Ontopolwa 63

Epukululo tali tsikile

MANGA Jesus naayapostoli ye ye li natango megumbo muKapernaum, otapu kundathanwa sha kaashi shi omaludhi gaayapostoli kombinga yaangoka omukuluntu. Shika osho oshiningwanima shoka tashi vulika sha ningwa wo mondjila yokushuna kwawo kuKapernaum, sho Jesus a li kee po. Omuyapostoli Johannes ota hokolola ta ti: “Otwa mono ko gumwe a tidha mo oompwidhuli omedhina lyoye, ye ihe tu landula, otse notwe mu indike, oshoka ine tu landula.”

Osha yela kutya Johannes oha tala ko aayapostoli oyo awike ye li ongundu yaayaludhi mboka oyo ye na uuthemba wokwaaludha. Onkee ano ota dhiladhila kutya omulumentu ngoka okwa longo iilongankondo papuko molwashoka ye ke shi gwongundu yawo.

Ihe Jesus ote ya pukulula ta ti: “Inamu mu indika; oshoka kaku na [ngoka] ta longo oshilongankondo omedhina lyandje nota popi ndje nayi enkenke. Oshoka oongoka ke na ondumbo natse, oye okwa gama kutse. Oshoka oongoka te mú nwetha omeya oshitenga shimwe, oshoka one oyaKristus, oshili tandi mú lombwele; oye ita kala ina pewa ondjambi ye.”

Kasha li sha pumbiwa komulumentu nguka okulandula Jesus palutu okugama kombinga ye. Egongalo lyopaKriste kalya li natango lya totwa, ano sho kee shi gwomongundu yawo, itashi ti kutya ye okwa li gwomegongalo lyi ili. Omulumentu okwa li i itaala shili medhina lyaJesus nomolwashoka a li ta vulu okutidha mo oompwidhuli. Okwa li a ningi sha shoka sha tsa kumwe naashoka Jesus a ti osha gwana okupewa ondjambi. Jesus otu ulike kutya moku shi ninga, ita ka kanitha ondjambi ye.

Ihe ongiini mbela ando omulumentu okwa pundukithilwe koohapu nokiilonga yaayapostoli? Shika osha li tashi ka kala oshinima sha kwata miiti noonkondo! Jesus ota ti: “Naangoka ta [pundukitha, NW] gumwe gwaambaka aashona yi itaala ndje, andola ihwepo kuye, ando a [mangelwe] emanya lyoshini mothingo ye, ye [u umbilwe] mefuta.”

Jesus ota ti kutya aalanduli ye monkalamwenyo yawo oye na okukutha mo shaashono tashi vulu oku ya pundukitha, nonando onashi kale shi holike ngaashi oshikaha, ompadhi nenge eho. Oshi li hwepo okukala waa na oshinima shika shi holike nokuya mUukwaniilwa waKalunga shi vulithe okukala we shi kakatela nokuumbilwa muGehenna (ondumba yiiyagaya tayi pi popepi naJerusalem), ndjoka tayi thaneke ehanagulo lyaaluhe.

Jesus ota londodha wo ta ti: “Italeni, mwaa dhine nando okamwe kaambuka uushona; oshoka ongame tandi mú lombwele, aayengeli yawo megulu ohaa tala aluhe oshipala shaTate megulu.” Opo nduno ota yelitha nkene “uushona” u na ondilo mokuhokolola kombinga yomulumentu ngoka e na oonzi ethele, ihe tapu kana yimwe. Jesus ota yelitha kutya omulumentu ote etha ndhoka 99 oku ka konga ndjoka ya kana, nonokutya uuna te yi mono, ota ka kala e yi nyanyukilwa noonkondo shi vulithe ndhoka 99. “Osho tuu,” Jesus ta ti nduno lwahugunina, “kali shi ehalo lyaTate yomegulu, ku kane nando okamwe kaambuka uushona.”

Otashi vulika Jesus ta dhiladhila kombinga yomaludhi mokati kaayapostoli ye sho te ya ladhipike ta ti: “Kaleni mu na omongwa mune yene, ne mu kale mu na ombili mokati keni.” Omongwa ohagu ningi iikulya mbyoka kaayi na omulyo ya towala. Ano omongwa gwopathaneko ohagu ningi oohapu dhaantu oompu okutaambwa. Ngele omuntu oku na omongwa gwa tya ngaaka, otashi ka kwatha okukaleka po ombili.

Ihe molwokwaahagwanenena kwopantu oompata dha kwata miiti omathimbo nomathimbo ohadhi holoka po. Jesus ota gandja wo iikwatiketi yankene tu na oku dhi kandula po. “Omumwanyoko nge ta yono kungoye,” Jesus ta ti, “inda u ke mu pukulule mu li po amuke yaali; nongele te ku uvu, nena ongoye wa likola omumwanyoko.” Ngele ite ku uvu ko, Jesus ta kumagidha, “ki ithane ko nge gumwe nge yaali, oohapu adhihe opo dhi tokolwe komakana goonzapo yaali nenge yatatu.”

Jesus ota ti kutya ongele owala ayihe mbyoka itaayi kwatha, oshinima shi na okufalwa ‘kegongalo,’ sha hala okutya, kaatonateli yegongalo ye na oshinakugwanithwa mboka taya vulu okugandja etokolo lyopampangu. Ngele nakuyona ina hala okuvulika ketokolo lyawo, ano lwahugunina Jesus ota ti, “mu tala ngomupagani nongomuteloni.”

Aatonateli oye na okukala ya kakatela thiluthilu omalombwelo gomOohapu dhaJehova uuna taya ningi etokolo lya tya ngaaka. Uuna taya mono kutya omuntu okwa yona nokwiilongela okugeelwa, ano epangulo otali ka kala nale ‘okumangwa megulu.’ Nuuna taya ‘mangululwa kombanda yevi,’ sha hala kutya omuntu ta monika kee na ondjo, ota ka kala a ‘mangululwa megulu.’ Mekwatathano noonkundathana dhopampangu dha tya ngaaka Jesus ota ti: “Mpoka ku na yaali nenge yatatu ya gongala medhina lyandje, ongame ondi li mokati kawo.” Mateus 18:6-20; Markus 9:38-50; Lukas 9:49, 50.

▪ Omolwashike pethimbo lyaJesus kaasha li sha pumbiwa okweenda pamwe naye?

▪ Okupundukitha okashona osha kwata miiti ngiini, nongiini Jesus ta yelitha esimano lyuushona wa tya ngaaka?

▪ Oshike tashi vulika osho tashi inyengitha Jesus a tse omukumo aayapostoli ye ya kale ye na omongwa muyo?

▪ Iitya “manga” na “mangulula” otayi ti shike?