Ontopolwa 50

Eilongekidho lyokutaalela omahepeko

KONIMA sho Jesus a lombwele aayapostoli ye nkene iilonga yeuvitho tayi longwa, ote ya londodha kombinga yaapataneki. Ota ti: “Tala, ongame otandi mú tumu ongoonzi mokati komambungu . . . Angaleni aantu, oshoka otaye mú gandja kiigongi yaapanguli notaye mú dhengele moosinagoga dhawo; notamu ka falwa komalenga nokaakwaniilwa omolwandje.”

Nonando aalanduli ye otaya ka taalela omahepeko omadhigu, Jesus ote ya ngungumaneke neuvaneko ndika: “Ihe nge taye mú gandja kaatokoli, inamu kala noshimpwiyu, mu tye ngiini nenge mu popye shike, oshoka one tamu pewa ethimbo tuu ndyoka ndhoka mu na oku dhi popya. Oshoka hane tamu popi, aawe, Ombepo yaHo ta popi mune.”

Jesus ota tsikile ta ti: “Nomumwayina ta gandja omumwayina mokusa, nahe omwana, naanona otaa ka tsa ondumbo naakuluntu yawo notaye ya dhipaga.” Ota gwedha po: “Nedhina lyandje otamu ke li tondelwa kwaayehe; ihe oongoka ti idhidhimike sigo ehulilo, oye ta hupithwa.”

Iilonga yeuvitho oya simana noonkondo. Omolwashoka Jesus ta tsu omuthindo kutya osha pumbiwa okukatuka pandunge opo ya kale ya manguluka okulonga iilonga mbika. “Ihe nge taye mú tidhagana moshilando shimwe,” ye ta ti, “tembukileni kushilwe; oshoka oshili tandi mú lombwele: one itamu mana okweenda iilando ayihe yaIsrael, sigo Omuna gwOmuntu te ya.”

Oshoshili kutya Jesus elombwelo ndika, ndyoka li li wo elondodho neladhipiko okwe li pe aayapostoli ye 12, ihe olya li wo lya dhiladhililwa mboka taya ka kutha ombinga miilonga yeuvitho muuyuni auhe konima yeso neyumuko lye. Shika otashi ulikwa kokupopya kwe kutya aalongwa ye otaya ka ‘tondwa kwaayehe,’ hakAaisrael ayeke hoka aayapostoli taya tumwa ye ku uvithe. Niishewe, osha yela kutya aayapostoli kaya li ya falwa komalenga nokaakwaniilwa sho Jesus e ya tumu moshikonga shawo oshifupi shokuuvitha. Kakele kaashono, pethimbo ndyono ooitaali kaya li haya gandjwa kaakwanezimo opo ya dhipagwe.

Ano sho Jesus ta ti kutya aalongwa ye itaya ka mana olweendo lwawo lweuvitho “sigo Omuna gwOmuntu te ya,” ye okwe tu lombwele pahunganeko kutya aalongwa ye itaya ka mana olweendo lwokuuvithila evi alihe hali kalwa shi na ko nasha nedhiko lyUukwaniilwa waKalunga manga Omukwaniilwa omwaadhimithwa Jesus Kristus ine ya puHarmagedon e li omupanguli a tulwa po kuJehova.

Jesus ota tsikile nokugandja omalombwelo ge geuvitho, ta ti: “Omulongwa ke vule omulongi gwe, [nomupiya] ke vule mwene gwe.” Ano aalanduli yaJesus oye na okutegelela okuningwa nayi nokuhepekwa ngaashi ye a li e shi ningilwa molwokuuvitha Uukwaniilwa waKalunga. Ihe ote ya kumagidha ta ti: “Inamu tila mboka taa dhipaga olutu, yo itaa vulu okudhipaga omwenyo; aawe, tileni shili oonguka ta vulu okuyonagulila [moGehenna, NW] omwenyo nolutu.”

Jesus okwa li ta ka tula po oshiholelwa moshinima shika. Okwa li te ki idhidhimikila eso kee na uumbanda pehala lyokweetha uudhiginini we muNgoka e na oonkondo adhihe, Jehova Kalunga. Eeno, Jehova oye ta vulu okuhanagula po “omwenyo” gwomuntu (ngoka moshinima shika tagu ti etegameno lyoye lyomonakuyiwa u li omwenyo gu na omwenyo) nenge pehala lyaashono ta vulu okuyumudha omuntu a nyanyukilwe omwenyo gwaaluhe. Jehova ke shi tuu Tate gwomegulu omunahole nomunamutimahenda!

Jesus ota tsikile ta ladhipike aalongwa ye neudhi ndyoka tali tsu omuthindo nkene Jehova te ya sile oshimpwiyu pahole. “Omanza gaali ihaga landwa andola okapeni kamwe akeke?” ye ta pula. “Ihe kaku na nando olimwe tali gwile pevi, Ho ngele ina hala. Nomafufu geni agehe gokomutse oga yalulwa wo. Ano inamu tila; one mu vule omanza ogendji.”

Etumwalaka lyUukwaniilwa ndyoka Jesus ta lombwele aalongwa ye ye ke li uvithe, otali ka topola omaukwanegumbo, uuna iilyo yontumba yuukwanegumbo tayi ke li taamba ko nayilwe tayi ke li ekelahi. “Inamu tya, ongame nde ya, ndi ete ombili kombanda yevi,” ye ta yelitha. “Aawe; inandi ya okweeta ombili, ihe egongamwele.” Otashi pula ano uulaadhi koshilyo shuukwanegumbo okutaamba ko oshili yOmbimbeli. “Oongoka e hole he nenge yina e mu vulile ndje, oye ino opalela ndje,” Jesus ta ti, “naangoka e hole omwana omumati nenge omwana omukadhona e mu vulile ndje, oye ino opalela ndje.”

Pehulilo lyokugandja omalombwelo ge, Jesus ota yelitha kutya mboka taya taamba ko aalongwa ye naye otaye mu taamba wo. “Noshaa ngoka ta nwetha gumwe gwaambaka aafupi oshitenga shomeya omatalala omolwedhina lyomulongwa, oshili tandi mú lombwele: oye ita kala ina mona ondjambi ye.” Mateus 10:16-42.

▪ Omalondodho geni Jesus ta pe aalongwa ye?

▪ Eladhipiko nehekeleko lini te ya pe?

▪ Omolwashike omalombwelo gaJesus taga longo wo kAakriste yonena?

▪ Okomukalo guni omulongwa gwaJesus kee vule omulongi gwe?