Ontopolwa 36

Eitaalo enene lyelenga omunethele

SHO Jesus ta ningi Euvitho lye lyokOndundu, oku li konyala ondjilakati nuukalele we womontaneho. Shika otashi ti kutya okwa li owala e na ko omvula noomwedhi omugoyi lwaampono okuhulitha po iilonga ye kombanda yevi.

Ngashingeyi Jesus ota yi moshilando Kapernaum, shoka osho ontandagumbo yomaipyakidhilo ge. Mpaka aalumentu aakuluntu yomAajuda otaye ya kuye taye mu indile. Oya li ya tumwa kelenga lyomatanga gaakwiita lyaRoma, omulumentu gwomomuhoko gwi ili kee shi Omujuda.

Omukalele omuholike gwelenga omunethele oku li pokusa komukithi gwa kwata miiti, nolya hala Jesus a aludhe omukalele gwalyo. Aajuda otaye mu galikana ya mana mo molwelenga: “Okwa gwana okukwathwa kungoye,” yo taya ti, “oshoka e hole oshigwana shetu nokwe tu tungile osinagoga.”

Pwaahe na okukakadhala, Jesus ota yi pamwe naalumentu mboka. Ihe sho taye ya popepi, elenga omunethele ota tumu ookuume ke ye mu lombwele taya ti: “Omuwa, ino ihepeka owala, oshoka ongame inaandi opala, u ye mondunda yandje, onkee ndi itala inaandi opala, ndi ye mwene kungoye.”

Oohapu dhelenga ndyoka lyi igilila okugandja omalombwelo kuyalwe kadhi shi tuu dheifupipiko! Ihe otashi vulika tali dhiladhila wo Jesus, li shi kutya omukalondjigilile otagu indike Omujuda a kale e na ekwatathano lyopankalathano naangoka kee shi Omujuda. Nokuli Petrus okwa tile: “One mu shi shi, okweendathana nomukwiilongo nokuya kuye okwo oshidhila shomulumentu Omujuda.”

Tashi vulika elenga inali hala Jesus a mone iihuna yiilanduliko yokuyona omukalondjigilile nguka, nomolwashoka elenga tali tumu ookuume kalyo ye mu indile: “Popya oohapu, [omupiya] gwandje nota aluka. Oshoka nangame wo omupangelwa, nondi na aakwiita mepangelo lyandje notandi lombwele nguka: Inda; e ta yi, nomukwawo: Ila; e te ya, [nokomupiya] gwandje: Shi longa, note shi longo.”

Ano Jesus sho te dhi uvu, okwa kumwa. “Oshili tandi mú lombwele,” ye ta ti, “mAaisrael inandi mona [mo] nando ogumwe e na eitaalo li thike pundika.” Konima sho Jesus a aludha omukalele gwelenga, ota longitha ompito okuhokolola nkene mboka kaaye shi Aajuda ihe oye na eitaalo taya ka pewa omalaleko nuuyamba ngoka ge ekelwahi kAajuda mboka kaaye na eitaalo.

“Otaku zi oyendji,” Jesus ta ti, “kuuzilo nokuuninginino, notaa ka lya pamwe naAbraham naIsak naJakob [muukwaniilwa womegulu; ihe aana yuukwaniilwa, KB] otaa ka undulilwa momilema dhopondjelela; omo tamu ka kala elilagano neikokoto lyomayego.”

“Aana yuukwaniilwa,” mboka “[taa] ka undulilwa momilema dhopondjelela” oyo Aajuda yopaunshitwe mboka inaaya taamba ko ompito ndjoka ya pewa tango yokukala aapangeli pamwe naKristus. Abraham, Isak naJakob otaya thaneke elongekidho lyUukwaniilwa waKalunga. Onkee ano Jesus ta hokolola nkene mboka kaaye shi Aajuda taya ka taambwa okukuutumba pathaneko koshitaafula shomegulu, “muukwaniilwa womegulu.” Lukas 7:1-10; Mateus 8:5-13; Iilonga 10:28.

▪ Omolwashike Aajuda taye mu galikana molwelenga omunethele ngoka kee shi Omujuda?

▪ Oshike tashi vulika osho etompelo molwashike elenga inaali ithana Jesus a ye megumbo lyalyo?

▪ Jesus okwa hala okutya shike noohapu dhe dhahugunina?