Ontopolwa 80

Iigunda yoonzi nosho wo omusita

JESUS okwi ile kuJerusalem kOshituthi shEyapulo, nenge Hanukka, oshituthi shedhimbuluko lyokuyapululila Jehova otempeli. Mo 168 K.E.N., oomvula 200 lwaampono dha piti, Antiokus IV Epifanes okwa lala Jerusalem nokwa nyateke otempeli noaltari yayo. Ihe konima yoomvula ndatu Jerusalem osha lalululwa, notempeli oya yapulwa ishewe. Konima yaashono, oshituthi shokomumvo sheyapulululo osha dhanwa.

Oshituthi shika shEyapulo ohashi ningwa mo 25 Kisleva, omwedhi gwOshijuda ngoka tagu tsu kumwe noshitopolwa shahugunina shaNovomba noshitopolwa shotango shaDesemba mokalindeli ketu koshinanena. Onkee ano okwa hupa owala omasiku omashona ge vulithe pethele opo Opaasa ya simana yomo 33 E.N. yi thike. Molwashoka olyo ethimbo lyuutalala, omuyapostoli Johannes ote li luku “okufu.”

Ngashingeyi Jesus ota longitha eudhi moka ta popi shi na ko nasha niigunda yoonzi itatu noshilonga she e li Omusita Omwaanawa. Oshigunda shoonzi shotango shoka ta popi osho elongekidho lyehangano lyOmpango yaMoses. Ompango oya li ngaashi ekuma ndyoka lya yoolola ko Aajuda komalongitho ga nyata gaamboka kaaye li mehangano ndika lyi ikalekelwa ndyoka ye na naKalunga. Jesus ota yelitha ta ti: “Oshili, oshili tandi mú lombwele: oongoka [itaa] yi moshigunda shoonzi ta pitile mosheelo, ihe ota gwayele mo palwe, oye omufuthi nomuyugi. Ihe oongoka ta yi mo ta pitile mosheelo, oye omusita gwoonzi.”

Yalwe oya li ye ya noya ti kutya oyo Messias, nenge Kristus, ihe kaya li omusita gwashili ngoka Jesus ta tsikile nokupopya ta ti: “Oye te egululwa komulangeli gwosheelo, noonzi otadhi uvu ewi lye; noti ithana oonzi dhe omadhina gadho note dhi piitha mo. . . . Omukwiilongo itadhi mu landula, otadhi mu yi ontuku, oshoka ewi lyaakwiilongo kadhi li shi.”

‘Omulangeli gwosheelo’ gwoshigunda shotango shoonzi okwa li Johannes Omuninginithi. Johannes e li omulangeli gwosheelo, okwe ‘egulula’ Jesus moku mu tseyitha kutya oye lye koonzi dhopathaneko ndhoka ye a li ta ka piitha mo oku dhi litha. Oonzi ndhika ndhoka Jesus ti ithana komadhina gadho note dhi piitha mo, lwahugunina otadhi etwa moshigunda shilwe shoonzi, ngaashi te shi yelitha ta ti: “Oshili, oshili tandi mú lombwele: ongame osheelo shoonzi,” sha hala okutya, osheelo shoshigunda shoonzi oshipe. Sho Jesus ta toto po ehangano epe naalongwa ye naashono te ya tilile ombepo ondjapuki okuza megulu pOpentekoste ya landula ko, yo otaye etwa moshigunda shika oshipe shoonzi.

Jesus ota tsikile ta yelitha onkandangala ndjoka ta dhana nota ti: “Ongame osheelo; ngele ku na ngoka ta yi mo ta pitile mungame, oye ta hupithwa, ota kala nokuya mo nokuza mo nota mono ko oshinapelo. . . . Ongame nde ya, opo ya kale ye na omwenyo noya kala ye na egwaneneno. . . . Ongame omusita ngo omwaanawa, ngame ndi dhi shi ndhoka dhandje, naandhoka dhandje dhi shi ndje, ngaashi Tate e shi ndje, nangame nda tseya Tate; nomwenyo gwandje tandi gu gandjele oonzi.”

Jesus okwa adhika opo a hekeleke aalanduli ye, ta ti: “Ino tila, ngoye oshigunda oshishona, oshoka Ho a hala oku mú pa [uukwaniilwa, KB].” Oshigunda oshishona shika, shoka lwahugunina tashi ka kala shi thike po 144 000, otashi ya moshigunda shika oshipe nenge oshitiyali shoonzi. Ihe Jesus ota tsikile ta ti: “Ondi na oonzi dhilwe wo, dhaa shi dhomoshigunda shino; naandhiyaka ondi noku dhi eta mo, notadhi uvu ewi lyandje, e taku ningi [uusita wumwe, NW] nomusita gumwe.”

Molwaashoka “oonzi dhilwe” kadhi “shi dhomoshigunda shino,” dho odhi na okukala dhomoshigunda shilwe, oshititatu. Iigunda yoonzi mbika iyali oyi na omathikilo ga yoolokathana. “Oshigunda oshishona” moshigunda shimwe otashi ka pangela pamwe naKristus megulu, ‘noonzi dhilwe’ moshigunda shilwe otadhi ka kala nomwenyo mEviparadisa. Ihe nonando dhi li miigunda iyali, oonzi itadhi ningilathana ondumbo nokadhi uvite dhi ikalekelwa, oshoka ngaashi Jesus ta ti, dho otadhi “ningi uusita wumwe” u na ‘omusita gumwe.’

Omusita Omwaanawa, Jesus Kristus, ota gandjele iigunda ayihe iyali yoonzi omwenyo gwe nehalo ewanawa. Ota ti: “Ongame mwene tandi gu gandja kehalo lyandje mwene. Ngame ondi na oonkondo oku gu gandja nondi na wo oonkondo oku gu taambulula. Shika osho shoka Tate a lombwele ndje, ndi shi ninge.” (OB-1986) Sho Jesus e shi popi, otapu holoka etopoko mokati kAajuda.

Oyendji mengathithi lyaantu otaya ti: ‘Ompwidhuli oyi mu na nota yi oonkwengu; otamu mu pulakenene shike?’ Ihe yalwe otaya ti: “Oohapu ndhika kadhi shi dhomunampwidhuli.” Osha yela kutya otaya popi oomwedhi dhontumba dha piti sho a aludhile omulumentu omuvalwa omuposi sho taya ti: “Ompwidhuli itayi vulu ndishi okutonatitha omeho gaaposi?” Johannes 10:1-22; 9:1-7; Lukas 12:32; Ehololo 14:1, 3; 21:3, 4; Epsalmi 37:29, OB-1986.

▪ Oshituthi shEyapulo oshike, nuunake hashi dhanwa?

▪ Oshigunda shotango shoonzi oshike, nolye omulangeli gwosheelo shasho?

▪ Ongiini omulangeli gwosheelo te egulula Omusita, nokonima yaashika oonzi otadhi ke etwa moshike?

▪ Iigunda iyali yOmusita Omwaanawa oya thikama moolye, notayi ningi omausita gangapi?