Ontopolwa 35

Euvitho lya tseyika nawa inaali ningwa nando onale

OSHINIMA shika osho shimwe shi shi okudhimbulukiwa unene mondjokonona yOmbimbeli: Jesus a kuutumba handiyaka yondundu nota ningi Euvitho lye lyokOndundu lya tseyika apuhe. Ehala ndyoka oli li popepi nEfuta lyaGalilea, tashi vulika popepi naKapernaum. Jesus opo owala a hogolola 12 yomaalongwa ye ya kale aayapostoli, konima yokugalikana kwe uusiku auhe. Opo nduno ota londoloka pamwe nayo ayehe ya ye kehala ndika lye elekana kondundu.

Omuntu oto dhiladhila kutya Jesus ngashingeyi okwa vulwa noonkondo nokwa hala okukotha po. Ihe opwe ya omangathithi omanene gaantu, yamwe oya zi kuJudea nokuJerusalem, pu na ookilometa 100 sigo 110. Ooyakwawo oya zi koshitopolwa shokomunkulofuta gwokolundume lwaTiro naSidon. Oye ya okupulakena Jesus nokwaaludhwa komauvu gawo. Opu na nokuli aantu mboka taya hepekwa koompwidhuli, aayengeli yuuwinayi yaSatana.

Manga Jesus ta kuluka ko, aavu otaya hedha kuye ye mu gume, e te ya aludha ayehe. Konima yaashono, osha yela kutya Jesus ota londo kehala li li pombanda lela yondundu. Ota kuutumba hoka nota tameke okulonga omangathithi gaantu ga waambakana pehala lye elekana komeho ge. Dhhiladhila owala kwaashino! Ngashingeyi kapu na we nokuli nando oye omuntu gumwe awike maapulakeni ayehe ta hepekwa kuuvu wa kwata miiti!

Aantu oya hala noonkondo okupulakena omulongi ngoka ta vulu okulonga iikumithalonga mbika. Ihe Jesus ota ningi euvitho lye unene tuu molwuuwanawa waalongwa ye, mboka tashi vulika ya ngundumana popepi naye. Ihe Mateus nosho wo Lukas oye li nyola opo natse wo tu vule okumona mo uuwanawa.

Ehokololo lyaMateus lyeuvitho oli vule lyaLukas lwiikando ine lwaampono muule. Kakele kaashono, iitopolwa mbyoka Mateus a nyola, paLukas oya popilwe kuJesus pethimbo lilwe lyuukalele we, ngaashi tashi monika mokuyelekanitha Mateus 6:9-13 naLukas 11:1-4 nosho wo Mateus 6:25-34 naLukas 12:22-31. Ihe shika kashi na nando oku tu kumitha. Osha yela kutya Jesus okwa longo shi vulithe pulumwe iinima ya faathana, na Lukas okwa hogolola okunyola gamwe gomomalongo ngaka komukalo gwi ili.

Shoka hashi ningi euvitho lyaJesus li na oshilonga unene kashi shi owala uule wiikalimo yalyo yopambepo ihe omukalo omupu nogwa yela hoka ta gandja ooshili ndhika. Ota longitha iimoniwa yesiku kehe niinima mbyoka aantu ye shi nawa, nokungeyi ota ningi omadhiladhilo ge omapu okuuviwa ko kwaayehe mboka taya kongo onkalamwenyo ombwanawa mondjila yaKalunga.

Oolye ye li shili aanelago?

Kehe gumwe okwa hala okukala omunelago. Moku shi tseya Jesus ota tameke Euvitho lye lyokOndundu mokuhokolola mboka ye li shili aanelago. Ngaashi tatu vulu okudhiladhila, shika otashi kwata ko nziyanziya eitulomo lyaapulakeni ye oyendji. Ihe oohapu dhe dhopetameko koyendji odha li dha fa tadhi shi pataneke.

Jesus otu ukitha oohapu dhe kaalongwa ye, ta ti: “Aanelago one oohepele, oshoka [uukwaniilwa waKalunga oweni, KB]. Aanelago one mboka mwa si ondjala ngashingeyi, oshoka one tamu ka kutithwa. Aanelago one mboka tamu lili ngashingeyi, oshoka one tamu ka yola. One aanelago, aantu nge haye mu tondo . . . Nyanyukweni esiku ndyoka, ne mu ligole pombanda, oshoka ondjambi yeni oyo onene megulu.”

