Ontopolwa 90

Etegameno lyeyumuko

LWAHUGUNINA Jesus ote ya kooha dhaBetania, omukunda gu li ookilometa ndatu lwaampono okuza muJerusalem. Opwa pita owala omasiku omashona okuza peso nefumviko lyaLasarus. Aamwayina aakiintu Maria naMarta oya nika natango oluhodhi, naantu oyendji oya li ye ya kaandjawo oku ya hekeleka.

Manga ye li mokunika oluhodhi, omuntu gumwe ota lombwele Marta kutya Jesus oku uka maandjawo. Onkee ano Marta ota yi te endelele e ke mu tsakaneke nosha yela kutya ine shi lombwela omumwayina. Sho Marta ta thiki puJesus, ote mu lombwele shoka ye nomumwayina tashi vulika ya kala haya popi olundji omasiku gane ga piti po, ta ti: “Omuwa, andola ongoye wa li po, ando omumwameme ina sa.”

Ihe Marta ota popi e na etegameno nota dhiladhila kutya Jesus natango otashi vulika a ningile sha omumwayina. Ota ti: “Nongashingeyi ondi shi shi, shaa shoka to indile Kalunga, Kalunga ote shi ku pe.”

Jesus ote mu uvanekele ta ti: “Omumwanyoko ota yumuka.”

Marta oku shi kutya Jesus ota popi kombinga yeyumuko lyomonakuyiwa kombanda yevi, ndyoka Abraham nosho wo aapiya yalwe yaKalunga ya kala ye li tegelela. Omolwashoka ta yamukula ta ti: “Ondi shi shi, ota yumuka meyumuko esiku lyahugunina.”

Ihe Jesus ota gandja etegameno lyetalaleko lyombalambala mokuyamukula ta ti: “Ongame eyumuko nomwenyo.” Ota dhimbulukitha Marta kutya Kalunga okwe mu pa oonkondo dhokupangela eso nota ti: “Oongoka i itaala ndje, oye ta kala e na omwenyo, nando na kale a sa. Nakehe tuu ngoka e na omwenyo nokwi itaala ndje, ke na mpo ta si sigo aluhe.”

Jesus ita lombwele Marta kutya aadhiginini mboka ya li ye na omwenyo pethimbo mpoka itaya ka sa we. Aawe, ihe ota ti kutya okukala u na eitaalo tali longo muye otashi vulu okufala komwenyo gwaaluhe. Onkalamwenyo ya tya ngaaka otayi ka nyanyukilwa kaantu oyendji yi li oshizemo shokuyumudhwa kwawo esiku lyahugunina. Ihe yalwe mboka ya dhiginina otaya ka hupa mehulilo lyonkalelo ndjika yiinima kombanda yevi, nokwaambaka oohapu dhaJesus otadhi ka kala tadhi ti sha shili mondunge yolela. Itaya ka sa nandonando! Konima yepopyo ndika endhindhilikwedhi, Jesus ota pula Marta ta ti: “Owe shi itaala?”

Ota yamukula: “Eeno, Omuwa, ondi itaala, ongoye Kristus, Omuna gwaKalunga, oongoka te ya muuyuni.”

Opo nduno Marta ota shuna te endelele e ki ithane omumwayina note mu lombwele yi ikalela ta ti: “Omuhongi oku li mpaka note ku ithana.” Mbalambala Maria ota piti mo megumbo. Sho yalwe ye mu wete ta yi, otaye mu landula notaya dhiladhila kutya ota yi kombila.

Sho Maria ta thiki puJesus, ota tsu oongolo koompadhi dhe ta lili. Ote mu lombwele ta ti: “Omuwa, ando wa li mpaka, ando omumwameme ina sa.” Jesus okwe eta ohenda noonkondo sho e wete Maria nomangathithi gaantu ngoka ge mu landula taya lili. “Omwe mu langeka peni?” te ya pula.

“Omuwa, ila, u tale,” osho taya yamukula.

Jesus ota tameke wo ta lili, notashi ningitha Aajuda ya tye: “Tala, nkene kwa li e mu hole!”

Yamwe otaya dhimbulukwa kutya pOshituthi shOmatsali oomwedhi dhontumba dha piti, Jesus okwa aludhile omulumentu omugundjuka ngoka a li a valwa omuposi, notaya pula taya ti: “Oye tuu nguka a tonatitha omeho gomuposi, okwa nyengwa ando okuninga nguka, a kale ina sa”? Johannes 5:21; 6:40; 9:1-7; 11:17-37.

▪ Uunake lwahugunina Jesus a thiki popepi naBetania, nonkalo oya li ngiini hoka?

▪ Ekankameno lini lyokwiitaala meyumuko Marta e na?

▪ Jesus okwa gumwa ngiini keso lyaLasarus?