Emoniko lyankene Kristus ta ka kala meadhimo lyUukwaniilwa we
Ontopolwa 60
Emoniko lyankene Kristus ta ka kala meadhimo lyUukwaniilwa we
JESUS opo a thiki miitopolwa yaKesarea Filippi, nota longo engathithi lyaantu mwa kwatelwa aayapostoli ye. Ote ya tseyithile etseyitho ndika tali kumitha: “Oshili tandi mú lombwele: ope na yamwe mokati kaambaka itaa makele eso, sigo taa mono okuya kwOmuna gwOmuntu muukwaniilwa we.”
‘Jesus okwa hala mbela okutya shike?’ aalongwa otashi vulika osho tayi ipula. Konima yoshiwike shimwe lwaampono Jesus ota kutha Petrus, Jakob naJohannes ya ye pamwe naye, notaya londo kondundu onde. Otashi vulika osho uusiku, oshoka aalongwa oya sa oomposi. Manga Jesus ta galikana, ota lunduluka montaneho yawo. Oshipala she otashi tameke tashi adhima ngetango, noonguwo dhe otadhi adhima nguuyelele.
Opo nduno otapu holoka omalupe ge li gaali, ngoka ga fa “Moses naElia,” notaga tameke okukundathana naJesus kombinga ‘yokuza po kwe te ke ku tsakanitha muJerusalem.’ Osha yela kutya okuza po hoka otaku ulike keso lyaJesus neyumuko lye tali landula ko. Ano oonkundathana ndhika otadhi ulike kutya eso lye tali mu shundula kali shi sha shoka shi shi okuyandwa, ngaashi Petrus a li a hala.
Ngashingeyi aalongwa oya tonata thiluthilu notaya tala e taya pulakene nonkumwe. Nonando shika osho emoniko, otashi monika lelalela kutya Petrus ota tameke okukutha ombinga musho nota ti: “Omuwa, opwe tu opalele okukala mpaka; ngele wa hala, otandi ka dhikila mpaka omatsali gatatu, limwe olyoye, limwe olyaMoses nalimwe olyaElia.”
Manga Petrus ta popi, oshikogo oshiyelele otashi ya siikile, newi otali zi moshikogo tali ti: “Omumwandje ngu omuholike, onde mu hokwa; mu uveni.” Sho aalongwa tayu uvu ewi, otaya tsu iipala yawo pevi. Ihe Jesus ota ti: “Thikameni, inamu tila.” Sho taye shi ningi, kaye wete nando gumwe kakele kaJesus.
Manga ye li mondjila taya kuluka kondundu esiku lya landula ko, Jesus ota ti kuyo: “Emoniko ndika inamu li hokololela nando omuntu, Omuna gwOmuntu manga ina yumuka kuusi.” Eholokopo lyaElia memoniko otali etitha epulo momadhiladhilo gaalongwa. “Aanongoraamata otaa ti ngiini ano, Elia e na okuya tango?” osho taya pula.
“Elia okwi ile,” Jesus ta ti, “ihe inaaye mu dhimbulula.” Ihe Jesus ota popi kombinga yaJohannes Omuninginithi, ngoka a gwanitha oshilonga sha faathana noshaElia. Johannes okwa longekidhile Kristus ondjila, ngaashi Elia e shi ningile Elisa.
Emoniko ndika itali koleke tuu Jesus nosho wo aalongwa ye! Oku shi popya pathaneko, emoniko ndika otali ulike nkene Kristus ta ka kala meadhimo lyUukwaniilwa we. Muushili wo wene, aalongwa oya mono “okuya kwOmuna gwOmuntu muukwaniilwa we,” ngaashi naanaa Jesus e shi uvaneke nale oshiwike sha tetekele. Konima yeso lyaJesus, Petrus okwa nyola kutya yo oya ‘tala nomeho gawo yene [eadhimo, NW] enene lyaKristus sho ya li pamwe naye kondundu ondjapuki.’
Aafarisayi oya pula Jesus endhindhiliko ngele olyo euliko kutya oye ngoka u uvanekwa mOmanyolo okukala Omukwaniilwa gwaKalunga omuhogololwa. Kaya li ya pewa endhindhiliko lya tya ngaaka. Mepingathano naashika, aalongwa ookuume kaJesus kopothingo oya pitikwa okumona eadhimitho lyaJesus opo omahunganeko gUukwaniilwa ga kolekwe. Ano Petrus konima yethimbo ota nyola ta ti: “Nonena tu na oohapu dhuuprofeti dha kolelela dhi vule dhonale.” Mateus 16:13, Mateus 16:28-17:13; Markus 9:1-13; Lukas 9:27-37; 2 Petrus 1:16-19.
▪ Yamwe otaya mono ngiini Kristus te ya mUukwaniilwa we manga inaaya makela eso?
▪ Okombinga yashike Moses naElia taya popi naJesus memoniko?
▪ Omolwashike emoniko ndika li li emoniko tali koleke aalongwa?