Ndika olyo ehokololo lyaLukas lyefalomo lyeuvitho lyaJesus. Ihe pahokololo lyaMateus, Jesus ota ti wo kutya aanelago oomboka ye li aatalanteni, aanamutimahenda noye na omutima gwa yela naanambili. Mboka oyo aanelago, Jesus osho ta ti, molwashoka otaya ka thigulula evi, otaya ka silwa ohenda, otaya ka mona Kalunga notaye ki ithanwa aana yaKalunga.

Ihe shoka Jesus a hala okutya mokukala omunelago, kashi shi owala okukala wa nyanyukwa nenge wu uvite ombili, ngaashi ngele omuntu e na iiyolitha. Elago lyashili ohali yi muule nolya kwatela mo edhiladhilo lyokukala wa mbilipalelwa nowa gwanenwa monkalamwenyo.

Onkee ano Jesus otu ulike kutya mboka ye li aanelago oyo aantu mboka ya dhimbulula ompumbwe yawo yopambepo, ya nikila oluhodhi onkalo yawo yuulunde notayi ilongo okutseya Kalunga noku mu longela. Nokuli nando oye tondike nenge taya hepekwa molwokulonga ehalo lyaKalunga, oyo aanelago molwashoka oye shi kutya otaya nyanyudha Kalunga notaya ka pewa kuye ondjambi yomwenyo gwaaluhe.

Ihe oyendji yomaapulakeni yaJesus, ngaashi naanaa aantu yamwe nena, oyi itaala kutya okukala wa hepuluka nokunyanyukilwa omainyanyudho oyo hayi ningi omuntu a kale omunelago. Jesus okwa tseya kutya hasho shi li ngaaka. Jesus ota ningi ekondjithathano ndyoka tali kumitha oyendji yomaapulakeni ye, ta ti:

“Ihe yaye one aayamba, oshoka etalaleko lyeni mwe li mono nokuli. Yaye one mboka mwa kuta ngashingeyi, oshoka tamu ka sa ondjala. Yaye one mboka hamu yolo ngashingeyi, oshoka tamu ka nika uuthigwa notamu ka lila. Yaye one mboka, aantu ayehe taye mú popile muuwanawa, oshoka osho tuu ngeyi oohe yawo ya ningile aaprofeti aafundja.”

Jesus okwa hala mbela okutya shike? Omolwashike mbela okukala omuyamba, okulalakanena omainyanyudho gokuyolayola nokunyanyukilwa okuhokiwa kaantu hashi eta oyaye? Osho molwashoka okulongela Kalunga hoka oko akuke haku eta elago lyashili, kaku mo monkalamwenyo yomuntu, ngele e na iinima mbika note yi simaneke. Pethimbo opo tuu mpono, Jesus ka li a hala okutya kutya omuntu ota ka kala e li omunelago owala molwashoka a hepa, a sa ondjala nenge a nika uuthigwa. Ihe olundji aantu mboka ye na oluhepo lwa tya ngaaka, otaya vulu okupulakena kelongo lyaJesus, nomokuninga ngeyi otaya lalekwa nuuyamba nelago lyashili.

Nopo nduno Jesus ota taalele kaalongwa ye e ta ti: “One omongwa gwevi.” Dhoshili, ina dhiladhila kutya yo oye li omongwa gwo gwenegwene. Mepingathano naashika, omongwa ogwo oshipungulithi shokukeelela okwoola. Ondumba onene yagwo oya li ya ndumbalala popepi noaltari motempeli yaJehova, naasaseri mboka taya longo mpoka, oya li ye gu longitha okutoya omayambo.

Aalongwa yaJesus oyo “omongwa gwevi” sha hala okutya oye na enwethemo tali gamene aantu. Dhoshili, etumwalaka ndyoka haya gandja, otali ka gamena oomwenyo dhaayehe mboka tayi inyengithwa kulyo! Otali ke eta monkalamwenyo yaantu ya tya ngaaka omaukwatya ngaashi okwaahatengauka nuudhiginini notaga keelele okuyonuka kehe kwopambepo nokwopamikalo muyo.

