Ontopolwa 100

Eudhi lyooponda

OTASHI vulika Jesus e li natango megumbo lyaSakeus, moka a li a vululukwa po mondjila yokuya kuJerusalem. Aalongwa ye oyi itaala kutya ngele ya thiki kuJerusalem, ota ka tseyitha kutya oye Messias nota ka dhika Uukwaniilwa we. Opo a opaleke edhiladhilo ndika noku ulike kutya Uukwaniilwa ou li natango kokule, Jesus ota hokolola eudhi.

Ota hokolola ta ti: “Okwa li ku na omulumentu omuvalekele e ta yi koshilongo shokokule, a ka ningwe omukwaniilwa, ye a galuke.” (OB-1986) Jesus oye “omulumentu omuvalekele,” negulu olyo ‘oshilongo shokokule.’ Sho Jesus ta thiki hoka, He ote ke mu pa oonkondo dhopaukwaniilwa.

Ihe manga inaa ya, omulumentu omuvalekele okwi ithana omalenga ge omulongo nokwe ga pe kehe limwe ooponda dhiisiliveli e ta ti: “Dhi halitheni sigo tandi ya.” Megwanitho lyotango, omalenga omulongo otaga thaneke aalongwa yaJesus yonale. Ihe megwanitho enene, otaga thaneke ayehe mboka ye na etegameno okukala aathigululi yUukwaniilwa womegulu pamwe naye.

Ooponda dhiisiliveli odho iimaliwa yi na ongushu, kehe shimwe oshi thike konyala pondjambi yoomwedhi ndatu yomulongi gwomepya. Ihe oshike tashi thanekwa kooponda? Nokuhalitha kuni omalenga ge na oku dhi halitha po?

Ooponda otadhi thaneke iiniwe mbyoka aalongwa mboka ya valwa pambepo taya vulu okulongitha okwe eta mo aathigululi oyendji yUukwaniilwa womegulu sigo Jesus te ya e li Omukwaniilwa mUukwaniilwa wu uvanekwa. Konima yokuyumuka kwe nokwi ihololela kwe aalongwa ye, okwe ya pe ooponda dhopathaneko okuninga aalongwa oyendji opo ongundu yUukwaniilwa womegulu yi indjipale.

Jesus ota tsikile ta ti: “Ihe aantu yomoshilongo she [omulumentu omuvalekele, OB-1986] oye mu tondo noye mu landulitha aatumwa ye mu lombwele: Nguka inaatu mu hala, e tu pangele.” Aantu yomoshilongo oyo Aaisrael nenge Aajuda, inaamu kwatelwa aalongwa ye. Konima sho Jesus a yi megulu, Aajuda mbaka mokuhepeka aalongwa ye oyu ulike kutya kaya li ya hala a kale omukwaniilwa gwawo. Komukalo nguka oya li ya katuka ngaashi aantu yomoshilongo mboka ya tumu aatumwa.

Omalenga omulongo mbela oga longitha ngiini ooponda dhago? Jesus ota yelitha ta ti: “Ano pwa ningi, sho a [ningwa omukwaniilwa, OB-1986] nokwa galuka ko, okwa lombwele omalenga ngeyaka e ya pe iimaliwa, naa ye kuye, a tseye shoka ye shi likola mokulandakanitha. Gwotango okwe ya mo ihe nokwa ti: Omuwa, oponda yoye ya likolitha ooponda omulongo. Oye nokwe mu lombwele: Yaloo, omumati ngoye omwaanawa, ngoye sho wa li omudhiginini moshishonashona, oto pewa epangelo lyiilando omulongo. Nomutiyali okwe ya mo nokwa ti: Omuwa, oponda yoye ya likolitha ooponda ntano. Naanguka a lombwelwa kuye: Nangoye, lela iilando itano.”

Elenga ndyoka li na ooponda omulongo otali thaneke ongundu yaalongwa okuza pOpentekoste 33 E.N. sigo ongashingeyi moka mwa kwatelwa aayapostoli. Omupiya ngoka a likolitha ooponda ntano, oye lile po wo ongundu yopethimbo olyo tuu ndyoka, ndjoka yi indjipaleke iiniwe yomukwaniilwa gwawo kombanda yevi shi ikolelela koompito ndhoka yi na nosho wo kuunkulungu wayo. Oongundu adhihe mbali otadhi uvitha nuulaadhi onkundana ombwanawa, noshizemo, aantu oyendji yomitima omiwanawa otaya ningi Aakriste. Omugoyi yomomalenga oye shi enditha nawa mokuhalitha noyi indjipaleke shoka ya kala yi inekelelwa.

Jesus ota tsikile ta ti: “Gumwe ishewe e ya po nokwa ti: Omuwa tala, oponda yoye oyo ndjika nde yi pungula [moshikayiwa]. Ngame nde ku tila, oshoka ngoye omulumentu omudhigu, to kutha shono inoo shi pungula noho teya shono inoo shi kuna. Oye nokwe mu lombwele: Otandi ku pangulitha okana koye mwene, [omupiya] ngoye omwiinayi. U shi ndje ngame omulumentu omudhigu, he kutha shono inaandi shi pungula nohe teya shono inaandi shi kuna, oshike ano inoo [tula iimaliwa yandje mombaanga, OB-1986]? Ngame sho nda galuka, ando nde yi adha niihohela. Nokwa lombwele mboka ya li po: Mu kutheni oponda ye, mu yi pe ngoka e na ooponda omulongo.”

Okukuthwa oponda yopathaneko kwelenga ndyono ewinayi otaku ti kutya lyo olya kanitha ehala mUukwaniilwa womegulu. Eeno, olya kanitha pathaneko uuthembahenda wokupangela iilando omulongo nenge itano. Ndhindhilika wo kutya elenga itali ithanwa ewinayi molwashoka lya ningi sha oshiwinayi, ihe omolwaashoka lya nyengwa okwiindjipaleka eliko lyomuukwaniilwa gwomuwa gwalyo.

Sho oponda yelenga ewinayi ya pewa elenga lyotango, otali patana tali ti: “Omuwa, nguka e na nale ooponda omulongo.” Ihe Jesus ota yamukula ta ti: “Ngoka e na, ota pewa, naangoka ke na, ota kuthwa naashino e shi na. Ihe aatondi mbono yandje inaa hala, ndi ya pangele, ya eteni nkuka, ne mu ya dhipagele mpaka montaneho yandje.” Lukas 19:11-27; Mateus 28:19, 20.

▪ Oshike she etitha eudhi lyaJesus lyooponda?

▪ Olye omulumentu omuvalekele, nokoshilongo hono ta yi oshike?

▪ Oolye omalenga, noshike tashi thanekwa kooponda?

▪ Oolye aantu yomoshilongo, nongiini tayu ulike uutondwe wawo?

▪ Omolwashike elenga limwe lyi ithanwa ewinayi, nokukuthwa kwalyo oponda otaku ti shike?