Ontopolwa 23

Iikumithalonga oyindji muKapernaum

MESABATI konima sho Jesus i ithana aalongwa ye yotango yane—Petrus, Andreas, Jakob naJohannes—yo ayehe otaya yi kosinagoga shopuyo muKapernaum. Hoka Jesus ota tameke okulonga aantu noya li ya kumwa oshoka ote ya longo ngaashi ngoka e na oonkondo nohangaashi aanongoraamata.

MEsabati ndika omu na omulumentu e niwe kompwidhuli. Konima yokathimbo, oti igidha mokule: “Owa hala shike mutse, Jesus Omunasaret? Owe ya, u tu yone po? Ondi ku shi ngoye olye, ongoye Omuyapuki gwaKalunga.”

Ompwidhuli ndjoka yi na omulumentu, muushili wo wene oyo yimwe yomaayengeli yaSatana. Jesus ota ganda ompwidhuli e ta ti: “Mwena, ngu u ze mo muye.”

Ompwidhuli oya mbungambunga omulumentu e ti igidha pombanda. Ihe otayi zi mo momulumentu inaayi mu ningila nando uuwinayi washa. Ayehe noya kumwa noonkondo! “Oshike shino?” osho taya pula. “Oye ta ganda oombepo dha nyata, nohadhi vulika kuye.” Onkundana kombinga yaashono otayi taandele momudhingoloko aguhe.

Jesus naalongwa ye otaya zi mo mosinagoga e taya yi kegumbo lyaSimon, nenge Petrus. Hoka oya adha ko yinamweno yaPetrus te ehama unene e niwe kolwiidhi lwa geya noonkondo. ‘Alikana mu kwathela,’ taye mu galikana. Ano Jesus ota yi kuye, te mu ambidhidha koshikaha, e te mu kuutumbike. Opo tuu mpoka okwa aluka e te ya longekidhile iikulya!

Konima yethimbo, sho etango lya ningina nale, aantu okuza akuhe oya tameke okuya kegumbo lyaPetrus pamwe naavu yawo. Nziyanziya oshilando ashihe osha ngundumana pomweelo! Jesus ote ya aludha komauvu gawo agehe, kutya nduno uuvu wawo owashike. Okwa mangulula nokuli mboka ye niwe koompwidhuli. Oompwidhuli ndhoka ta tidha mo sho tadhi zi mo, otadhi igidha: “Ongoye Omuna gwaKalunga.” Ihe Jesus ote dhi ganda noita pitika dhi popye sha molwashoka odhi shi kutya oye Kristus. Markus 1:21-34; Lukas 4:31-41; Mateus 8:14-17.

▪ Oshike tashi ningwa mosinagoga mEsabati konima sho Jesus i ithana aalongwa ye yane?

▪ Openi Jesus ta yi sho ta zi mosinagoga, noshikumithalonga shini ta longo hoka?

▪ Oshike tashi ningwa po konima yethimbo uusiku owo tuu mbono?