“One uuyelele wuuyuni,” Jesus osho ta lombwele aalongwa ye. Onyeka ihayi tulwa kohi yontungwa ihe okoshihukikwa, omolwashoka Jesus ta ti: “Oshongeyi uuyelele weni nau yele montaneho yaantu.” Aalongwa yaJesus ohaye shi ningi mokugandja uunzapo kwawo montaneho, nosho wo mokulonga ye li iiholelwa iiwanawa yeihumbato ndyoka tali tsu kumwe nomakotampango gOmbimbeli.

Omuthikampango gwopombanda kaalanduli ye

Aawiliki yelongelokalunga oya tala ko Jesus e li omutaaguluki gwOmpango yaKalunga nokathimbo nokuli ka piti oya pangelele ompangela ye mu dhipage. Onkee ano Jesus ta tsikile ta yelitha mEuvitho lye lyokOndundu ta ti: “Inamu dhiladhila, ongame nde ya okudhima po ompango nooprofeti, inandi ya oku dhi dhima po, aawe, oku dhi gwanitha.”

Jesus oku na esimaneko enene lyokusimaneka Ompango yaKalunga nota ladhipike yalwe ya kale wo ye li na. Muushili wo wene, ota ti: “Ano shaa ngoka ta dhimi po nando shimwe shomiipango iishuushuka nota longo ngeyi aantu, oye ti ithanwa omushuushuka [muukwaniilwa womegulu, KB],” tashi ti kutya omuntu a tya ngaaka ita ka ya mo mUukwaniilwa nando.

Jesus ihu ulike nando ondhino kOmpango yaKalunga, mepingathano naashono, ye oha pangula nokuli iikala mbyoka tayi ambidhidha omuntu e yi yone. Konima sho Jesus a popi kutya Ompango otayi ti: “Ino dhipaga,” okwa gwedha ko ta ti: “Ihe otandi mu lombwele kutya kehe tuu ngoka ta tsikile okukala a geyela omumwahe, ota ka geyelwa koshipala shoshipundi shepangulo.”—NW.

Molwashoka okutsikila okukala wa geyela mukweni ngoka hamu endathana naye osha kwata miiti unene, tashi vulika nokuli tashi fala sigo omedhipago, Jesus ota yelitha kutya omuntu oku na okuninga shi thike peni opo a adhe ombili. Ota ti: “Ongoye ngele to ka gandja omagano goye [gopayambo] koshiyambelo e to dhimbulukwa nkoka, omumwanyoko mwa ningathana naye, nena omagano goye ga thiga po koshiyambelo u ye manga, mu ka paathane ombili namumwanyoko, ngu u galuke ihe, u ka gandje omagano goye.”

Opo nduno Jesus otu ukitha eitulomo koshipango oshitiheyali shomIipango Omulongo e ta tsikile ta ti: “One mwe shi uvu sha tiwa: Ino hondela.” Ihe Jesus ota pangula nokuli okukala aluhe niikala yokuyona ondjokana. “Ihe ngame otandi mú lombwele: Okehe tuu ngoka ta [kala a, NW] tala omukiintu e mu haluka, oye okwe mu hondele momwenyo gwe.”—OB-1986.

Mpaka Jesus ita popi owala kombinga yedhiladhilo inaali yogoka pamikalo lyomeendelelo, ihe okombinga ‘yokukala to tala.’ Okukala to tala kwa tya ngaaka ohaku pendutha okahalu okahololiyuvo, hoka ngele ompito otayi shi pitika, taka vulu ka fale mokuyona ondjokana. Ongiini mbela omuntu ta vulu okukeelela opo shino kaashi ningwe? Jesus ota yelitha nkene oonkatu dha kwata miiti tadhi vulu okukala dha pumbiwa, ta ti: “Eho lyoye lyokolulyo ngele tali ku hongolola, li tsipula mo, ngu li ekelehi, . . . Noshikaha shoye shokolulyo nge tashi ku hongolola, shi teta ko, ngu shi ekelehi.”

