Ontopolwa 68

Elongo tali tsikile mesiku etiheyali

ESIKU lyahugunina lyOshituthi shOmatsali, esiku etiheyali, otali dhanwa natango. Jesus ota longo moshitopolwa shotempeli shoka hashi ithanwa ‘oshiketha shiigandjiwa yotempeli.’ (KB) Osha yela kutya shika oshi li moshitopolwa shoka hashi ithanwa Ehale lyAakiintu moka mu na iiketha yokutulwa omayambidhidho kaantu.

Ongulohi kehe pethimbo lyoshituthi, ohapu temwa oolamba oonene okuminikila moshitopolwa shika shotempeli. Iihukikwanyeka ine iinene ohayi tulwa mpaka, kehe shimwe shi na iiyaha ine iinene yu udha omahooli. Uuyelele wiihukikwanyeka mbika, mbyoka tayi temithwa komahooli gomiiyaha 16, owa yela sha gwana okuyeleka oshitopolwa ashihe uusiku. Shoka Jesus ta popi ngashingeyi, otashi vulika tashi dhimbulukitha aapulakeni ye kombinga yeminikilo ndika. “Ongame uuyelele wuuyuni,” Jesus ta yelitha. “Oongoka ta landula ndje, ite ende momilema, ihe ota kala e na uuyelele womwenyo.”

Aafarisayi otaya patana taya ti: “Ongoye to ihokolola; ehokololo lyoye kali shi kwiinekelwa.”

Jesus ota yamukula ta ti: “Nando tandi ihokolola, ehokololo lyandje oli shi kwiinekelwa, oshoka ongame ndi shi shi nkoka nda za naankoka tandi yi; ihe one kamu shi mpoka nda za [naampoka] tandi yi.” Ota gwedha ko ta ti: “Ongame ngoka tandi ihokolola mwene, naTate ngoka a tumu ndje, oye ta hokolola ndje.”

“Ho oku li peni?” Aafarisayi oya hala oku shi tseya.

“Kamu shi ndje, naTate kamu mu shi,” Jesus ta yamukula. “Andola mu shi ndje, ando naTate mu mu shi.” Nonando Aafarisayi oya hala natango okukwatitha Jesus, kapu na gumwe te mu gumu.

“Ongame tandi [yiilile],” Jesus ta ti ishewe. “Konima nkoka tandi yi ko, kamu vulu okuya ko.”

Opo nduno Aajuda otaya tameke okwiipula: “Oti idhipaga ando, sho ta ti: Konima nkoka tandi yi, kamu vulu okuya ko?”

“One yopevi,” Jesus ta yelitha. “Ongame gwokombanda; one yomuuyuni mbuka, ihe ongame kandi shi gwomuuyuni mbuka.” Opo nduno ota gwedha ko ta ti: “Oshoka ngele itamu itaale nokutya ongame tuu ngoka, otamu sile moondjo dheni.”

Dhoshili, Jesus ota popi kombinga yokukala po kwe manga inaa ninga omuntu nosho wo okukala kwe e li Messias nenge Kristus omuuvanekwa. Ihe nonando ongaaka, osha yela kutya otaya pula nondhino onene taya ti: “Ongoye lye ano?”

Molwashoka oye mu ekelahi, Jesus ota yamukula ta ti: “Omolwashike tandi popi nokuli nane?” (NW) Ihe ota tsikile ta ti: “Oonguka a tuma ndje, oye ogwashili, naashoka nde shi uvu kuye, otandi shi lombwele uuyuni.” Jesus ota tsikile ta ti: “Omuna gwOmuntu nge mwe mu yelutha pombanda, nena otamu ka dhimbulula, ongame tuu ngoka, nongaashi kandi ningi sha mungame mwene, ihe tandi popi ndhika ngaashi Tate a longo ndje. Naanguka a tumu ndje, oku li pungame. Oye ine etha ndje awike, oshoka handi longo aluhe shoka she mu opalela.”

Sho Jesus a popi iinima mbika, oyendji oye mu itaale. Ota ti kuyo: “Ngele tamu kala moohapu dhandje, one aalongwa yandje shili; notamu ka tseya ihe oshili, noshili otayi mú mangulula.”

“Otse oluvalo lwaAbraham,” aapataneki ye taye mu kwata melaka, “tse twaa na mpoka twa li aapika komuntu. Oto ti ngiini ano; One tamu ka mangululwa?”

Nonando Aajuda olundji oya li ya pangelwa kaapangeli yokiilongo yilwe, yo ihaya zimine nando oye omuthiminiki gumwe a kale e li omupangeli gwawo. Ohaya tindi okwiithanwa aapika. Ihe Jesus ote yu ulukile kutya yo oye li naanaa aapika. Opamukalo guni mbela? “Oshili, oshili tandi mú lombwele,” Jesus ta ti, “kehe tuu ngoka ta longo uulunde, oye omupika [gwuulunde].”

Okutinda okuzimina kutya oya pikwa kuulunde otaku fala Aajuda moshiponga. “Omupika iha kala aluhe megumbo,” Jesus ta yelitha. “Omwana ta kala mo aluhe.” Molwashoka omupika ke na uuthemba wokuthigulula, otashi vulika e li moshiponga shokutidhwa mo kehe ethimbo. Omwana owala ngoka a valwa muukwanegumbo nenge ta tekulwa mo, ta kala mo “aluhe,” sha hala okutya, shampa e na omwenyo.

“Ngele ano Omwana te mú mangulula,” Jesus ta tsikile, “nena otamu manguluka shili.” Kungeyi, oshili ndjoka tayi mangulula aantu oyo oshili yi na ko nasha nOmwana, Jesus Kristus. Omokupitila owala meyambo lyomwenyo gwe gwa gwanenena gwopantu kehe gumwe ta vulu okumangululwa muulunde mboka hau eta eso. Johannes 8:12-36.

▪ Jesus ota longo peni mesiku etiheyali? Oshike hashi ningwa po kongulohi hoka, nongiini shika shi na ekwatathano nelongo lyaJesus?

▪ Jesus ota ti shike kombinga yonakuziwa ye, naashika oshi na okuholola shike kombinga yuukwatya we?

▪ Omomukalo guni Aajuda ye li aapika, ihe oshili yini tayi ke ya mangulula?