Ontopolwa 28

Epulo kombinga yokwiidhilika iikulya

OPWA pita konyala omvula okuza sho Jesus a li a kala pOpaasa yomo 30 E.N. Ngashingeyi Johannes Omuninginithi oku li mondholongo oomwedhi odhindji. Nonando okwa li a hala aalongwa ye ya ninge aalanduli yaKristus, haayehe ya ningi.

Ngashingeyi yamwe yomaalongwa mbaka yaJohannes omukwatwa otaye ya kuJesus notaya pula: “Otse naafarisayi ohatu idhilike iikulya olwindji; oshike aalongwa yoye ihaye yi idhilike?” Aafarisayi ohayi idhilike iikulya lwaali moshiwike shi li omulandulwakalo gwelongelokalunga lyawo. Naalongwa yaJohannes otashi vulika taya landula omukalondjigilile ogwo tuu ngoka. Otashi vulika wo okwiidhilika iikulya kwawo ku na ko nasha nokunika uuthigwa omolwokukwatwa kwaJohannes notayi ipula kutya omolwashike aalongwa yaJesus itaayi idhilike iikulya pamwe nayo mokuulika oluhodhi huka.

Meyamukulo Jesus ota yelitha ta ti: “Iinkumbi otaa wapa ngiini okunika uuthigwa, manga ombushiki e li puyo? Omasiku tage ya ihe, ombushiki te ya kuthwa, nena otaa idhilike iikulya.”

Aalongwa yaJohannes oye na okudhimbulukwa kutya Johannes ye mwene okwa popile kutya Jesus oye Ombushiki. Onkee ano manga Jesus opo e li, Johannes ite ke shi tala ko shu uka okwiidhilika iikulya, naalongwa yaJesus kaye na wo oku shi ninga. Konima yethimbo, ngele Jesus a si, aalongwa ye opo taya ka nika uuthiga nokwiidhilika iikulya. Ihe uuna ta yumuka e ta londo a ye megulu, itayi idhilike we iikulya omolwokunika uuthigwa.

Jesus ota gandja ishewe omaudhi ngaka: “Kaku na ngoka ta andeke onguwo onkulu noshaando oshipe, oshoka oshaando sha tya ngeyi otashi tuula onguwo, nombululu tayi ningi onene yi vule yonale. Nomaviinu omape ihaga zilwa moompunda oonkulu; oshoka oompunda otadhi tuuka, nomaviinu taga tika mo, noompunda otadhi yonuka po; ihe omaviinu omape ohaga zilwa moompunda oompe, ayihe iyali notayi hupu.” Omaudhi ngano mbela oge na ko nasha nashike nokwiidhilika iikulya?

Jesus okwa li ta kwathele aalongwa yaJohannes Omuninginithi ya mone kutya kapu na ngoka e na okutegelela aalanduli ye ya vulike komikalondjigilile omikulu dhOshijuda, ngaashi omulandulwakalo gwokwiidhilika iikulya. Ye ine ya okwaandeka nokukaleka po onkalelo onkulu yelongelokalunga ndyoka lya li pokweekelwahi. Uukriste kawa li wa ningwa u tse kumwe nelongo lyOshijuda lyopethimbo ndyono pamwe nomithigululwakalo dhalyo dhaantu. Aawe, itashi ka kala ngaashi oshaando oshipe konguwo onkulu nenge ngaashi omaviinu omape mompunda onkulu. Mateus 9:14-17; Markus 2:18-22; Lukas 5:33-39; Johannes 3:27-29.

▪ Oolye tayi idhilike iikulya, nonelalakano lyashike?

▪ Omolwashike aalongwa yaJesus itaayi idhilike iikulya manga e li pamwe nayo, nongiini konima yethimbo shoka tashi yi idhilikitha iikulya tashi ka nena po mbala?

▪ Omaudhi geni Jesus ta hokolola, notaga ti shike?