Ontopolwa 74

Epukululo lyokupukulula Marta nelongo li na ko nasha nokugalikana

JESUS pethimbo lyuukalele we muJudea ota yi momukunda Betania. Moka omo mwa kala Marta, Maria nomumwayinamati gwawo Lasarus. Otashi vulika Jesus mbaka yatatu e ya tsakaneka nale muukalele we nonkee ano oku li nale kuume kawo kopothingo. Nonando ongawo, Jesus ota yi kegumbo lyaMarta, note mu hambelele.

Marta okwa halelela okuyakula Jesus naambyoka iiwanawa lela e na. Kashi li tuu shili esimano enene ngele Messias omuuvanekwa ta talele po omuntu megumbo lye! Onkee ano Marta okwi ipyakidhila noonkondo okuteleka omatelekela nosho wo okulongekidha iinima yilwe oyindji mbyoka tayi vulu okuninga okukala po kwaJesus kunyanyudha nokuhokitha.

Mepingathano naashono, Maria omumwayina gwaMarta okwa kuutumba poompadhi dhaJesus nota pulakene kuye. Konima yokathimbo, Marta ote ya kuJesus note mu lombwele ta ti: “Omuwa, ku na ko na sha nani, omumwameme sho ta yakulitha ndje ngame awike, mu lombwela, a kwathe ndje.”

Ihe Jesus ota tindi oku shi lombwela Maria. Mepingathano naashono, okwa pukulula Marta molwashoka ti ipula unene niinima yopanyama. “Marta, Marta,” te mu kumagidha nombili, “u na oshimpwiyu shoyindji nowa piyagana, ihe [iishona yi na oshilonga, NW], nenge shimwe ashike.” Jesus ota ti kutya inashi pumbiwa okulongitha ethimbo olindji mokuteleka iikulya oyindji yomaludhi gi ili nogi ili. Iikulya owala iishona nenge nokuli yoludhi lumwe oya gwana.

Marta oku na edhiladhilo ewanawa; okwa hala okukala omukiintu ha yakula nawa aayenda. Ihe molwashoka okwa sa oshimpwiyu shiinima yopanyama, okwa pitililwa po kokampito kokumona elongo lyopaumwene tali gandjwa kOmwana gwaKalunga mwene. Ano Jesus ota hulitha ta ti: “Maria okwi ihogololele ontumba ombwanawa itayi mu kuthwa.”

Konima yethimbo, pompito yilwe, omulongwa gumwe ota pula Jesus ta ti: “Omuwa, tu longa okugalikana, ngashika Johannes a longo aalongwa ye.” Otashi vulika omulongwa nguka kaa li po nale pwa pita konyala omvula netata sho Jesus a gandja oshiholelwa shegalikano mEuvitho lye lyOkondundu. Onkee ano Jesus ote endulula shoka a li a longo ihe ota hokolola nduno eudhi okutsa omuthindo nkene sha simana okudhiginina megalikano.

Jesus ota tameke ta ti: “Olye gwomune e na kuume ke te ya kuye pokati kuusiku e ta ti: Kuume kandje, pe ndje iikwiila itatu, oshoka kuume kandje a zi kondjila e ya kungame nondaa na sho tandi mu pakele po, ihe ngwiyaka gwomeni te mu yamukula e ta ti: Ino kudhila ndje, omweelo gwe edhilwa po, naamwandje ya lala pungame montala, kandi wapa okupenduka, ndi yi ku pe—otandi mú lombwele, [ngele ita penduka, e ku pe iikwiila mbyono omoluukuume weni naye, oku na okupenduka e te ku pe shoka we shi pumbwa omoluudhiginini woye woku mu indila, OB-1986].”

Mefaathanitho ndika Jesus ina hala okutya Jehova Kalunga ihi inyenge komaindilo, a fa ando kuume ngoka ta hokololwa mehokololo lye. Aawe, ihe ota yelitha kutya ngele kuume ngoka a li kee na ehalo oti inyenge komaindilo ngoka gaa na oluthuwo, itashi ka kala tuu oshipu noonkondo kuTate yetu omunahole gwomegulu! Onkee ano Jesus ta tsikile ta ti: “Nangame otandi mú lombwele: indileni, e tamu pewa, kongeni, e tamu mono, konkoleni, e tamu [egululwa]. Oshoka kehe tuu ngoka ti indile, ota pewa, naangoka ta kongo, ota mono, naangoka ta konkola, te [egululwa].”

Opo nduno Jesus ota popi kombinga yoohe yopantu mboka inaaya gwanenena noye li aalunde, ta ti: “Nolye gwomune ohe ngo, omwana nge te mu indile ohi, te mu pe eyoka peha lyohi, nenge te mu indile eyi, te mu pe ando ondje? Ano one aawinayi ngele mu shi okupa aana yeni iipewa iiwanawa, unene Ho yeni yomegulu ta gandja Ombepo Ondjapuki kumboka taye mu indile.” Dhoshili, Jesus ota gandja eladhipiko tali tsu omukumo okudhiginina megalikano. Lukas 10:38–11:13.

▪ Omolwashike Marta i ipyakidhila unene nokulongekidhila Jesus sha?

▪ Maria ota ningi shike, nomolwashike Jesus te mu pandula pehala lyokupandula Marta?

▪ Oshike sha ningitha Jesus e endulule shoka a longa nale kombinga yegalikano?

▪ Jesus ota yelitha ngiini nkene sha simana okudhiginina megalikano?