Olundji aantu oye hole okukuthitha po oshilyo sholutu shoka tashi ehama opo ya hupithe oomwenyo dhawo. Ihe paJesus, osha simana nokuli noonkondo adhihe ‘okweekelahi’ shaashono, nokuli noshinima shoka shi na ongushu onene ngaashi eho nenge oshikaha, okuyanda omadhiladhilo inaaga yogoka pamikalo nosho wo iilonga inaayi yogoka. Ngele hasho, Jesus ta yelitha, aantu ya tya ngaaka otaye ku umbilwa muGehenna (ondumba yiiyagaya tayi pi popepi naJerusalem), ndjoka tayi thaneke ehanagulo lyaaluhe.

Jesus ota kundathana wo nkene taku kalwa naantu mboka haye ehameke yalwe nohaye ya agulitha. Omayele ge ogo: “Inamu tinda omwiinayi: ihe ngele ku na ngoka te ku dhenge olupi kolupanda lwokolulyo, mu galulila nolukwawo.” Jesus ita ti kutya omuntu ke na okwiigamena mwene nenge okugamena uukwanegumbo we uuna taya ponokelwa. Olupi itali dhengwa nelalakano lyokweehameka gulwe panyama, ihe mepingathano naashika, oku mu hinda. Onkee ano shoka Jesus a hala okutya osho kutya otashi ka kala sha puka okugalulila omuntu uuwinayi ngele ota kambadhala oku ku tamaneka nenge oku ku kondjitha, kutya nduno ote ku dhenge lela nenkawa nenge ote ku shokashoka noohapu tadhi tukana.

Konima yokuukitha eitulomo kompango yaKalunga kutya omuntu oku na okukala e hole omuntu omukwawo, Jesus ota ti: “Ihe ongame tandi mú lombwele: holeni aatondi yeni, galikaneneni aahepeki yeni.” Ota gandja etompelo lya kola lyoku shi ninga, ta tsikile ta ti: “Opo mu ninge aana yaHo yeni yomegulu, oshoka etango lye ote li pitithile naawinayi naawanawa.”

Jesus ota hulitha oshitopolwa shika sheuvitho lye mokukumagidha ta ti: “Kaleni ano mwa gwana mwa pwa, ongashika Ho yeni yomegulu a gwana a pwa.” Jesus ita ti kutya aantu otaya vulu okukala ya gwanenena mondunge yolela. Mokuholela Kalunga, yo otaya vulu okutamununa mo ohole yawo okuhola nokuli naatondi yawo. Ehokololo lya faathana lyaLukas otali gandja oohapu dhaJesus tadhi landula: “Kaleni mu na ohenda, ngashika Ho yeni e na ohenda.”

Egalikano neinekelo muKalunga

Jesus ota tsikile neuvitho lye nota pangula iihelele yaantu mboka hayi imonikitha ye li aatilikalunga aniwa. “Ngele to gandja omagano gesilohenda,” ye ta ti, “ino tetekelitha okuhika ontunda ngaafudhime haa ningi.”

Jesus ota tsikile ta ti: “Nongele tamu galikana, mwaa kale ngaafudhime; oshoka ye hole okuthikama nokugalikana moosinagoga nopoompagiila dhoondjila ya monike kaantu.” Mepingathano naashika, ote ya lombwele ta ti: “Ngele to galikana, inda mondunda yoye, edhila po osheelo, ngu u galikane Ho, oongoka a kala meholamo.” Jesus naye mwene okwa li a galikana omagalikano gomontaneho, nonkee ano omagalikano ga tya ngawo ye hago ta pangula. Shoka ta pangula osho omagalikano ngoka haga ningwa okukumitha aapulakeni nokupandulwa kuyo.

Jesus ota tsikile ta gandja omayele ta ti: “Nonge tamu galikana, inamu [popyulula oshinima shimwe ashike, NW] ngaapagani.” Jesus ita ti kutya okupopyulula ko kwene oko kwa puka. Oshikando shimwe, sho a li ta galikana okwa popyululile olundji “oohapu odho tuu ndhoka.” Ihe shoka inaa hokwa osho oohapu ‘tadhi popyululwa’ dhi ilongwa momutse, ngaashi dhaamboka haya yalula omagwe goteelushu omanga taya galikana.

