonga kaayi shi iiwanawa. Mateus 26:20, 21; Markus 14:17, 18; Lukas 22:14-18; 7:44; Johannes 13:1-17.

▪ Oshike shi li shimwe shi ili shi na ko nasha netaloko lyaJesus sho ta tala Jerusalem manga ta yi moshilando oku ka dhana Opaasa?

▪ Pethimbo lyOpaasa, osha yela kutya oshitenga shini Jesus ta pe aayapostoli 12 konima sho a hambelele?

▪ Pandjigilile eyakulo lini lyopaumwene lya li hali yakulwa nalyo aayenda sho Jesus a li kombanda yevi nomolwashike sha li inaashi ningwa pethimbo lyOpaasa ndjoka ya dhanwa kuJesus naayapostoli?

▪ Oshike sha li elalakano lyaJesus mokulonga iilonga ya fa mbyoka hayi longwa komukalele yokuyoga oompadhi dhaayapostoli ye?