Ontopolwa 104

Ewi lyaKalunga tali uvika oshikando oshititatu

MANGA Jesus e li motempeli, ota adhika kuuwehame uunene wokomwenyo omolweso ndyoka e na okusa nziya. Oti ipula unene nankene edhina lyaHe tali ka kala lya gumwa, onkee ano ta galikana ta ti: “Tate, adhimitha edhina lyoye!”

Opo tuu mpono ewi enene okuza megulu otali ti: “Onde li adhimitha notandi li adhimitha ishewe.”

Engathithi lyaantu ndyoka lya thikama mpoka olya ngwangwana. “Omuyengeli a popi naye,” yamwe yomuyo osho taya ti. Yalwe otaya ti kutya endundumo. Ihe muushili wo wene, Jehova Kalunga oye a popi! Ihe shika kashi shi oshikando shotango ewi lyaKalunga tali uvika shi na ko nasha naJesus.

Peninginitho lyaJesus, oomvula ndatu netata dha piti, Johannes Omuninginithi oku uvile Kalunga ta popi Jesus ta ti: “Nguka Omumwandje omuholike nde mu hokwa.” Opo nduno ethimbo lyontumba konima yOpaasa ya piti, Jakob, Johannes naPetrus, sho Jesus a shituluka montaneho yawo, oyu uvile Kalunga ta popi ta ti: “Omumwandje ngu omuholike, onde mu hokwa; mu uveni.” Nongashingeyi osho oshikando oshititatu, mo 10 Nisan, omasiku gane manga Jesus inaa sa, aantu tayu uvu ishewe ewi lyaKalunga. Ihe oshikando shino Jehova ota popi opo omangathithi gaantu ga vule oku li uva.

Jesus ota yelitha ta ti: “Ewi ndika inaali ya molwandje, aawe, omolweni tuu.” Otali gandja uunzapo kutya Jesus oye Omuna gwaKalunga shili, Messias omuuvanekwa. Jesus ota tsikile ta ti: “Epangulo lyuuyuni oli li ko ongashingeyi; ngashingeyi omupangeli guuyuni mbuka otu umbilwa pondje.” Onkalamwenyo yaJesus yuudhiginini muushili wo wene, otayi koleke kutya Satana Ondiaboli, omupangeli guuyuni mbuka, okwa gwana ‘okuumbilwa pondje,’ sha hala okutya, okugeyelwa neso.

Mokuulika kiilanduliko yeso lye ndyoka tali hedha popepi, Jesus ota ti: “Ongame nge tandi yeluthwa mo mevi, [omaludhi gaantu, NW] ayehe otandi ya [hilile] kungame.” Eso lye kali shi ando sho a sindika, oshoka mokupitila mulyo ota ka hilila yalwe kuye opo ya vule okunyanyukilwa omwenyo gwaaluhe.

Ihe engathithi lyaantu otali shi pataneke tali ti: “Otse tu uvu mompango, Kristus ota kala aluhe; ongoye to ti ngiini ano, Omuna gwOmuntu e na okuyeluthwa? Omuna nguka gwOmuntu olye?”

Nonando opu na omauliko agehe ngaka, mwa kwatelwa ewi lyaKalunga mwene ndyoka yu uvu, aantu oyendji inayi itaala kutya Jesus oye Omuna gwashili gwomuntu, Messias omuuvanekwa. Ngaashi e shi ningile oomwedhi hamano dha piti pOshituthi shOmatsali, Jesus oti ipopi mwene ishewe e li “uuyelele” nota ladhipike aapulakeni ye ta ti: “Manga mu na uuyelele, itaaleni uuyelele [opo mu ninge aana yuuyelele, KB].” Konima yokupopya iinima mbika, Jesus ota zi po nota holama, sha yela kutya omolwashoka omwenyo gwe ogu li moshiponga.

Okwaaitaala Jesus kwAajuda otaku gwanitha oohapu dhaJesaja kutya ‘omeho goshigwana oga tsikithwa noomwenyo dhawo odha kukutikwa, opo yaa itedhulule, noyaa aludhwe.’ Jesaja okwa mono memoniko ompangu yaJehova yomegulu, mwa kwatelwa Jesus meadhimo lye e li puJehova manga inaa ninga omuntu. Ihe Aajuda, mokugwanitha shoka Jesaja a nyola, oye ekelehi netangalalo omauliko kutya Nguka oye Omuhupithi gwawo omuuvanekwa.

Mepingathano naashika, oyendji yomaapangeli (sha yela kutya iilyo yompangu yopombanda yAajuda, Osanhedrin) oyi itaale shili Jesus. Nikodemus naJosef Omuarimatia oyo yaali yomaapangeli mbaka. Ihe konyala ethimbo ndino aapangeli itaya popi eitaalo lyawo, oshoka oya tila ya tidhwe poondondo dhawo mosinagoga. Aantu ya tya ngaaka itaya kanitha tuu oshindji!

Jesus ota tsikile ta ti: “Oongoka i itaala ndje, hangame i itaala, aawe, oonguka a tumu ndje. Naangoka a mono ndje, oye a mono ko ngoka a tumu ndje. . . . Nongele pe na ngoka tu uvu oohapu dhandje, ye ite dhi dhiginine, hangame tandi mu pangula; oshoka ngame inaandi ya okupangula uuyuni, aawe okuhupitha uuyuni. . . . Oohapu ndhoka nde dhi popya, odho tadhi mu pangula esiku lyahugunina.”

Ohole yaJehova yokuhola aantu ayehe yomuuyuni oye mu inyengitha okutuma Jesus opo mboka ye mu itaala, ya vule okuhupitwa. Ehupitho lyaantu otali ka kala lyi ikwatelela kevuliko lyawo kiinima mbyoka Kalunga a lombwele Jesus a popye. Epangulo otali ka ningwa “esiku lyahugunina” pethimbo lyElelo lyOomvula Eyuvi lyaKristus.

Jesus ota hulitha ta ti: “Inaandi popya mungame mwene, ihe Tate nguka a tuma ndje, oye a pe ndje oshipango shoka, ndi na oku shi tya noku shi popya. Ongame nondi shi shi, oshipango she osho omwenyo gwaaluhe. Onkee ano shono tandi shi popi ngaashi Tate a lombwele ndje.” Johannes 12:28-50; 19:38, 39; Mateus 3:17; 17:5; Jesaja 6:1, 8-10.

▪ Iikando itatu yini ewi lyaKalunga lyu uvika mekwatathano naJesus?

▪ Omuprofeti Jesaja okwa mono ngiini eadhimo lyaJesus?

▪ Aapangeli mboka yi itaala Jesus oyo oolye, ihe omolwashike itaaye mu hempulula montaneho?

▪ “Esiku lyahugunina” oshike, nokekankameno lini aantu taya ka pangulwa?