Opo a kwathele aapulakeni ye nkene ye na okugalikana, Jesus ote ya pe oshiholelwa shegalikano shoka sha kwatela mo omaindilo gaheyali. Gatatu gotango otaga zimine shi li mondjila uunamapangelo waKalunga nomalalakano ge. Otaga pula edhina lyaKalunga li yapulwe, Uukwaniilwa we u ye nosho wo ehalo lye li gwanithwe. Gahugunina gane ogo omaindilo gopaumwene, ngaashi okwiindila iipalutha yesiku kehe, okudhiminwa po oondjo, okwaahafalwa momamakelo ge vule oonkondo dhetu nokuhupithwa komwiinayi.

Jesus ota tsikile ta popi omwigo gwokutsa omuthindo sha pitilila iiniwe yopamaliko. Ote tu ladhipike ta ti: “Inamu ilikolela omaliko kombanda yevi, moka hali yonwa po koothithi nokoshushi, naafuthi haye li fulu mo nohaye li yaka po.” Omaliko ga tya ngaaka kage kwete owala okuyonuka, ihe kage na wo ongushu momeho gaKalunga.

Ihe Jesus ota ti: “Ihe ilikoleleni omaliko omegulu.” Shika otashi ningwa mokupititha komeho iilonga yaKalunga monkalamwenyo yoye. Kapu na gumwe ta vulu okukutha po ongushu ndjoka wi igongelela puKalunga, nenge ondjambi onkumithi yayo. Opo nduno Jesus ota popi natango ta ti: “Kokuma nkoka kwa kala emona lyoye, oko kwa kala nomwenyo gwoye.”

Jesus ota tsikile ta popi omwigo gwokuhola eliko, ta longitha eudhi: “Eho olyo uuyelele wolutu. Ano eho ngele lyu uka, olutu lwoye aluhe lu [na] uuyelele. Ihe eho lyoye ngele ewinayi, nolutu lwoye aluhe lu na omilema.” Eho ndyoka li wete ko nawa kolutu oli li ngaashi olamba ya temwa mehala lyomilema. Ihe opo li vule okumona ko nawa, eho oli na okukala li li nawa, sha hala okutya, oli na okukala tali ukitha eitulomo koshinima shimwe ashike. Eho ndyoka ihaali mono ko nawa, otali dhiladhilitha omuntu iinima ya puka, u pitithe okulalakanena iinima yopamaliko komeho yokulongela Kalunga, noshilanduliko osho kutya ‘olutu aluhe’ otalu kala momilema.

Jesus ota hulitha oshinima shika neudhi li na oonkondo: “Kaku na ngoka ta vulu okulongela aawa yaali; oshoka ota tondo gumwe, ye e hole omukwawo, nenge a hokwa nguka e ta dhini ngwiyaka. Kamu vulu okulongela Kalunga nomamona.”

Konima yokugandja omayele ngaka, Jesus ota shilipaleke aapulakeni ye kutya kaye na okukala noshimpwiyu shoompumbwe dhawo dhopanyama ngele taya pititha komeho okulongela Kalunga. “Taleni oondhila dhokegulu,” ye ta ti, “ihadhi kunu nongaashi ihadhi teya, noihadhi pungula miigandhi, ihe Ho yeni yomegulu ohe dhi palutha.” Opo nduno ota pula: “Hane mboka mu dhi vule shili?”

Natango Jesus otu ulike kiigwanga yomelundu nota ti kutya “naSalomo omeopalo lye alihe ina zala [kwo] opala e thike pushimwe shaambino.” Ota tsikile ta ti: “Ano Kalunga nge ta zaleke ngeyi omwiidhi gwokelundu, . . . ite shi mu ningile unene andola one mboka yeitaalo efupi?” Onkee ano Jesus ota hulitha ta ti: “Ano inamu kala mu na oshimpwiyu mu tye: Otatu li shike? Na: Tatu nu shike? Na: Tatu zala shike? . . . Oshoka Ho yeni yomegulu e shi shi, omwa pumbwa mbika ayihe. Otango ano kongeni [uukwaniilwa waKalunga, KB] nuuyuuki we, nena oombino ayihe otamu yi gwedhelwa ko.”

