Ontopolwa 58

Iikwiila nefulika

OMANGATHITHI omanene gaantu oge ya kuJesus muDekapolis. Oyendji mboka ya zi kokule noshitopolwa shika shi na aakalimo oyendji mboka kaaye shi Aajuda, oye ya oku mu pulakena noya aludhwe komavu gawo. Oye etelele oontungwa oonene, moka yo haya humbata aluhe oonguta uuna taye ende miitopolwa mbyoka kaayi shi yAajuda.

Ihe hugunina Jesus oti ithana aalongwa ye e ta ti: “Aantu mbaka ondi ya uvitile ohenda, oshoka oyo ya menekele pungame omasiku gatatu, yo kaye na shoka taa li. Nonge tandi ya laleke, ya ye kaandjawo inaa lya, taa ka gundila mondjila; oshoka yamwe yomuyo oya zile kokule.”

“Otapu monika peni iikwiila mombuga muka okupalutha aantu mbaka?” aalongwa taya pula.

Jesus ota pula: “Omu na iikwiila ingapi?”

“Iheyali, noohi dhimwe,” osho ya yamukula.

Jesus ota lombwele aantu ya kuutumbe pevi, e ta kutha iikwiila noohi, ta galikana Kalunga, te yi pambula nota tameke oku yi pa aalongwa ye. Oyo notaya kwathele aantu, mboka ayehe taya li sigo taya kuta. Konima sho iikulya mbyoka ya hupu ko tayi toolwa, opu na oontungwa heyali oonene dhu udha, nokuli nonando aalumentu 4 000 lwaampono, nosho wo aakiintu naanona ya li.

Jesus ota laleke omangathithi gaantu ga ye, nota londo mowato pamwe naalongwa ye e taya yi kuuninginino womunkulo gwEfuta lyaGalilea. Mpaka Aafarisayi, mboka ngashingeyi ye li pamwe niilyo yiimpaga yelongelokalunga lyAasadukayi, otaya kambadhala okumakela Jesus moku mu pula e ya talithe endhindhiliko lyokegulu.

A tseya oonkambadhala dhawo dhoku mu makela, Jesus ota yamukula ta ti: “Ongulohi ohamu ti: Kaku na omvula, oshoka egulu olya tiligana, nongula ohamu ti: Onena otaku zi omvula yoshikungulu, oshoka egulu lya tiligana noku na iikogo iiluudhe. One omu shi okundhindhilika oshipala shegulu, ihe omandhindhiliko gomathimbo kamu shi oku ga ndhindhilika.”

Nomwaashoka, Jesus ote ya luku epipi ewinayi nolyaahondeli note ya londodha kutya, ngaashi wo a li e shi lombwele nale Aafarisayi, yo itaya ka pewa endhindhiliko kakele kendhindhiliko lyaJona. Ye naalongwa ye otaya yi mowato notaya yi kuBetsaida kuuzilolundume lwomunkulo gwEfuta lyaGalilea. Mondjila yokuya hono aalongwa otaya dhimbulula kutya oya dhimbwa okweetelela oshikwiila, ihe oye na owala shimwe ashike.

Mokudhimbulukwa etsakaneno lye opo lya piti po nAafarisayi nonAasadukayi aayambidhidhi yaHerodes, Jesus ote ya kumagidha ta ti: “[Kotokeni], ne mu iyageke efulika lyaafarisayi nolyaHerodes.” (OB-1986) Osha yela kutya okutumbula efulika kwaJesus otaku dhiladhilitha aalongwa kutya ye ota popi iikwiila mbyoka ya dhimbwa ko notaya tameke okutompathana kombinga yaashono. Jesus ota ndhindhilike kutya kaye uvite ko nota ti: “Oshike tamu popi [sho] mwaa na iikwiila?”

Jesus okwa adhika opo a pele aantu omayuvi oshikwiila pashikumithalonga, tashi vulika oshikumithalonga shika shahugunina e shi longo owala pwa pita esiku nenge omasiku gaali. Oye na okutseya kutya ye iti ipula niikwiila yo yene mbyono kaayi po. “Ne inaamu dhimbulukwa,” te ya dhimbulukitha, “sho nda pambulile aalumentu omayuvi gatano iikwiila mbiya itano, oontungwa ngapi dhu udha mwa toola uupambu?”

“Omulongo nambali,” taya yamukula.

“Nosho nda pambulile omayuvi gane iikwiila mbiya iheyali, oontungwa ngapi dhu udha mwa toola uupambu?”

“Heyali,” osho ya yamukula.

“Kamu uvite ko natango?” Jesus ta pula. “Mwaa shi kundhindhilika ngiini, ngame inaandi popya iikwiila? Ihe iyagekeni [efulika lyaafarisayi naasadukayi, OB-1986].”

Lwahugunina aalongwa otayu uvu ko shoka ye a ti. Efulika ndyoka hali pitha nohali tumbitha oshikwiila, olya li oshitya shoka hashi longithwa okuulika eyonuko. Onkee ano ngashingeyi aalongwa otayu uvu ko kutya Jesus ota longitha ethaneko, kutya ote ya londodha ya kale ya kotokela “omalongo gaafarisayi nogaasadukayi,” omalongo ngoka ge na enwethomo lya yonuka. Markus 8:1-21; Mateus 15:32–16:12.

▪ Omolwashike aantu ye na oontungwa oonene dhoonguta?

▪ Konima yokuza muDekapolis, Jesus ota yi momalweendo geni nowato?

▪ Aalongwa oyu uva ko ngiini papuko oohapu dhaJesus kombinga yefulika?

▪ Jesus okwa hala okutya shike nuutumbulilo “efulika lyaafarisayi naasadukayi”?