Ondjila tayi fala komwenyo

Ondjila tayi fala komwenyo oyo ondjila yokuvulika komalongo gaJesus. Ihe shika kashi shi oshipu okuninga. Pashiholelwa, Aafarisayi oya li ye na egamo okupangula yalwe nomuthindako, notashi vulika oyendji ya li ye ya holele. Onkee ano manga Jesus ta tsikile nEuvitho lye lyokOndundu, ta gandja ekumagidho ndika: “Inamu pangula, opo mwaa pangulwe; oshoka epangulo ndika tamu li pangulitha, nane wo otamu ke li pangulithwa.”

Oshi li oshiponga okulandula oshiholelwa shAafarisayi shokugandja uusama wa pitilila. Pahokololo lyaLukas, Jesus ota ningi eudhi lyoshiponga shika mokutya: “Omuposi ota wapa ngiini okukwata keti lyomuposi omukwawo? Itaa gwile moshilambo ayehe yaali?”

Okukala ho pe unene yalwe uusama, nokunenepeka omapuko gawo nenge oku ga popyapopya oshi li eagulitho lya kwata miiti. Onkee ano Jesus ta pula ta ti: “Nenge to wapa ngiini okulombwela omumwanyoko: Andiya, ndi kuthe mo okayagaya meho lyoye, ihe tala, ongoye u na omuti meho lyoye mwene? Omufudhime ngoye, kutha mo tango omuti meho lyoye mwene, ngu u tale ihe, ngele to vulu okukutha mo okayagaya ke li meho lyamumwanyoko.”

Shika itashi ti kutya aalongwa yaJesus kaye na okulongitha oondunge dhokuyoolola mekwatathano naantu yalwe, oshoka ota ti: “Oshiyapuki inamu shi gandja koombwa, niimona yeni inamu yi umbila iingulu.” Ooshili dhOohapu dhaKalunga oondjapuki. Dho odha fa iimona yopathaneko. Ihe ngele oohandimwe yamwe, mboka ye li ngaashi oombwa nenge iingulu, itayu ulike olupandu kooshili ndhika dhi na ondilo, aalongwa yaJesus oye na okweetha po aantu ya tya ngaaka nokukonga mboka ye na ehalo enene.

Nonando nale Jesus okwa kundathanene kombinga yegalikano mEuvitho lye lyokOndundu, ye ota tsu omuthindo ngashingeyi ompumbwe okukala wa dhiginina mulyo. “Kaleni nokwiindila,” osho ta ladhipike aapulakeni ye, “one otamu ke shi pewa.” (NW) Okuyelitha nkene Kalunga e na ehalo oku uva omagalikano, Jesus ota pula ta ti: “Nenge omu na tuu omuntu mokati keni, [omwana] nge te mu indile oshikwiila, te mu pe emanya . . . ? Ano one aawinayi, ngele mu shi okupa aana yeni omagano omawanawa, unene tuu Ho yeni yomegulu ota gandja uuwanawa kumboka taye mu indile.”

Jesus ota tsikile ta popi sha shoka sha ninga omukalompango gwa tseyika apuhe, ngoka hagu ithanwa apuhe Ompango Ombwanawa. Ota ti: “Onkee ano, shaa shoka mwa hala, aantu ye mu ningile, osho ya ningileni wo.” Okukala pampango ndjika osha kwatela mo okukatuka oonkatu ombwanawa mokuningila yalwe uuwanawa, to ya ningile ngaashi ngoye wa hala ye ku ningile wo.

Okutya kutya ondjila tayi fala komwenyo kayi shi ompu, otashi ulikwa kelombwelo lyaJesus: “Indeni mo mu pitile mosheelo sha patekidha. Oshoka osheelo shiyaka oshinene nondjila ndjiyaka ya mbwalangandja, otayi fala mekano, noyendji mboka taa yi mo; ihe osheelo shiyaka oshishona nondjila ndjiyaka ya thinana, otayi fala komwenyo, naashona yowala mboka taye yi mono.”

Oshiponga shokuhongololwa oshinene, onkee ano Jesus ta londodha ta ti: “Angaleni aaprofeti aafundja, mboka haye ya kune miipa yoonzi, ihe meni lyawo oyo omambungu haga lyana.” Nokuli ngaashi naanaa omiti omiwanawa nomiti omiwinayi hadhi vulu okudhimbululwa kiiyimati yadho, Jesus ta ti, osho aaprofeti aafundja taya vulu okudhimbululwa keihumbato lyawo nosho wo komalongo gawo.

Jesus ota tsikile ta yelitha kutya shoka omuntu ta popi hasho owala tashi mu ningi omulongwa Gwe ihe ooshoka ta longo. Aantu yamwe otaya ti kutya Jesus oye Omuwa gwawo, ihe ngele itaya longo ehalo lyaHe, ye ota ti: “Ongame otandi ya lombwele ihe: Ongame inaandi mú tseya noshitonale; zii po pungame, ne aakolokoshi.”

Hugunina, Jesus ota gandja ehulitho lyeuvitho lye kaali shi ku dhimbiwa. Ota ti: “Onkene ano, shaa ngoka tu uvu oohapu ndhika dhandje note dhi gwanitha, oye ta yelekwa nomulumentu omunandunge a tungile ongulu ye kemanya. Omvula noya tilehi, efundja lye ya, noombepo dha pepe dhi itsu mongulu ndjoka, ihe ongulu inayi kumuka po, oshoka oyo ya tungilwa kemanya.”

Mepingathano naashoka, Jesus ota ti: “Shaa ngoka tu uvu oohapu ndhika dhandje ye ite dhi gwanitha, ota yelekwa nomulumentu egoya a tungile ongulu ye pehekevi. Omvula noya tilehi, efundja lye ya, noombepo dha pepe dhi itsu mongulu ndjoka, noya kumuka po, nekumuko lyayo lya li enene.”

Sho Jesus ta mana euvitho lye, omangathithi gaantu oga kala ga kuminwa omukalo gwelongo lye, molwashoka okwe ya longo ngaashi ngoka e na oonkondopangelo nohangaashi aawiliki yelongelokalunga yawo. Lukas 6:12-23; Mateus 5:1-12; Lukas 6:24-26; Mateus 5:13-48; 6:1-34; 26:36-45, OB-1986; Mateus 7:1-29; Lukas 6:27-49.

▪ Openi Jesus e li sho ta ningi euvitho lye kaali shi okudhimbiwa nando, oolye ye li po noshike sha ningwa po manga inee li ninga?

▪ Omolwashike itaashi kumitha sho Lukas omalongo gamwe gomeuvitho e ga nyola ga kankamena kekankameno li ili?

▪ Oshike tashi ningi euvitho lyaJesus li na oshilonga unene?

▪ Oolye ye li shili aanelago nomolwashike?

▪ Oolye taya mono oyaye nomolwashike?

▪ Ongiini aalongwa yaJesus ye li “omongwa gwevi” nosho wo “uuyelele wuuyuni”?

▪ Jesus otu ulike ngiini esimano enene lyOmpango yaKalunga?

▪ Elombwelo lini Jesus ta gandja okuvudha mo shoka tashi etitha okudhipaga nokuyona ondjokana?

▪ Jesus okwa hala okutya shike sho ta popi kombinga yokugalula olupanda olukwawo?

▪ Ongiini tatu vulu okukala twa gwana twa pwa ngaashi Kalunga a gwana a pwa?

▪ Omalombwelo geni Jesus ta gandja kombinga yegalikano?

▪ Omolwashike omaliko gomegulu ge na oshilonga oshinene, nongiini omuntu to vulu oku ga mona?

▪ Omaudhi geni ga gandjwa okukwathela omuntu a yande okuhola eliko?

▪ Omolwashike Jesus a ti kutya omuntu ke na nando okukala e na oshimpwiyu?

▪ Jesus ota ti shike kombinga yokupangula yalwe, ihe ongiini tu ulike kutya aalongwa ye oye na okukala ye na oondunge dhokuyoolola shi na ko nasha naantu?

▪ Jesus ota ti natango shike kombinga yegalikano, nomukalompango guni ta gandja?

▪ Jesus otu ulike ngiini kutya ondjila ndjoka tayi fala komwenyo kayi shi ompu nonokutya opu na oshiponga shokuhongololwa?

▪ Jesus ota hulitha ngiini euvitho lye, notali inyengitha aantu ngiini?